اراب ينۆەستورلارى قازاقستاندا جەل ەلەكتر ستانتسياسىن سالۋعا 1,8 ميلليارد دوللار ينۆەستيتسيا سالادى

ACWA Power ديرەكتورلار كەڭەسىنىڭ ءتوراعاسى مۋحامماد ابۋنايان قازاقستاننىڭ جەتىسۋ وبلىسىندا ىسكە اسىرىلۋى مۇمكىن جوبا جايىندا ايتىپ بەردى، دەپ حابارلايدى Kazinform Silk Way تەلەارناسىنا سىلتەمە جاساپ.

م. ابۋناياننىڭ ايتۋىنشا، كليماتتىڭ وزگەرۋى جونىندەگى ب ۇ ۇ- نىڭ نەگىزدەمەلىك كونۆەنتسياسى تاراپتارىنىڭ 28- كونفەرەنسياسى اياسىندا قازاقستان پرەزيدەنتىمەن كەلىسسوزدەر بولدى. بۇل تۇرعىدا ەلىمىزدىڭ ءبىر وڭىرىندە قۋاتى 1 گۆت جەل ەلەكتر ستانتسياسىن سالۋ ماسەلەسى قارالعان. بۇل نىسانعا سالىناتىن ينۆەستيتسيا 1,8 ميلليارد ا ق ش دوللارىنا جەتەدى.

«ءبىز قازاقستانداعى قۇنى 1,8 ميلليارد دوللار بولاتىن ينۆەستيتسيالىق جوبامىز جايىندا قۋانا حابارلاپ وتىرمىز. قازاقستاننىڭ ەنەرگەتيكا سالاسىنداعى باستامالارىن، سونداي-اق «جاسىل» ەنەرگەتيكانىڭ قالاي دامىپ جاتقانىن كورىپ وتىرمىز. ACWA Power كومپانياسىندا وسى باعىتتاعى جوبالاردى ىسكە اسىرۋ تۇرعىسىندا بارلىق قاجەت مۇمكىندىكتەر مەن قۇزىرەتتەر بار. ءبىز ورتالىق ازيانىڭ ەلدەرىندە جوبالاردى جۇزەگە اسىرىپ كەلدىك. اتاپ ايتقاندا، قازاقستان ءبىز ءۇشىن ستراتەگيالىق ماڭىزدى سەرىكتەس»، - دەدى ول.

بۇعان دەيىن مەملەكەت باسشىسى ACWA Power كومپانياسى ديرەكتورلار كەڭەسىنىڭ ءتوراعاسى مۇحاممەد ابۋناياندى قابىلداعانىن جازعان بولاتىنبىز.