اقىلىن ساۋدالاعان «ينفوسىعاندار» تۋرالى بلوگەرلەر پىكىر ءبىلدىردى
«قازىر تەز بايۋدىڭ جولىن ۇيرەتەمىز، تۇرمىس تاۋقىمەتىنەن شىعاتىن جولدى كورسەتەمىز» دەيتىن موتيۆاتور-كوۋچ كوبەيگەن. ءبىراق ولاردىڭ ءبىلىم دەڭگەيىنە ءمان بەرىپ جاتقان ەشكىم جوق. ينستاوقىتۋشىلار ونسىز دا «شىقپا جانىم، شىقپالاپ» وتىرعان حالىقتى بوسقا اۋرەلەپ، سالماق سالىپ وتىرعان جوق پا دەگەن وي كەلەدى. جاقىندا جەلىدە وتىرىپ، «اقىلىن ساتاتىندارعا» قارسى ونلاين پەتيتسيا جاريالاندى. جەلى قولدانۋشىلارىنان وزدەرى ينفوسىعانعا بالايتىنداردىڭ اتىن اتاۋدى سۇراپ، ساۋالناما جۇرگىزىلگەن ەدى. ولاردىڭ اراسىندا ەسىمدەرى بىرنەشە رەت قايتالانعاندارى تابىلدى. وسى ورايدا Stan.kz ءتىلشىسى ينفوبيزنەستە جۇرگەن بلوگەرلەردەن «ينفوسىعاندار» اعىنى تۋرالى نە ويلايتىنىن سۇراپ كوردى.
پەتيتسيا اۆتورى سەرىك ابىشەۆ بۇگىندە رەسپۋبليكادا بلوگەرلەر مەن ىقپال ەتۋشىلەر كۇشەيىپ كەلە جاتقانىن، سونىڭ اياسىندا جوسىقسىز جالعان ساراپشىلاردىڭ قازاقستاندىقتارعا تىكەلەي ەفيردى ساتىپ جاتقانىن اتاپ ءوتتى. حالىق جەلىدە وتىرىپ، اقىل ساتاتىنداردى «ينفوسىعاندار» دەپ اتاپ كەتكەن.
«بۇل ادامدار وزدەرىن ساراپشى رەتىندە كورسەتىپ، پايداسىز عانا ەمەس، شىندىققا جاناسپايتىن، ءتىپتى زياندى اقپاراتتى ناسيحاتتايدى. سونىمەن قاتار، ەلىمىزدە ينفوسىعاننىڭ تارالۋى شىن مانىندە قۇندى اقپاراتتىق ءونىم بەرەتىن ناعىز ساراپشىلاردىڭ بەدەلىنە كەرى اسەرىن تيگىزۋدە. ولار وزدەرىن ينفوبيزنەسمەندەر، بيزنەس-جاتتىقتىرۋشىلار، جاتتىقتىرۋشىلار جانە موتيۆاتورلار رەتىندە كورسەتىپ، اۋديتورياعا قارجىلىق وسۋگە، رۋحاني اعارۋعا جانە كەرەمەت تابىس تابۋعا ۋادە بەرەدى.»، - دەيدى پەتيتسيا اۆتورلارى.
«تاڭداۋدى ادام ءوزى جاساۋى كەرەك»
بلوگەر وركەن كەنجەبەكتىڭ ايتۋىنشا، ينفوبيزنەس سالاسىنداعى ماسەلە بەلگىلى ءبىر توپتىڭ نارازىلىعىمەن شەشىلمەيتىن كورىنەدى.
«قازىر كىم نەگە قارسى بولماي جاتىر؟!. پەتيتسيا جاريالاۋ دەگەن سۇمدىق جاڭالىق ەمەس دەپ ويلايمىن. ءبىرى قولداسا، ەكىنشىسى داتتاپ جاتاتىنى بەلگىلى. ونىڭ ءارقايسىسىن باقىلاپ، نازار سالىپ وتىرۋ مۇمكىن ەمەس. ال مىنا ماسەلەدە نارىق شەشۋى كەرەك. قانداي دا ءبىر توپتىڭ نارازىلىعى، جەكە ادامنىڭ ايقايى ءتىپتى قول جيناۋى ماسەلەنى شەشپەيدى. پەتيتسيا جاريالاندى ەكەن دەپ ينفوبيزنەس سالاسى قۇلدىراپ كەتپەيدى. تاڭداۋدى ادام ءوزى جاساۋى كەرەك. ساپاسىز ساباقتاردى ساتىپ الماۋى كەرەك. ساپالى ادامنىڭ ساباعى ءارقاشان سۇرانىسقا يە. ونى كورگەسىن ساپاسىز كۋرس ساتاتىندار وزدەرى-اق شەتكە شىعىپ قالادى. نارىق رەتتەيدى دەگەن ءسوزىم وسى. بۇل جەردە اۋديتوريا ماڭىزدى ءرول اتقارادى. اقىلى راسىمەن ساپالى بولسا، ونى حالىق ىزدەپ ءجۇرىپ، اقشاسىن تولەپ ساتىپ الادى. سول كەزدە جارتى جولدان اقشا جاساپ جۇرگەندەردىڭ اۋزىنا قۇم قۇيىلادى»، - دەيدى بلوگەر.
«اقىلى ساباقتى حالىق كوپ سۇرايدى»
ال ءوزىن پسيحولوگ دەپ تانىستىرعان بالقيا بالتابايدىڭ ايتۋىنشا، اقىلى ساباققا قاتىساتىن حالىقتىڭ قاراسى كوپ كورىنەدى. يسلام شەڭبەرىندە تۇسىندىرەتىن پسيحولوگقا اقىلىن اقشاعا ساۋدالاعاندارعا ءدىن نە ايتادى دەپ سۇرادىق.
