اقتوبەلىكتەر شىندىقتى جاقسى كورەدى، تالاپشىل - وبلىس اكىمى اسحات شاحاروۆ
اقتوبە. KAZINFORM - سۋ تاسقىنىنان زارداپ شەككەن اقتوبەلىكتەردىڭ ءبارى 15-قىركۇيەككە دەيىن جاڭا ۇيگە قانىستانۋى ءتيىس. ال بۇزىلعان بوگەتتەردى جوندەۋ جۇمىسى قاراشاعا دەيىن سوزىلادى. جارامسىز بولىپ قالعان 47 شاقىرىم جول قالپىنا كەلتىرلىپ جاتىر. ال پونتون كوپىرمەن قاتىنايتىن ويىل تۇرعىندارى بولسا، كەلەر جىلدى كۇتەدى. مۇنداعى قۇرىلىس بيىل اياقتالمايدى. اقتوبە وڭىرىنە اكىم بولىپ تاعايىندالعان اسحات شاحاروۆ ءبىر جىلدا ءبىرتالاي قيىندىققا تاپ بولدى. Kazinform تىلشىسىنە بەرگەن سۇحباتىندا جەكە وي-پىكىرىمەن دە ءبولىستى.
- وسىدان تۋرا ءبىر جىل بۇرىن پرەزيدەنت ەلىمىزدىڭ ەڭ ۇلكەن ءارى ءوندىرىستى ايماعىنىڭ ءبىرى سانالاتىن اقتوبەگە اكىم ەتىپ تاعايىندادى. ايتىڭىزشى، بيلىك باسىندا وتىرعان، وبلىس باسقارعان قالاي ەكەن؟
- ەڭ ءبىرىنشى - زور سەنىم جانە اسقان جاۋاپكەرشىلىك. ءوزىڭىز دۇرىس ايتتىڭىز، بۇل - ۇلكەن ءوڭىر، وندىرىستىك ءوڭىر. كۇتەتىنىمىز مول. سەبەبى، رەسپۋبليكالىق دەڭگەيدەگى كورسەتكىشتەر، كوپ كورسەتكىش ءبىزدىڭ وڭىرگە بايلانىستى. بۇل - جاۋاپكەرشىلىك. ارينە، وسى قىزمەتتە بولۋ - زور مارتەبە. مەنىڭ ويىم - سەنىمدى اقتاۋ جانە وسى ءوڭىردىڭ الەۋەتىن ارتتىرۋ.
اقتوبەلىكتەر - قالىپتاسقان قالىڭ ەل. ءوز مەنتاليتەتى بار، قاي كەزدە دە شىندىقتى جاقسى كورەدى، تالاپشىل. ەرتەڭ ەمەس، بۇگىن زامانعا ساي ءومىر سۇرگىسى كەلەدى. ءبىز سوعان لايىقتى بولۋعا تىرىسامىز. تالاپ بولعان سوڭ وزىمنەن باستاپ تاجىريبە، تاربيە دە الامىز، جاڭا مۇمكىندىكتەر اشامىز. دەر كەزىندە ورىندالماسا شىدامدىلىق، سابىرلىق تانىتۋعا شاقىرامىز. كەيدە ۇيىمداستىرۋعا قارجى، زاڭ تالاپتارى كەدەرگى بولىپ جاتادى. وندايدا كەرى بايلانىس ورناتىپ، قاي ستاتۋستا ەكەنىن ايتۋ - ءبىزدىڭ مىندەتىمىز. بىرگە جۇمىس ىستەيىك. كوپ جەرگە بارعاندا، حالىقپەن كەزدەسكەندە بىرگە جۇمىس ىستەۋىمىز كەرەك دەپ ايتامىن. ءالى دە ناتيجەلى جۇمىستار الدا دەپ ويلايمىن. جوسپارىمىز بار.
- وسى جىل ىشىندە كوپ وقيعا بولدى وڭىردە. قىستا قارلى بوران ابىگەرگە سالدى، كوكتەمدە سۋ تاسقىنى تىعىرىققا تىرەدى...
