ۋاقىت بەلدەۋىن اۋىستىرۋدىڭ سالدارى تۋرالى زەرتتەۋ نەگە اياقسىز قالدى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ۋاقىت بەلدەۋىن اۋىستىرۋدىڭ سالدارى تۋرالى زەرتتەۋدىڭ اياقسىز قالعانىن ءتۇسىندىردى.

- ۋاقىت بەلدەۋىن وزگەرتۋدىڭ قازاقستاندىقتارعا اسەرىن زەرتتەۋ ءۇشىن ءبولىنۋى كەرەك بولعان 60 ميلليون تەڭگە نەگە يگەرىلمەي قالدى، - دەپ سۇرادى جۋرناليست ۇكىمەت وتىرىسىنان كەيىن.

ءمينيستردىڭ ايتۋىنشا، بۇل ماسەلە بويىنشا ارنايى زەرتتەۋ جۇرگىزۋدىڭ قاجەتى جوق دەگەن شەشىم قابىلدانعان.

- ءبىز وعان قاجەت قاراجاتتى ماقساتتى قارجىلاندىرۋ اياسىندا سالدىق. بۇل - ءۇش جىلعا بەرىلەتىن ۇزاق مەرزىمدى گرانت. ءۇش جىل ەشكىم كۇتپەس ەدى دەپ ويلايمىن. زەرتتەۋ دەگەن تىم ۇزاققا سوزىلاتىن دۇنيە. ءتۇرلى مينيسترلىكتەگى ارىپتەستەرىمىزبەن وسى ماسەلە بويىنشا اقىلداسقان كەزدە قولىمىزعا كۇندەلىكتى ءتۇسىپ جاتاتىن دەرەكتەردىڭ نەگىزىندە زەرتتەۋ تۋرالى ۇسىنىس ايتىلدى. دەنساۋلىق ساقتاۋ مينيسترلىگى كلينيكالىق دەرەكتەردى، ەنەرگەتيكا مينيسترلىگى مەن اكىمدىكتەر حالىقتىڭ ەلەكتر قۋاتىن تۇتىنۋ كورسەتكىشتەرى تۋرالى دەرەكتەردى. ونەركاسىپ جانە قۇرىلىس مينيسترلىگى كاسىپورىنداردىڭ ەلەكتر تۇتىنۋ كورسەتكىشتەرىن بەردى دەگەندەي، - دەدى ول.

اتالعان ۆەدومستۆولار جۇرگىزگەن مونيتورينگتەردىڭ دەرەكتەرى ەندى ماجىلىستە تالقىلانباق.

- وسىنداي دەرەكتەر تۇرعاندا ءۇش جىل بويى جەكە زەرتتەۋ جۇرگىزۋدىڭ قانداي قاجەتى بار؟ ەندى وسى دەرەكتەردى ماجىلىسكە دە بەرەمىز. سوندىقتان ءۇش جىل كۇتۋدىڭ، وعان بولا بيۋدجەتتەن ارنايى اقشا ءبولۋدىڭ قاجەت جوق دەگەن شەشىم قابىلداندى، - دەدى ساياسات نۇربەك.

اتالعان ۇكىمەت وتىرىسىندا ساۋدا جانە ينتەگراتسيا ءمينيسترى ارمان شاققاليەۆ ەلدىڭ بىرنەشە وڭىرىندە جۇمىس ۋاقىتى العا جىلجىتىلۋى مۇمكىن ەكەنىن ايتتى.