«مەن يسلامتانۋشى ەمەسپىن. كاسىبي ديپلومى بار پسيحولوگپىن. وسى سالادا بىرنەشە ديپلومىم مەن تاجىريبەم بار. سول تاجىريبەمە سۇيەنىپ ايتا الامىن. ودان كەيىن مەن وتە كوپ تەگىن ساباق بەرەتىن اداممىن. جەكە ارنامدا 200 دەن اسا تەگىن ۆيدەو-ساباقتارىمدى جۇكتەپ قويدىم. الەۋمەتتىك جەلىگە دە تەگىن ساباقتارىمدى جاريالاپ وتىرامىن. ال اقىلى ساباقتى حالىق ءوزى سۇرايدى. سولاردى ەسكەرىپ كەيدە اقىلى ساباق ۇيىمداستىراتىنىم راس.
ايتا كەتەيىن، مەندە بارلىعى زاڭدى. ودان كەيىن ونلاين عانا ساباق وتكىزبەيمىن. وففلاين، جەكە كەزدەسۋ ساباقتاردى دا جاسايمىن. مەن بارلىعىنىڭ اتىنان جاۋاپ بەرە المايمىن. ءوزىم 15 جىلدان بەرى پسيحولوگيا سالاسىندا جۇرگەسىن جانە حالىقتىڭ سۇرانىسىن قاناعاتتاندىرۋ ماقساتىندا ساباقتارىمدى وتكىزەمىن. حالىقتىڭ ءبىلىم الۋعا ىنتاسى مەن اقىلى ساباق ساتىپ الۋعا جاعدايىنىڭ جەتكەنى ءبىزدى قۋانتادى. تەگىن بەرە بەرسە ەكەن دەپ كەدەيلىك سانامەن ءومىر سۇرگەننەن گورى، حالىقتىڭ كوزى اشىلىپ، الەمدىك دەڭگەيدە ساۋاتتى بولعانى جاقسى ەمەس پە؟!. كەز كەلگەن دۇنيەنىڭ اقىسى بار. ۋنيۆەرسيتەتتەگى بىلىمگە دە اقشا جۇمسايتىنى سەكىلدى اقىلى ساباق ساتىپ الۋ دا ادامنىڭ وزىنە جانە بولاشاعىنا قۇيعان ينۆەستيتسيا ەكەنىن ءتۇسىنۋىمىز كەرەك»، - دەيدى كاسىبي پسيحولوگ.
پەتيتسيا جاريالانعان كۇنى الەۋمەتتىك جەلىدە ساۋالناما ۇيىمداستىرىپ، وقىرمانداردان كىمدەردىڭ ساباقتارىن ساتىپ الدىڭىزدار دەگەن سۇراق قويدىق. وقىرمان پىكىرى ەكىگە جارىلدى. ءبىرى پسيحولوگتاردىڭ ساباقتارىنان ناتيجە كورىپ، جەتىستىككە جەتسە، ەندى ءبىرى ءومىرىنىڭ ەش وزگەرمەگەنىن الدىعا تارتتى.
ءتىلشىمىز تىزىمدە اتالعانداردىڭ بارلىعىنا حابارلاسىپ، ەسىمدەرىنىڭ اتالۋ سەبەبىنە قاتىستى پىكىرىن بىلمەك بولدى. دەگەنمەن بلوگەرلەردىڭ كوپشىلىگى باستارىن الا قاشتى، نە مۇلدەم پىكىر بەرۋدەن باس تارتتى.
ساۋالناما پىكىرلەرىندە جەلى قولدانۋشىلارىنىڭ ءبىرى «ينفوسىعانداردىڭ تىزىمىنەن بولەك، ساباق ساتىپ العانداردىڭ ءتىزىمىن جاساساق ءبىر توم كىتاپ بولادى» دەپ جازدى.
«80 پايىز كوۋچتار مەن بلوگەرلەردىڭ ءبارى - ينفوسىعان. سولارعا اقشا تولەپ، ساباقتارىن ساتىپ الىپ جۇرگەندەر - قاراڭعى نادان ادامدار. ودان دا سول اقشاعا كىتاپ ساتىپ الىپ، وقىڭدار. سول كەزدە ساۋاتتارىڭ اشىلادى. ينفوسىعاندارعا اقشا تولەگەنشە بالا- شاعاڭا جۇمسا» دەيدى تاعى ءبىر جەلى قولدانۋشىسى.
«اينۇر تۇرسىنبايەۆا، ماقپال قاراتاي، قۇرالاي حانىم، ماماسيتا، گۇلزادا تۇرلاش، فاريزا تورەالىنىڭ ساباقتارى وتىرىك. ەشقانداي ناتيجە بەرمەيدى» دەپ اشۋلاندى ءبىر وقىرمان.
«ەمحانادا قابىلداۋىمدى كۇتىپ وتىرىپ، ءبىر اپايمەن تانىسىپ سويلەسىپ كەتتىك. كەلىنى ۇيدە بالامەن وتىر ەكەن، اينۇر تۇرسىنبايەۆانىڭ ساباعىن ساتىپ الادى ەكەن دە ستەناعا تابىسىم ءتورت ميلليون، كۇيەۋىمنىڭ تابىسى ەكى ميلليون دەپ جازىپ قويىپ قوزعالماي جاتقانىنا ءتورت جىل بولدى دەيدى. جاسسىڭدار عوي سەندەر سونداي ساتىپ الاسىڭدارما دەپ سۇراپ جاتىر»، - دەيدى كەزەكتى جەلى قولدانۋشىسى.