- جىل وڭاي بولعان جوق. دەگەنمەن جىل ءالى دە اياقتالمادى. كوپتەگەن قيىندىقتى كوردىك. قىستا كۇرەتامىر جولىمىز جابىلىپ، 6 مىڭنان استام كولىك، مىڭداعان ادام جولدا قالدى. ول كەزدە مەملەكەتتىك ورگاندار، قۇتقارۋشىلار، ەرىكتىلەر ءبىراز جۇمىس اتقاردى. جالپى وڭىردە ەكى رەت توتەنشە جاعداي جاريالاندى. قىستا جانە سۋ تاسقىنى كەزىندە. سۋ دەڭگەيى كوتەرىلىپ، اۋداندار، قالاداعى سۋ ارناسىندا تۇرعان ۇيلەر زارداپ شەكتى. بارلىعى 4 مىڭنان استام ءۇي زارداپ شەكتى. 3087 ءۇيدى قالپىنا كەلتىرۋگە وتەماقى بەرىلدى. ال 1020 ءۇي جارامسىز بولىپ قالدى. كوميسسيا شەشىمىنەن سوڭ جاڭا ءۇي ساتىپ الۋ نەمەسە قۇرىلىس-مونتاج جۇمىستارىن جۇرگىزۋ قاجەت بولدى. قازىر قۇرىلىس- مونتاج جۇمىستارى %90-95 اياقتالدى. اباتتاندىرۋ جۇمىسى، ينفراقۇرىلىم، جول دا سالىنىپ جاتىر. قارجى رەسپۋبليكالىق جانە وبلىستىق بيۋدجەتتەن ءبولىندى. جۇمىس جالعاسادى.
- تاسقىن كەزىندە ەڭ كوپ زارداپ شەككەن اۋداندار - ىرعىز جانە ويىل. ەكى اۋداندا دا ءبۇتىن ءبىر اۋىلدىڭ تۇگى قالمادى دەسەك بولادى. ەكى اۋىلداعى قۇرىلىس قالاي ءجۇرىپ جاتىر. كۇز دە كەلدى، ادامدار جاڭا ۇيىنە قاشان قونىستانادى؟
- ىرعىز اۋدانىنداعى نۇرا اۋىلى سۋ استىندا قالدى. حالىقپەن اقىلداسا وتىرىپ، شەشىم قابىلدادىق. بۇل جۇمىس كەشتەۋ باستالدى. نەلىكتەن؟ سەبەبى، 12 مەملەكەتتىك ورگاننان ءبىز كەلىسىم الۋىمىز كەرەك بولدى. مۇنداعى قۇرىلىس جۇمىستارى ماۋسىم ايىندا باستالدى. قازىرگى تاڭدا 63 ءۇي، امبۋلاتوريا، جاڭا مەكتەپ سالىنىپ جاتىر. سۋ، گاز، جارىقتاندىرۋ، جول ماسەلەسى شەشىلەدى. حالىق ودان حاباردار. سونىمەن بىرگە ويىل اۋدانى ەكپەتال اۋىلى تولىقتاي كوشتى. ويىل اۋدانى بويىنشا 310 ءۇي زارداپ شەكتى. سونىڭ 135 ىن ساتىپ الدى. قالعان ۇيلەردى سالۋعا شەشىم قابىلداندى. قازىرگى تاڭدا اۋداندا 70 ءۇي تاپسىرىلدى. 15 ى قىركۇيەككە دەيىن قالعانىن تاپسىرامىز.
