اقتوبەلىك زەينەتكەر 13 ميلليون تەڭگەسىنەن ايىرىلدى
اقتوبە. KAZINFORM - اقتوبەدە 75 جاستاعى قاريا الاياقتاردىڭ قۇربانى بولدى. ول ەكىنشى دەڭگەيلى بانك ەسەپشوتىنداعى 13 ميلليون تەڭگە اقشاسىنان ايىرىلدى.
اقتوبە وبلىستىق پد باسپا ءسوز قىزمەتىنىڭ حابارلاۋىنشا، وڭىردە كۇن سايىن الاياقتىق دەرەگى تىركەلەدى. ءتۇرلى ەسكەرتۋگە قاراماستان، تۇرعىندار قۇپيا ۇستاۋى ءتيىس اقپاراتتى بەيتانىس ادامعا بەرىپ، بارىنان ايىرىلىپ قالىپ جاتىر.
«زەينەتكەرگە بەلگىسىز ادام قوڭىراۋ شالىپ، ءوزىن ەكىنشى دەڭگەيلى بانكتەردىڭ ءبىرىنىڭ قاۋىپسىزدىك قىزمەتكەرى رەتىندە تانىستىرعان. قوڭىراۋ شالۋشى الاياقتار ونىڭ اتىنان نەسيە راسىمدەپ جاتقانىن جانە مۇنى توقتاتۋ ءۇشىن جيناق اقشاسىن قاۋىپسىز شوتقا اۋدارۋ كەرەكتىگىن ايتقان. جابىرلەنۋشى قوڭىراۋ شالۋشىنىڭ بارلىق ايتقانىن ورىنداعان. ناتيجەسىندە الاياقتار ونىڭ شوتىنان 13 ميلليون تەڭگە سوماسىندا اقشا العان. الاياقتىق دەرەگى بويىنشا كۇدىكتى ادامدى انىقتاۋعا جانە ۇستاۋعا باعىتتالعان تەرگەۋ ارەكەتتەرى جۇرگىزىلىپ جاتىر»، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.
ەسكە سالساق، اقتوبە وبلىستىق پ د-دە كيبەرپول قىزمەتى جۇمىس ىستەپ تۇر. مۇندا بىلتىر مىڭنان استام ءىس تىركەلدى. اقشا اۋدارۋ ونلاين جۇرەتىن بولعان سوڭ بۇل باعىتتاعى ءىستىڭ كوبى اشىلماعان.
اۆتور
التىناي ساعىندىقوۆا
