اقىن، جۋرناليست سەرىك بوقان قايتىس بولدى

استانا. قازاقپارات - اقىن ءارى جۋرناليست سەرىك بوقان ومىردەن ءوتتى. قايعىلى حاباردى اقىن توقتارالى تاڭجارىق الەۋمەتتىك جەلى ارقىلى جەتكىزدى.

«كەشىر، سەكە! اقىن دوسىمىز سەرىك بوقان قازا بولىپتى. مىنا ومىردە ەشبىر ەرەجە مەن تيىمعا باعىنۋعا بولمىسى ساي كەلمەيتىن جاندار بولادى. سەكەڭ، سەرىك بوقان سونداي جان ەدى. ول بۇل ءومىردىڭ قۋلىق-سۇمدىعىن ۇيرەنە الماي-اق كەتتى. باسىن تاۋعا دا، تاسقا دا ۇردى. اقىرى، دىننەن مارقادام تاپتى... بالكىم، تاپپادى. ءوزىن كوپ ىزدەدى. ءوزىن سىيلايتىن ورتانى كوپ ىزدەدى. جولى بولمادى. ۇنەمى تىعىرىققا تىرەلە بەردى. ءوزى دە مەنىڭ الدىمنان ءبىر كەتپەلتەك تومار كەتپەيدى دەۋشى ەدى. شىنىمەن، تاپ- تازا ەدى. تەز جارالانعىش ەدى. ونىسىن بىلدىرمەيتىن. ءوزىن دالەلدەگىسى كەلەتىن. دالەلدەي المادى. مىنا قوعامدا ونداي بولەك مىنەز، وزگە جاراتىلىس يەسىنە ورىن جوق ەدى. ءوزى دە توگىلىپ: «باياعى سول جىلدار نە دەگەن ىزگى ەدىڭ؟!» دەگەنىندەي، ول تەك بالالىق شاعىندا عانا باقىتتى بولعان شىعار. جازدا الماتىدا الدەبىر بازاردان كەزىگىپ قاپ، تەلەفون الماسىپ، حابارلاسىپ تۇرىپ ەدىك. ولەڭدەرىن سۇراعام. وسى الەۋمەتتىك جەلىدە ساعان ىزدەۋ سالايىن دەگەم. كەلىسكەن. ولەڭدەرىن جىبەرگەن. اڭگىمەلەسەيىكشى، تەك ادەبيەت تۋرالى دەگەن. مەنىڭ ءبىر ولەڭىمدى قاتتى ءسۇيىپ وقىعانىن ايتقان. امال نە، سول ولەڭدەرى ۋاتساپتىڭ قۋىسىندا قالىپتى. كوپ ولەڭى جوعالعان شىعار. ءاي، ساقتامادى-اۋ... رۋحىڭ شات بولسىن، دوسىم!» - دەپ جازدى ول.

 توقتار جاقاش ەسىمدى جەلى قولدانۋشىسىنىڭ دەرەگىنشە، سەرىك بوقان اياق استىنان قايتىس بولعان. قازىرگى مەكەن-جايى بورالداي كەنتى(الماتى وبلىسى)، اباي كوشەسى، 26-ءۇي ەكەن.

ايتا كەتەيىك، اقىن سەرىك بوقان قىتايدىڭ ساۋان اۋدانىندا تۋعان. ول ادەبيەت الەمىنە جاستايىنان ارالاسقان. «جاس قازاق ءۇنى» گازەتىندە، «ءۇن» جۋرنالى قاتارلى بىرنەشە مەرزىمدى باسىلىمدا جۇمىس ىستەدى. كەيىن «اسىل ارنا» تەلەارناسىندا جۋرناليست بولىپ قىزمەت ەتتى.