- اقتوبە ءۇشىن ەڭ وزەكتى ماسەلە - جول. وسى جولىمىزدى كوكتەمدە سۋ شايىپ، بىرنەشە اۋدان، اۋىلعا قاتىناس ءۇزىلدى. شىعىنى قانشا؟ قالپىنا قاشان كەلەدى؟
- بايلانىس - وتە ماڭىزدى قاجەتتىلىك، سونىڭ ىشىندە - جول. قاتىناس بولماعاندا ازىق-تۇلىك، ءدارى- دارمەك جەتكىزۋ قيىنعا سوقتى. ءبىراق سوعان قاراماستان ءبىز ونى تولىقتاي ورىنداپ كەلدىك. ستاتيستيكا بويىنشا جول شايۋ جانە قاتىناستىڭ ءۇزىلۋى بويىنشا 51 فاكتى تىركەلدى. كەيىن جوبالاۋشى كومپانيالار ءوز جۇمىسىن اتقاردى. بارلىعى 47 شاقىرىم جولدى جوندەۋگە كىرىستىك. سونىڭ ىشىندە 23 كوپىر بولدى. ۇكىمەت رەزەرۆىنەن 10 ميلليارد ت گ، جەرگىلىكتى بيۋدجەتتەن 6 ميلليارد تەڭگە ءبولىنىپ، جۇمىستىڭ 50 پايىزى اياقتالدى. قاراشا ايىنا دەيىن تولىقتاي اياقتايمىز دەپ جوسپارلاپ وتىرمىز.
- ويىلدىڭ كوپىرى قولدانىسقا بەرىلە مە؟
- جوبانى تولىقتاي اياقتاي المايمىز. جانىنا قاتىناس ءۇشىن جول سالىندى. كوپىر جوندەپ جاتقان مەردىگەر - تاجىريبەسى مول اتىراۋلىق كومپانيا. كەلىسىمشارتقا قول قويىلدى، قاجەتتى ماتەريالدارىن ساتىپ الىپ جاتىر.
- وڭىردە ءالى دە قايىقپەن قاتىناپ جۇرگەن اۋىل تۇرعىندارى بار. ول - ىرعىز اۋدانى جايساڭباي اۋىلى. مۇنداعى قاتىناستى قالپىنا كەلتىرۋ ءۇشىن نە ىستەلەدى؟
- ارنايى كوميسسيا قۇرىلىپ، ماماندار شەشىم قابىلدايدى. ءبىز ۇيىمداستىرىپ، قارجىلىق قولداۋ كورسەتەمىز. بۇل اۋىل جەكە باقىلاۋىمدا. مۇندا 700 تۇرعىن بار. ارال بولىپ قالعانىن بىلەسىزدەر. ەكى جاقتان سۋ ءوتىپ كەتتى. قازىرگى تاڭدا كوپىر سالۋعا مۇمكىندىك جوق. بىرنەشە رەت ارەكەت جاسادىق، ءبىراق ناتيجە بەرمەدى. سۋ اعىسى ءالى دە بار. سۋ اعىسى باسەڭدەسە، ءبىر-ەكى جەردى ماماندار قايتا قارايدى. ءتيىستى قۇرال-جابدىقتى دايىنداپ قويدىق. قالاي مۇمكىندىك بولادى، قۇرىلىستى سول كەزدە جۇرگىزەمىز. تۇرعىنداردىڭ وتىن، مال ازىعى ماسەلەسى جەكە باقىلاۋىمدا. حالىققا قولداۋ بولادى.
- تاسقىن كەزىندە زارداپ شەككەن تەك قاراپايىم تۇرعىندار ەمەس، اراسىندا كاسىپكەرلەر دە بار. ولاردىڭ شىعىنى قانشا، قارجى ءبولىندى مە؟ كوبىنە قاي كاسىپ ءتۇرى زارداپ شەكتى؟
- پرەزيدەنت بارلىعىنا كومەك كورسەتۋدى تاپسىردى. سونىڭ ىشىندە - كاسىپكەرلەرگە. ءبىزدىڭ وڭىردە 63 نىسان زارداپ شەكتى. ونىڭ 41-ىنە رەسپۋبليكالىق بيۋدجەتتەن 1,5 ميلليارد تەڭگە ءبولىندى. ءبىراق وعان دا كوميسسيا قورىتىندىسىنان سوڭ بەرىلەدى. قازىرگى تاڭدا 410 ميلليون تەڭگە قارجى اۋدارىلىپ، شىعىنى وتەلدى. ەشكىم تىس قالمايدى.
