ۋاقىت بەلدەۋى: ساۋالناما جۇرگىزىلەتىنى نەگە الدىن الا ايتىلمادى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ۋاقىت بەلدەۋىن وزگەرتۋدىڭ حالىق ومىرىنە اسەرىن زەرتتەۋ اياسىندا جۇرگىزىلگەن ساۋالناماعا تۇسىنىك بەردى.

«بۇل كەشەندى زەرتتەۋدىڭ ءبىر بولىگى عانا بولدى. الەۋمەت تانۋدا ساۋالناما جۇرگىزىلەتىنى الدىن الا ەسكەرتىلسە «سۋبەكتيۆتى ساۋالناما» دەگەن ۇعىم بار، بۇل ءانونيمدى ساۋالناما بولدى. الەمدە كوپتەگەن ساۋالناما بار جانە كوپ ادام ولاردى جۇرگىزىپ جاتقانىمىزدى بىلمەيدى. بۇل وبەكتيۆتىلىك پەن بەيتاراپتىقتى ساقتاۋ ءۇشىن قاجەت. داۋىس بەرۋ نەمەسە رەفەرەندۋم بولسا، الدىن الا جاريالانىپ، كۇن ءتارتىبى قويىلادى»، - دەپ ءتۇسىندىردى ساياسات نۇربەك ءماجىلىس وتىرىسى بارىسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

ءمينيستردىڭ ايتۋىنشا، eGov mobile قوسىمشاسىندا جاريالانعان ساۋالناماعا ءۇش كۇننىڭ ىشىندە 200 مىڭ ادام قاتىسقان.

«الەۋمەت تانۋدا رەپرەزەنتاتيۆتىلىك دەگەن ۇعىم بار، ياعني حالىقتىڭ بەلگىلى ءبىر پايىزى جاس جانە ايماقتىق نەگىزدە كەيبىر سۇراقتارعا جاۋاپ بەرسە، كوپ پىكىر بارىن كورسەتەدى. بۇل ساۋالناما تەك حالىقتىڭ شىنىمەن قاتىساتىنىن جانە ايتۋلى ماسەلە ەكەنىن انىقتاۋ ءۇشىن قاجەت بولدى»، - دەيدى ول.

سونداي-اق، ۆەدومستۆو باسشىسى ۋاقىت بەلدەۋىنە قاتىستى ۇكىمەتتىڭ سوڭعى شەشىم قابىلداعانىن ايتتى.

«ۋاقىت بەلدەۋى وزگەرىسىن زەرتتەۋ بۇل قازاقستاندىقتاردىڭ دەنساۋلىعىنا قانشالىقتى اسەر ەتەدى، جۇمىس كەستەسىن قانشالىقتى تۇزەتۋ قاجەتتىگىنە نازار اۋدارادى»، - دەپ قورىتىندىلادى س. نۇربەك.

بۇدان بۇرىن عىلىم جانە جوعارى ءبىلىم ءمينيسترى ساياسات نۇربەك ۋاقىت بەلدەۋىن وزگەرتۋدىڭ حالىق ومىرىنە اسەرىن زەرتتەۋگە قانشا قاراجات كەتەتىنىن ايتقان ەدى.