ۋاقتىلى ەسكەرتۋ اۋىل تۇرعىنىن ينتەرنەت-الاياقتاردىڭ اككى ارەكەتىنەن قۇتقاردى

мобильді аударым
فوتو: ق ر قارجى مينيسترلىگى

پەتروپاۆل. KAZINFORM - ۋچاسكەلىك ينسپەكتوردىڭ ۋاقتىلى ەسكەرتۋى س ق و مامليۋت اۋدانىنداعى افونكينو اۋىلىنىڭ تۇرعىنىن ينتەرنەت-الاياقتاردىڭ اككى ارەكەتىنەن قۇتقاردى.

WhatsApp قوسىمشاسىنداعى اۋىل چاتىندا وتىرعان پوليتسيا مايورى رۋستام ۆاليەۆ كيبەرقىلمىستاردىڭ قاۋپى تۋرالى پروفيلاكتيكالىق بەينەروليكتەر مەن جادىنامالاردى ءجيى تاراتىپ وتىرادى.

وسىنداي كەزەكتى بەينەروليكتى جىبەرگەننەن كەيىن اۋىل تۇرعىندارىنىڭ بىرىنەن «ۋاقتىلى اقپارات جىبەرىپ وتىراتىن ءبىزدىڭ ۋچاسكەلىك پوليتسيا ينسپەكتورىنا راحمەت. جاڭا عانا ماعان ۆاتساپقا انىقتاۋ بولىمىنەنبىز دەگەن الدەبىرەۋلەر حابارلاستى» دەپ جازىلعان حابارلاما كەلىپ تۇسكەن.

ايەلدىڭ داۋىستاپ جازعان حابارلاماسىنا سايكەس، وعان بەيتانىس بىرەۋلەر حابارلاسىپ، ونىڭ تۋىسى جول-كولىك وقيعاسىنا تۇسكەنىن ايتقان.

«الاياقتار ەكەنى بىردەن ويىما كەلمەدى. تۇتقانىڭ ارعى جاعىندا پوليتسياداعى سياقتى شۋلاپ جاتقان داۋىستار شىعىپ جاتتى. مەنىڭ جەكە دەرەكتەرىمدى ايتىپ بەردى. ەگەر ءسىز جىبەرگەن ۆيدەونى كورمەگەندە، الاياقتارعا سەنىپ قالار ەدىم»، - دەيدى ايەل.

مۇنداي سحەما ارقىلى ادامداردى الداۋ كەڭىنەن تارالعان. پوليتسيانىڭ اتىن جامىلعان قاسكويلەر جول اپاتىنان زارداپ شەككەن ادام اقشا السا، ارىز جازباۋى مۇمكىن ەكەنىن العا تارتادى. تەلەفون ارقىلى «اناشىم، كومەكتەسشى!» دەگەن جىلامسىراعان داۋىستى قوسۋى مۇمكىن. ادەتتە، سۇراتقان اقشالارىن وزدەرىنىڭ جىبەرگەن ادامدارى - دروپپەر ارقىلى الدىرتادى.

«قاڭتار ايىندا مامليۋت اۋدانىندا ينتەرنەت-الاياقتىقتىڭ 2 فاكتىسى تىركەلدى، ەكەۋى دە وسىنداي سەناري ارقىلى جاسالدى، - دەيدى اۋداندىق پوليتسيا ءبولىمىنىڭ باستىعى پوليتسيا پولكوۆنيگى پەتر كليموۆ.

ونىڭ ايتۋىنشا ازاماتتاردان الاياقتاردىڭ قۋلىقتارىنا الدانباعانى تۋرالى حابارلامالار ءجيى كەلىپ تۇرادى.

«بۇل - تۇرعىنداردىڭ پوليتسيا قىزمەتكەرلەرىنىڭ اقپاراتىنا دەن قويىپ، تۇسىنگەنىن كورسەتەدى. ينتەرنەت-الاياقتىق - بۇگىنگى تاڭداعى وزەكتى تاقىرىپتاردىڭ ءبىرى. بۇنى جۋىردا جەرگىلىكتى اتقارۋشى ورگانداردىڭ، پروكۋراتۋرا مەن جۇرتشىلىقتىڭ قاتىسۋىمەن وتكەن ۆەدومستۆوارالىق كوميسسيادا تالقىلادىق. بارىنشا كوپ ادامدى قاتۋ ءۇشىن بىرلەسكەن پروفيلاكتيكالىق جۇمىستاردى كۇشەيتۋ تۋرالى ءبىرقاتار شەشىمدەر قابىلداندى. ويتكەنى الاياقتىقتىڭ قاۋپىنەن حاباردار ادام عانا ءوز-ءوزىن قورعاي الادى»، - دەيدى پوليتسيا پولكوۆنيگى پەتر كليموۆ.

سوڭعى جاڭالىقتار