- تاعى ءبىر سۇراق، شارۋالارعا قاتىستى. ولار ءالى كۇنگە دەيىن قىستاق پەن ونداعى ۇيلەرىنىڭ شىعىنىن وتەي الماي ءجۇر. وعان نە كەدەرگى؟
- بىزدە 106 اۋىل شارۋالىعى قۇرىلىمى زارداپ شەكتى. بەكىتىلگەن ەرەجە بويىنشا بيۋدجەتتەن تولەي المايمىز. دەمەك بيۋدجەتتەن تىس قور ارقىلى وتەلەدى. قازىر تۇرعىن ءۇي قۇرىلىسى جۇمىسى اياقتالىپ كەلەدى. ونى تولىق اياقتايتىن قارجىنى ءبولىپ قويدىق. ەندى اۋداندىق كوميسسيا شەشىمى بويىنشا قوجالىقتاردىڭ شىعىنى وتەلەدى. تەك كوپ قوجالىقتىڭ ءبىرقاتار قۇجاتى نەمەسە مۇلدە قۇجاتى جوق. قىستاقتاعى قورا نەمەسە ۇيلەردى ەسەپتەگەندە 165 نىسان زارداپ شەككەن ەكەن.
- بۇل اپاتتان قانداي ساباق الدىڭىز؟ سۋ تاسقىنى بولعان، جەرگىلىكتى دەڭگەيدە توتەنشە جاعداي جاريالانعان 6 اۋدان مەن اقتوبە قالاسىندا بوگەتتەر سالىنىپ جاتىر ما؟
- جالپى 22 بوگەت پەن سۋ قويماسى مينيسترلىكپەن بەكىتىلدى. ودان بولەك سۋ شايعان، مول سۋدى ۇستاي الماي بۇزىلعان 15 بوگەت بار. بىردەن وبلىستىق بيۋدجەتتەن 1,9 ميلليارد تەڭگە، رەسپۋبليكالىق بيۋدجەتتەن 2,8 ميلليارد تەڭگە قارجى ءبولىندى. ول جۇمىستار قارقىندى ءجۇرىپ كەلەدى. وسى سالاعا جەتەكشىلىك ەتەتىن ورىنباسارىم قاراپ، باقىلاپ ءجۇر. جۇمىس قاراشا ايىندا تولىق اياقتالادى.
- سۋ قويمالارى تۋرالى ايتساڭىز...
- ءبىزدىڭ جانە رەسپۋبليكالىق تەڭگەرىمدەگى نىساندار، مينيسترلىك دەڭگەيىندە قارعالى، اقتوبە، سازدى سۋ قويماسى جوندەلەدى. جىل سوڭىنا دەيىن اياقتالادى دەگەن جوسپار بار.
- جول جايىنا قايتا ورالساق، قازىر بىزدە ەڭ قاۋىپتى ايماق، ءتىپتى ءولىم ءجيى تىركەلەتىن باعىت ول - سامارا- شىمكەنت تاسجولىنىڭ اقتوبە- حرومتاۋ- قارابۇتاق باعىتى. وسى جولدىڭ قۇرىلىسى باستالدى. ونى ىجداعاتتاپ اياقتاۋدىڭ، قولدانىسقا بەرۋدىڭ امالى بار ما؟ قۇرىلىس قاي ۋاقىتتا اياقتالادى؟
- رەسپۋبليكالىق جولدار باقىلاۋدا ەكەنىن بىلەسىزدەر. پرەزيدەنت جولداۋىندا قاندىاعاشتىڭ جولىن اتاپ ءوتتى. ول جىلدىڭ اياعىنا دەيىن اياقتالادى. ەكى جولاقتى اينالما جولى قولدانىسقا بەرىلدى. ەندى كۇردەلى بولىپ تۇرعانى - حرومتاۋ- ۇلعايسىن باعىتىنداعى قارابۇتاققا دەيىنگى جول. 262 شاقىرىم جول 4 جولاقتى ءبىرىنشى دەڭگەيدەگى جول بولادى.
