ۋاقىتتى كەرى قايتارۋ تۋرالى پەتيتسيا بويىنشا سوڭعى شەشىم ايتىلدى

استانا. KAZINFORM - ساۋدا جانە ينتەگراتسيا ءمينيسترى ارمان شاققاليەۆ «ۋاقىتتى كەرى قايتارۋ» پەتيتسياسى بويىنشا قانداي شەشىم قابىلدانعانىن مالىمدەدى.

«جۇمىس توبى ۇسىنعان بارلىق دەرەكتەر مەن دالەلدەمەلەردى، عىلىمي زەرتتەۋلەر مەن ۇسىنىمداردى زەردەلەي وتىرىپ، قازاقستان رەسپۋبليكاسىنىڭ ءبىرقاتار وڭىرلەرىن ءبىر ساعاتقا كەرى اۋىستىرۋ تابيعي كۇن تسيكلدەرىنە سايكەس كەلەتىنى جانە عىلىمي زەرتتەۋلەر مەن ۇسىنىمدارعا نەگىزدەلگەنى راستالدى. «UTC + 5» ۋاقىت بەلدەۋى قازاقستان رەسپۋبليكاسى اۋماعىنىڭ كوپ بولىگىندە تابيعي تسيكلگە بارىنشا جاقىن ستاندارتتى ۋاقىت بەلدەۋى بولىپ تابىلادى. ستاندارتتى ۋاقىت بەلدەۋىنىڭ وڭ اسەرى تۋرالى نەگىزدەلگەن حالىقارالىق عىلىمي زەرتتەۋلەردى جانە ۋاقىتتىڭ اۋىسۋى حالىقتىڭ دەنساۋلىعىنا كەرى اسەر ەتكەنىن راستايتىن دەرەكتەردىڭ بولماۋى نەگىزىندە ساۋدا جانە ينتەگراتسيا مينيسترلىگى پەتيتسيانى قاناعاتتاندىرۋدان باس تارتۋ تۋرالى شەشىم قابىلدادى»، - دەپ جازىلعان مينيسترلىك تاراتقان باسپا ءسوز-رەليزدە.

ارمان شاققاليەۆ دەنساۋلىق ساقتاۋ، وقۋ-اعارتۋ، عىلىم جانە جوعارى ءبىلىم مينيسترلىكتەرى «UTC + 5» ۋاقىت بەلدەۋىنىڭ حالىق دەنساۋلىعىنا قالاي اسەر ەتەتىنىن ءۇش جىل بويى زەرتتەۋدى ۇسىنعانىن ەسكە سالادى.

«ۇلتتىق ەكونوميكا جانە ەنەرگەتيكا مينيسترلىكتەرىنە جىلۋ ماۋسىمى مەن ماۋسىمدىق وزگەرىستەردى ەسكەرە وتىرىپ، وڭىرلەردە ەلەكتر ەنەرگياسىن تۇتىنۋعا مونيتورينگ جانە تالداۋ جۇرگىزۋ تاپسىرىلدى. ەڭبەك جانە حالىقتى الەۋمەتتىك قورعاۋ مينيسترلىگىنە ۇيىمدار مەن كاسىپورىندارعا كۇندىزگى ۋاقىتتى ەسكەرە وتىرىپ، جۇمىس كەستەسىن تۇزەتۋ مۇمكىندىگىن ءتۇسىندىرۋ ۇسىنىلدى. ءوتىنىش بەرۋشىنىڭ قابىلدانعان شەشىمگە قازاقستان رەسپۋبليكاسىنىڭ اكىمشىلىك راسىمدىك-ىس جۇرگىزۋ كودەكسىنىڭ 91-بابىنا سايكەس شاعىمدانۋىنا قۇقىعى بار»، - دەلىنگەن مينيسترلىك مالىمەتىندە.

اۆتور
ەسىمجان ناقتىباي