ۋاقىت بەلدەۋىن زەرتتەۋگە 160 ميلليون تەڭگە جۇمسالماق

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ۋاقىت بەلدەۋىن وزگەرتۋدىڭ حالىق ومىرىنە اسەرىن زەرتتەۋگە قانشا قاراجات كەتەتىنىن ايتتى.

«ءۇش جىلدىق زەرتتەۋگە ءوتىنىم كەلىپ ءتۇستى. بيۋدجەتى - 160 ميلليون تەڭگە ال شىن جاعدايدا 90-100 ميلليون تەڭگە كەتەتىن شىعار دەپ ويلايمىن. ويتكەنى ءبىز كونكۋرس جاريالايمىز. كەشە جوعارى عىلىمي- تەحنيكالىق كوميسسيانىڭ وتىرىسى ءوتتى. كونكۋرس جاريالايمىز. ۇلتتىق عىلىمي كەڭەس زەرتتەۋدىڭ ناقتى قۇنىن انىقتايدى»، - دەدى ول ءماجىلىس وتىرىسىنان كەيىن جۋرناليستەردىڭ سۇراعىنا بەرگەن جاۋابىندا.

مينيستر زەرتتەۋگە ءوز مينيسترلىگى قاي تۇرعىدان اتسالىساتىنىن ايتتى.

«زەرتتەۋدىڭ الگوريتمىن، ەگجەي- تەگجەيىن بىلمەيمىن. ءبىراق گەوگرافيا، زوولوگيا ينستيتۋتتارى قاتىسادى»، - دەدى ساياسات نۇربەك.

ايتا كەتەيىك، ساۋدا جانە ينتەگراتسيا ءمينيسترى ارمان شاققالييەۆ ۋاقىت بەلدەۋىن قايتا قاراۋ تۋرالى ۇسىنىستارعا جاۋاپ بەرگەن بولاتىن.