مينيسترلىك جوبالىق-سمەتالىق قۇجات دايىندادى. «قازاۆتوجول» ا ق-نىڭ تەڭگەرىمىندە بولعانىمەن بۇل جۇمىستار تىكەلەي ءوزىمنىڭ باقىلاۋىمدا جانە ءوزىم ارالاسىپ، بارلىق قادامدى قاراپ وتىرمىن. 7 ۋچاسكەنىڭ ءبىر ۋچاسكەسىنە قارجى ءبولىندى، مەردىگەر جۇمىستى باستادى.
قالعان 6 ۋچاسكەنىڭ بىرەۋىنە ساراپتاما قۇجاتى دايىندالدى. بيىل تەندەر ويناتىلادى. ال قالعانى كەلەر جىلى شەشىلەدى.
بۇل تاۋلىگىنە 3 مىڭ كولىك جۇرەتىن جول، قازىر 15-16 مىڭ كولىك جۇرەدى. جول اپاتىن بولدىرماۋ ءۇشىن پوليتسيا ارنايى قىزمەتكەرلەرىن قويىپ، 50-100 جۇك كولىگىن ءبىر قاتارعا الىپ، ىلەسىپ جۇرەدى. باسقا امالىمىز جوق. 4 جولاقتى جولدى تاپسىرعانشا وسىلاي باقىلاۋدا بولادى جانە كۇتىپ ۇستاۋ كەرەك. مينيسترلىك بيىل 3 ميلليارد تەڭگەدەن استام قارجى ءبولدى. مەنىڭ ويىم، سالىستىرمالى تۇردە جاعدايى جاقسارىپ كەلەدى. ءبىراق 2 جولاقتى بولعان سوڭ جۇرگىزۋشىلەر شىداماي، قارسى جولعا شىعادى. سونىمەن بىرگە جول بويىنداعى ۇيالى بايلانىس ماسەلەسىن شەشۋ ءۇشىن وپەراتورلار ستانسالاردى قويىپ، ينتەرنەت جەلىسىن تارتۋعا كىرىستى. كەلەر جىلى تولىق شەشۋگە ۋادەسىن بەرىپ وتىر.
- ءسىز تاعايىندالعان كەزدە «ساقالدى قۇرىلىستار» ماسەلەسىن شەشۋ تاپسىرىلعان ەدى. تۇرعىن ءۇي، الەۋمەتتىك نىسانداردىڭ كەشەۋىلدەگەن جۇمىسى قايتا جانداندى ما؟ وعان قانشا قارجى باعىتتالدى؟
- 17 قۇرىلىس بار توقتاپ قالعان. 2018 -جىلى باستالعان الەۋمەتتىك نىساندار دا بار. ءبىز بىلتىر ولاردى ارالاپ شىقتىق. ءبارىن كوزبەن كوردىك. ناتيجەسىندە 17 قۇرىلىستىڭ 10 ى تولىق اياقتالىپ، قولدانىسقا بەرىلدى. تاعى ۇشەۋى جىل سوڭىنا دەيىن اياقتالادى. ال ۇشەۋى كەلەر جىلى قولدانىسقا بەرىلەدى. تاعى بىرەۋى - ينفەكتسيالىق اۋرۋحانا. ول كەرەك پە، كەرەك ەمەس پە دەگەن سۇراق بار. مينيسترلىكپەن اقىلداسىپ، شەشىم قابىلدانادى.
