پارادزيۋدودان گران-پري: قازاقستان قورجىنىنا تاعى 6 مەدال ءتۇستى

جاپونيا استاناسى توكيودا پارادزيۋدودان گران-پري تۋرنيرىندە قازاقستان قورجىنىنا تاعى التى مەدال ءتۇستى، دەپ حابارلايدى Kazinform.

جارىستىڭ ەكىنشى كۇنى قازاقستاندىقتار 2 كۇمىس، 4 قولا جۇلدە جەڭىپ الدى.

زارينا رايفوۆا J2 ساناتى بويىنشا 70 كەلىدەن استام سالماق دارەجەسىندە فينالدا برازيليا پارادزيۋدوشىسى رەبەكا سيلۆاعا ءۇش شيدومەن ەسە جىبەردى.

سونداي-اق جۇرحامىرزا شۇكىربەكوۆ J2 ساناتىندا 90+ كەلى سالماق دارەجەسىندە سوڭعى باسەكەدە گرۋزيالىق رەزاۆ چيكويدزەدەن ايلاسىن اسىرا المادى.

ءتورت پارادزيۋدوشىمىزعا قولا جۇلدە بۇيىردى.

دينارا كۋدجۋلوۆا J1 ساناتىندا 70 كەلىگە دەيىنگى سالماقتا قولا جۇلدە ءۇشىن باسەكەدە مىسىرلىق ماحا اليدى يپپونمەن ۇتتى.

ەرلان وتەپوۆ J1 ساناتىندا 90+ كەلى سالماقتا يراك وكىلى ال-سۋلتانيدى گولدەن سكوردا ۆازاري ۇپايىمەن جەڭدى.

ايدانا عازيز قىزى J2 ساناتىندا 70+ كەلى سالماقتا ۇلى بريتانيالىق كريستەن تايلوردى ۇستاۋ ادىسىمەن قاپى قالدىردى.

سول سەكىلدى ەرلان كونكيەۆ J2 ساناتىندا 90+ كەلى سالماقتا تاعى ءبىر ۇلى بريتانيالىق دجەك حودسوندى يپپونمەن تىزە بۇكتىردى.

كەشە قازاقستاندىق پارادزيۋدوشىلار 1 التىن، 2 كۇمىس، 1 قولا جۇلدەگە يە بولعان ەدى.

ەسكە سالا كەتەيىك، بۇدان بۇرىن اقمارال ناۋاتبەكتىڭ توكيودا پارادزيۋدودان گران-پري تۋرنيرىندە چەمپيون اتانعانىن جازعان بولاتىنبىز.