پاراليمپياداشى ءوز تويىندا قالىڭدىعىمەن قوسا ءۇش قوناقتى ءولتىردى

تايلاندتىق پاراليمپياداشى ءارى بۇرىنعى سولدات توي كۇنى قالىڭدىعى مەن ءۇش قوناقتى اتىپ ءولتىرىپ، ارتىنان وزىنە قول سالعان.

Kazinform بۇل تۋرالى BBC گە سىلتەمە جاساپ حابارلايدى.

29 جاستاعى چاتۋرونگ سۋكسۋك پەن 44 جاستاعى كانچانا پاچۋنتۋەك ءۇش جىل بىرگە تۇرعاننان كەيىن وتباسىن قۇرۋ تۋرالى شەشىم قابىلدايدى.

كۇيەۋ جىگىت توي بوپ جاتقان كەزدە كەنەت كەتىپ قالىپ، قارۋ الىپ قايتىپ كەلەدى دە، ايەلىن، ونىڭ 62 جاستاعى اناسى مەن 38 جاستاعى اپكەسىن اتىپ ولتىرەدى.

تاعى ەكى قوناققا وق ءتيىپ، اۋرۋحاناعا جەتكىزىلدى. ولاردىڭ بىرەۋى مەرت بولدى.

پوليتسيانىڭ حابارلاۋىنشا، چاتۋرونگ «ىشىمدىككە سىلقيا تويىپ العان»، ءبىراق مۇنداي ارەكەتكە نە سەبەپتى بارعانى بەلگىسىز. ول قارۋدى بىلتىر زاڭدى تۇردە ساتىپ العان، دەپ تولىقتىردى ولار.

قوناقتاردىڭ سوزىنشە، جاس جۇبايلار ساۋىق كەشتە داۋلاسىپ قالعان. سونىمەن قاتار، چاتۋرونگ قالىڭدىعى ەكەۋىنىڭ جاس ايىرماشىلىعى ءۇشىن ءوزىن ىڭعايسىز سەزىنەتىنى حابارلانعان.

دەگەنمەن پوليتسيا مۇنىڭ ءبارى بولجام ەكەنىن، ايعاقتاردى جيناعانىن جانە جاقىندا ءىستى جاباتىنىن ءمالىم ەتتى.

چاتۋرونگ بىلتىر يندونەزيادا وتكەن اسەان پاراليمپيادا ويىندارىندا جۇزۋدەن كۇمىس مەدال يەلەنگەن بولاتىن. ول شەكارانى باقىلاۋ قىزمەتىندە جۇرگەندە وڭ اياعىنان ايىرىلعان.

تايلاندتا جاپپاي اتىس ءجيى كەزدەسپەيدى، ءبىراق قارۋ ۇستاپ ءجۇرۋ كەڭ تاراعان. وتكەن ايدا بانگكوكتاعى ساۋدا ورتالىعىندا بولعان اتىس كەزىندە ءۇش ادام قازا تاپتى. ال 2022-جىلدىڭ قازانىندا بۇرىنعى پوليتسيا قىزمەتكەرى بالاباقشاعا قارۋ جانە پىشاقپەن شابۋىل جاساپ، 37 بالانى ولتىرگەن.