- ەكونوميكامىزدىڭ جايى قالاي؟ قاي سالادا ءوسىم بار، قاي سالا اقساپ تۇر؟
- بىزدە 7 كورسەتكىش بار. سونىڭ بەسەۋىندە كورسەتكىش جاقسى، %100 اسىپ تۇر. اقساپ تۇرعانى - ءۇي قۇرىلىسى. ءۇي قۇرىلىسى كوبىنە كۇزدە تاپسىرىلادى. دەمەك جىل سوڭىنا دەيىن جوسپارعا ساي بولادى. جەتىنشى كورسەتكىش - ينۆەستيتسيا. جىل سايىن ونىڭ كولەمى ارتىپ كەلەدى. تريلليون تەڭگە بولسا، وسى كورسەتكىشتى ۇستاپ تۇرۋ وڭاي ەمەس. بىلتىر، ونىڭ الدىندا باستالعان جوبالار بار. قارجىلاندىرۋ ماسەلەسى ءارتۇرلى دەڭگەيدە. پرەزيدەنت تاپسىرماسى اياسىندا پروكۋراتۋرامەن بىرگە «جاسىل ءدازىل» جوباسى قولعا الىندى. ەكى جاقتان كومەك بەرىپ، اكىمشىلىك كەدەرگىلەردى جويۋدى قولعا الدىق. ءوز ناتيجەسىن بەرىپ، جىل سوڭىنا دەيىن %100 كورسەتكىشكە جەتكىزۋ ويدا بار. ءوڭىردىڭ الەۋەتى وتە مول. سوعان بايلانىستى شەتەلدىك كومپانيالار كەلىپ، ءوز ويىن ايتادى. ەركىن ەكونوميكالىق ايماقتى دامىتۋ جوسپارىمەن ءتورتىنشى مۋلتيمودالدىق اەروپورت سالۋ تاپسىرماسى اياسىندا 800 گەكتار جەر بەلگىلەندى. ماسەلەن، «قازپوشتا» ا ق-مەن ارادا كەلىسىم ءجۇرىپ، لوگيستيكالىق ورتالىق قۇرىلىسى باستالماق. ورتالىقتى تۇرىك ەلىنىڭ كومپانياسى سالادى. بۇل دامۋعا سەرپىلىس بەرەدى دەپ ويلايمىز.
- اۋىل شارۋاشىلىعىنا ويىسساق، بىلتىر بيداي ساباعىنان كوكتەپ، شارۋالار ابىگەرگە ءتۇستى. بيىل استىق شىعىمى قالاي؟ شارۋالار دەر كەزىندە ەگىن ورۋ جۇمىسىن اياقتاي الا ما؟
- جىل وتە جاقسى. ۋاقتىلى جاڭبىر جاۋدى، ءتيىستى قۇرىلىمدار شارا قابىلدادى. 400 مىڭ گەكتار القاپقا ءداندى- داقىل ەگىلدى. قازىر ەگىن ورۋ جۇمىسى باستالدى. بارلىعى %25 جينالدى. 177 مىڭ توننا استىق قامباعا ءتۇستى. باستى ماقساتىمىز - قىركۇيەك ايىندا جيناپ الۋ. 1500 كومباين القاپتا ءجۇر. ناتيجە بولادى دەپ ويلايمىن. قازىر گەكتارىنان 13 تسەنتنەر دەپ كورسەتىپ تۇر. مەن ويلايمىن 17-18 سەنرتنەر بولادى.
- كەشەگى جولداۋىندا پرەزيدەنت «كورپەگە قاراي كوسىلۋ» قاجەتتىگىن ەسكە سالدى. بيۋدجەت شىعىندارىن قاتاڭ باقىلاۋدى تاپسىردى. قازىنا قاراجاتىن وڭدى-سولدى شاشپاۋ ءۇشىن قىسقارتاتىن باسى ارتىق تۇستار بار ما؟
- پرەزيدەنت پريوريتەت بويىنشا جۇمساۋدى اتاپ ءوتتى جانە بيۋدجەتتىك ءتارتىپ ول بيۋدجەتتىڭ بارلىق دەڭگەيىندە بولۋى كەرەك. سوندىقتان ءبىز سوعان ءمان بەرىپ وتىرمىز. پرەزيدەنت بىلتىر دا ايتتى. سوعان بايلانىستى يميدجدىك، باسقا دا مادەني شارالاردى قىسقارتتىق. ناتيجەسىندە 370 ميلليون تەڭگە ۇنەمدەدىك.
