«اراشان» تۇقىمىنىڭ قوشقارى 1 ميلليون دوللارعا ساتىلدى
استانا. KAZINFORM - قىرعىزستاندا «اراشان» تۇقىمىنىڭ قوشقارى رەكوردتىق 1 ميلليون دوللارعا ساتىلدى. قۇنى ميلليون دوللارعا باعالانعان مامىلە وسى تۇقىمنىڭ ەتتى-مايلى قوي شارۋاشىلىعىن دامىتۋعا ارنالعان حالىقارالىق فەستيۆالدە جاسالعان.
بۇل تۋرالى Kazinform اگەنتتىگىنىڭ بىشكەكتەگى مەنشىكتى ءتىلشىسى جەرگىلىكتى ب ا ق- قا سىلتەمە جاساپ حابارلادى.
ءىس-شاراعا وزبەكستان، رەسەي، تاجىكستان جانە قازاقستان مەن قىرعىزستاننان كەلگەن فەرمەرلەر، سونداي-اق اۋىل شارۋاشىلىعى سالاسىنىڭ وكىلدەرى قاتىستى.
بۇل قوشقار 2023-جىلى قازاقستاندا 150 مىڭ دوللارعا ساتىلعان، اتاقتى فرانكەل ەسىمدى قوشقاردان تاراعان.
«اراشان» قوي تۇقىمى قىرعىزستاندا 2021-جىلى رەسمي تۇردە تىركەلگەن. بۇل تۇقىم ىرىلىگى، سالماقتى بولاتىندىعى جانە تەز وسەتىندىگىمەن ەرەكشەلەنەدى. سونىمەن قاتار ول بيىك تاۋلى وڭىرلەردىڭ قاتال كليماتىنا، دالالى اڭعارلارعا جانە قورادا باعىپ-كۇتۋگە جاقسى بەيىمدەلگەن.
قىرعىز رەسپۋبليكاسىنىڭ سۋ رەسۋرستارى، اۋىل شارۋاشىلىعى جانە قايتا وڭدەۋ ونەركاسىبى مينيسترلىگىنىڭ مالىمەتىنشە، «اراشان» تۇقىمدى قويلاردىڭ سانىن كوبەيتۋ، ساپاسىن ارتتىرۋ جانە حالىقارالىق نارىققا شىعارۋ - مال شارۋاشىلىعىن دامىتۋدىڭ ماڭىزدى باعىتتارىنىڭ ءبىرى.
بۇعان دەيىن قىرعىزستاندا ءۇي جانۋارلارىن چيپتەۋ مەن تىركەۋ جۇيەسىن ەنگىزۋ ۇسىنىلعانى حابارلانعان بولاتىن.
