پارا العان، ەسىرتكى ساقتاعان: ەلوردا اكىمدىگىنىڭ قىزمەتكەرى سوتتالدى
استانا. KAZINFORM - استانا قالاسى اكىمدىگىنىڭ قالالىق ورتا ساپاسى جانە باقىلاۋ باسقارماسىنىڭ ەڭبەك قاتىناستارى ءبولىمىنىڭ باس مامانى ت. پارا العان جانە ءىرى كولەمدە ەسىرتكى ساقتاعانى ءۇشىن سوتتالدى. ۇكىممەن كەلىسپەگەن سوتتالۋشى اپەللياتسيالىق شاعىم تۇسىرگەن.
استانا قالاسىنىڭ قىلمىستىق ىستەر جونىندەگى اۋدانارالىق سوتى 2024-جىلعى 24-قازاندا استانا قالاسى اكىمدىگىنىڭ قالالىق ورتا ساپاسى جانە باقىلاۋ باسقارماسىنىڭ ەڭبەك قاتىناستارى ءبولىمىنىڭ باس مامانى ت. -عا 15 ميلليون تەڭگە سوماسىندا ايىپپۇل تۇرىندەگى ۇكىم شىعاردى.
ول قىلمىستىق كودەكستىڭ 366-بابىنىڭ 2-بولىگى (پارا الۋ)، سونداي-اق 296-بابىنىڭ 3-بولىگى بويىنشا (ءىرى مولشەردەگى پسيحوتروپتىق زاتتىڭ انالوگى مەتكاتينوندى (ەفەدروندى) زاڭسىز يەمدەنگەن جانە ساقتاعان) كىنالى دەپ تانىلدى.
سونىمەن قاتار «م» ج ش س ديرەكتورى گ. قىلمىستىق كودەكستىڭ 367-بابىنىڭ 2-بولىگى بويىنشا لاۋازىمدى تۇلعاعا ءىرى مولشەردە پارا بەرگەنى ءۇشىن سوتتالىپ، 6,6 ميلليون تەڭگە سوماسىندا ايىپپۇل سالىندى.
- سونداي-اق سوتتالعاندارعا مەملەكەتتىك جانە كۆازيمەملەكەتتىك سەكتور سۋبەكتىلەرىندە لاۋازىمدى قىزمەت اتقارۋ قۇقىعىنان ءومىر بويىنا ايىرۋ تۇرىندەگى قوسىمشا جازا تاعايىندالدى. سوت ت. -نىڭ ەڭبەك قاتىناستارى ءبولىمىنىڭ باس مامانى، ياعني مەملەكەتتىك ەڭبەك ينسپەكتور بولا وتىرىپ، «م» ج ش س- عا قاتىستى بۇرىنعى جۇمىسشىسىنىڭ شاعىمى بويىنشا تەكسەرىس جۇرگىزبەگەنى جانە جاۋاپكەرشىلىككە تارتپاعانى ءۇشىن «م» ج ش س- ءنىڭ ديرەكتورى گ. -دان 250 مىڭ تەڭگە پارا العانى انىقتالدى، - دەلىنگەن ەلوردا سوتى شىعارعان ۇكىمدە.
ودان بولەك، ت. 2024-جىلعى شىلدەدە استانا قالاسىندا سالماعى 0,08 گرام (ءىرى مولشەر) مەتكاتينون (ەفەدرون) پسيحوتروپتىق زاتىنىڭ انالوگىن زاڭسىز ساتىپ الىپ، زاڭسىز ساقتاعان.
- سوتتالعان ت. -نىڭ ادۆوكاتى ۇكىممەن كەلىسپەي، اپەللياتسيالىق شاعىم ءتۇسىرىپ، تاعايىندالعان ايىپپۇلدىڭ مولشەرىن ازايتۋدى سۇرادى. استانا قالالىق سوتىنىڭ قىلمىستىق ىستەر جونىندەگى سوت القاسىنىڭ قاۋلىسىمەن تاعايىندالعان جازا قىلمىستىق كودەكستىڭ جالپى بولىگىنىڭ تالاپتارىنا سايكەس كەلەتىندىكتەن ءبىرىنشى ساتىداعى سوتتىڭ ۇكىمى وزگەرىسسىز، اپەللياتسيالىق شاعىم قاناعاتتاندىرۋسىز قالدىرىلدى، - دەپ حابارلايدى ەلوردا سوتىنىڭ باسپا ءسوز قىزمەتى.
ۇكىم زاڭدى كۇشىنە ەندى.
تاياۋدا قىزىلوردادا سوتتالعان ادامعا كامپيت ىشىنە جاسىرىلعان ەسىرتكى وتكىزبەك بولعان ازاماتشا ۇستالعان ەدى.