- پرەزيدەنت باستاماسىمەن «تازا قازاقستان» ناۋقانى جۇزەگە اسىپ جاتىر. وسى اكسيا اسىندا پرەزيدەنت تەلەراديوكەشەنى قولعا العان «تازا قالا» تەلەجوباسىنىڭ ءتۇسىرۋ توبى اقتوبە كەلگەندە ساراپشىلار بەرەتىن ماكسيمالدى 30 بالدىڭ نەشەسىن الۋى مۇمكىن؟
- ەڭ ءبىرىنشى ءار اۋىلدىڭ، قالانىڭ تازالىعى كەرەك. باستى مىندەتىمىز - مادەنيەت قالىپتاستىرۋ. ءار تەرريتوريانىڭ ءوز يەسى بار. اكىمدىك جاۋاپ بەرەتىن، جەكە بولسا - ادامدار، بيزنەس نىساندارىنىڭ اۋماعى، كوپقاباتتى ۇيلەردىڭ اينالاسى. قۋانتارلىعى، اكسياعا 320 مىڭ ادام قاتىستى. بىرنەشە باعىت قامتىلدى. سۋ قويماسى، وزەن، دالالىق القاپ بار اراسىندا. بۇل - تەك اكسيا اياسىندا شەكتەلمەي، تۇراقتى اتقارىلاتىن اۋقىمدى جۇمىس. بيۋدجەتتەن ءبىراز قارجى ءبولىندى، ارنايى تەحنيكا الىندى. ساياباقتاردى، جۇرگىنشىلەر جولىن كۇتىپ ۇستاۋ ءۇشىن دە ليزينگكە تەحنيكا الىندى. قىركۇيەك ايىندا جەتكىزىلەدى. جوبا بويىنشا ماكسيمالدى بالدى الۋعا تىرىسامىز.
- وتكەن جولى سۇحباتتا فۋتبول وتانى بولعان اقتوبەدە ستاديون سالىنادى دەپ ەدىڭىز. جەر تەلىمى ءبولىندى مە؟ قۇرىلىستى كىم جۇرگىزەدى؟ قاشان باستالادى؟
- ستاديون سالۋ - وڭاي شارۋا ەمەس. قوماقتى قارجى كەرەك. ۋەفا تالاپتارى دا ەسكەرىلۋى ءتيىس. ءبىر جىلعا جۋىق ۋاقىت بويى قۇجات دايىنداۋ، كەلىسىم الۋ جۇمىسى ءجۇردى. پرەزيدەنت فۋتبولعا زور ءمان بەرىپ وتىر. ءوزى دە ۇلتتىق قۇراماعا جانكۇيەر بولىپ، ويىنعا بارادى. فۋتبولدى دامىتۋعا ارنالعان كوپتەگەن جۇمىس اتقارىلىپ جاتىر. ءبىز ءوزىمىزدىڭ تاراپتان ءار وڭىردە ينفراقۇرىلىمدى قولعا الدىق. جاقىندا فۋتبول اكادەمياسى اشىلدى.
ىرىكتەۋ وتكىزىپ، دارىندى بالالاردى 6 جاستان باستاپ سول جەرگە جىبەرەمىز. ال جانكۇيەرلەرىمىزگە كەلەر بولساق، ولار بەلسەندى. ستاديون سىيىمدىلىعى 13 مىڭ بولسا دا بيلەت تاپشى. سوندىقتان اقتوبە ۇلكەن ستانديونعا لايىقتى. العاشىندا 30 مىڭ دەپ ايتىلدى. ءبىراق 35 مىڭ ورىندىق ستاديون سالىنادى. ۇلكەن دارەجەدەگى ويىنداردى وتكىزۋگە مۇمكىندىك بار.
