اقمولا وبلىسىندا تۇرعىن ءۇي كەزەگىندە 9 قايتىس بولعان جانە جىلجىمايتىن مۇلكى بار ادامدار تۇرعان
استانا. KAZINFORM - ستەپنوگورسك قالاسىندا تۇرعىن ءۇي كەزەگىندە تۇرعان ازاماتتارعا جۇرگىزىلگەن تالداۋ بارىسىندا 9 قايتىس بولعان ادام جانە قالادان كوشىپ كەتكەن 14 تۇرعىن انىقتالىپ، كەزەكتەن شىعارىلدى، دەپ حابارلايدى اقمولا وبلىسىنىڭ پروكۋراتۋراسى.
ستەپنوگورسك قالاسىنىڭ پروكۋراتۋراسى حالىقتىڭ الەۋمەتتىك وسال توپتارى ساناتى بويىنشا تۇرعىن ءۇي ەسەبىنە تالداۋ جۇرگىزدى.
كەزەكتە 1095 ازاماتتىڭ تۇرعانىنا قاراماستان، تالداۋ بارىسىندا 2023 -جىلدان باستاپ كەزەكتە تۇرعان 9 قايتىس بولعان ادام انىقتالدى. سونىمەن قاتار قالادان كوشىپ كەتكەن جانە تۇرعىن ءۇي ەسەبىندە ودان ءارى بولۋ نەگىزدەرىنەن ايىرىلعان 14 تۇلعا بەلگىلى بولدى.
بۇدان بولەك، مەنشىگىندە جىلجىمايتىن مۇلكى بار تۇلعالاردىڭ تۇرعىن ءۇي كەزەگىندە تۇرعانى انىقتالدى. قابىلدانعان شارالار ناتيجەسىندە اتالعان تۇلعالار كەزەكتە تۇرعاندار تىزىمىنەن شىعارىلدى.
سونداي- اق پروكۋراتۋرا تۇرعىن ۇيگە مۇقتاج ازاماتتاردىڭ ەداۋىر سانىنا قاراماستان، ۇزاق ۋاقىت بويى ناقتى بوس تۇرعان بوساتىلعان تۇرعىن ءۇي-جايدىڭ پايدالانىلماۋ فاكتىسىن انىقتادى.
پروكۋرورلىق ارالاسۋ ناتيجەسىندە پاتەر كەزەكتە تۇرعاندار اراسىندا ودان ءارى ءبولۋ ءۇشىن بەرىلدى. انىقتالعان بۇزۋشىلىقتار بويىنشا كىنالى لاۋازىمدى تۇلعا جاۋاپقا تارتىلدى.
