اقمولا وبلىسىندا جاڭا كولىكتەر تيەلگەن ەكى جۇك كولىگى جول اپاتىنا ءتۇستى
استانا. قازاقپارات - اقمولا وبلىسىندا 15 جاڭا كولىك تيەلگەن ەكى ارنايى جۇك كولىگى جول اپاتىنا ۇشىرادى.
اقمولا وبلىسى پ د مالىمەتىنشە، جول اپاتى 13-قاراشادا استانا - اتباسار - جاقسى تاسجولىنىڭ 131-شاقىرىمىندا بولعان. الدىن الا مالىمەت بويىنشا شەتەلدىك جۇرگىزۋشىلەر تىزگىندەگەن جۇك كولىكتەرى قورعاستان رەسەي فەدەراتسياسىنا باعىت الىپ، ءىرى كولىك پارتياسىن تاسىمالداپ بارا جاتقان.
«قوزعالىس كەزىندە ءبىرىنشى جۇك كولىگىنىڭ جۇرگىزۋشىسى جولداعى كوكتايعاققا بايلانىستى تىزگىنگە يە بولا الماي قالعان. سالدارىنان كوپ توننالىق فۋرالار جول جيەگىنە شىعىپ كەتىپ، اۋدارىلدى. جول اپاتى سالدارىنان زارداپ شەككەندەر جوق»، - دەدى پوليتسياداعىلار.
جۇك كولىگىنىڭ جۇرگىزۋشىسىنە قاتىستى اكىمشىلىك حاتتاما تولتىرىلدى.
پوليتسيا جۇرگىزۋشىلەردى جول ءجۇرۋ ەرەجەلەرىن ساقتاۋعا، اسىرەسە، ءىرى گاباريتتى كولىكتەردى تىزگىندەۋ كەزىندە مۇقيات بولۋعا شاقىردى.
قىستا جولداردا كوكتايعاق بولعان كەزدە جول اپاتى قاۋپى ارتادى. جۇرگىزۋشىلەرگە جىلدامدىقتى ازايتۋ، قاۋىپسىز اراقاشىقتىقتى ساقتاۋ، شۇعىل تەجەۋ مەن مانيەۆر جاساۋدان اۋلاق بولۋ، سونداي-اق، جازعى دوڭگەلەكتەردى قىسقىسىنا ۋاقتىلى اۋىستىرۋ ۇسىنىلدى.