ۋەفا-مەن كەلىسىم بەكىگەن، فەدەراتسيا دا قولداۋ كورسەتىپ كەلەدى. قۇرىلىس مەملەكەتتىك- جەكەمەنشىك ارىپتەستىك ارقىلى جۇرگىزىلەدى. سىزباسى بار، نەگىزى قۇجاتتارى دايىن. قۇرىلىس-مونتاج جۇمىستارى ءۇشىن كومپانيانى انىقتاپ، كەلەر جىلى باستايمىز. تاجىريبەلى كومپانيا بىزدە جوق، سوندىقتان شەت مەملەكەتتەن بولادى. تەحنولوگيا بويىنشا 1 جىل 8 ايدا اياقتالاۋى ءتيىس. 2026 -جىلى اياقتالادى دەپ جوسپارلاپ وتىرمىز.
- ءبىر جىلدىق قىزمەتىڭىز تۋرالى ايتىپ وتىرمىز عوي، جوسپارىڭىزداعى قاي ىستەر ورىندالماي قالىپ تۇر؟
- جىل اياقتالعان جوق. تاۋەكەلدەر بار، جوق ەمەس. 60-تان استام جاڭا جوبا باستالدى. ونىڭ الدىنداعى اۋىسپالى جوبالار دا بار. قاراشا ايىندا ءبارى بەلگىلى بولادى. ءبىراق توقتاپ قالعان جوبا جوق.
- سوڭعى وقىعان موتيۆاتسيالىق كىتابىڭىز؟
- كىتاپ كوپ. ينتەرنەتتى اشىپ قالساق دا موتيۆاتسيالىق دۇنيەلەر بار. ءبىراق اتا-بابامىزدىڭ سوزدەرى وي تۋدىرادى. ءبارىن بۇرىن ايتىپ كەتكەن. سوڭعى كەزدەرى ءماشھۇر ءجۇسىپ كوپەيەۆتىڭ شىعارمالارىن وقىپ ءجۇرمىن.
«كۇن بۇرىن ىستەر ءىستىڭ ءتارتىبىن ءبىل،
كوزگە ءتۇس، اۋىزعا ءىلىن، مايدانعا كەل!
دايىن-دى، قىلعان ءىسىڭ نىعىز بولسىن،
دۇنيەدە كورەتىن ءوزىڭ... مىڭ جىل»، - دەگەن ءبىر شۋماق بار. جاۋاپكەرشىلىك، سەنىمدى اقتاۋدىڭ ماڭىزىن ۇعىندىرعانداي. پرەزيدەنتتىڭ تاپسىرماسىن، حالىقتىڭ تالابىن ءبىر ءۇيدىڭ بالاسىنداي ارىپتەستەرمەن ورىنداۋىمىز كەرەك. بىردەن ءبارىن اتقارۋ نەمەسە ىسكە اسىرۋ وڭاي ەمەس. قارجى، ۇيىمداستىرۋ، زاڭ مەن ونىڭ ءتارتىبى بار. تەك دەر كەزىندە ءتۇسىندىرۋ كەرەك.
- قازىر سپورتپەن شۇعىلدانىپ ءجۇرسىز بە؟
- سپورت كەرەك. تەك جۇيەلى اينالىسۋعا مۇمكىندىك جوق. ءبىراق كەي كەزدە جۇگىرەمىن، جۇزەمىن. كەي كەزدە ءوزىم تولىق مەڭگەرگەن كۇرەسكە، ياعني تاتاميگە بارامىن. بۇل جۇرەككە، دەنساۋلىققا دا قاجەت نارسە. كوپ بوس ۋاقىت جوق. ءبىراق دەنساۋلىق كەرەك. قاي كەزدە دە ڭرڭ، جاۋاپتى شەشىم قابىلداۋ ءۇشىن دەنىمىز ساۋ بولۋى كەرەك.
اۆتور
التىناي ساعىندىقوۆا
