اقتوبەلىك وقۋشى قاۋىپ تونگەنىن حابارلايتىن قوسىمشا ويلاپ تاپتى
اقتوبە. KAZINFORM - اقتوبە قالاسىندا مەكتەپ وقۋشىسى جاساندى ينتەللەكتىنى پايدالانىپ، جاڭا قوسىمشا ويلاپ تاپتى. قوسىمشا وقۋشىعا قاۋىپ تونگەنىن بىردەن ءبىلىپ، پوليتسياعا شۇعىل حابار بەرە الادى.
اقتوبە قالاسى ۇ. ق ۇلىمبەتوۆ اتىنداعى №64-ورتا مەكتەبىنىڭ 10-سىنىپ وقۋشىسى تۇمار سماعۇل جاساندى ينتەللەكتىنىڭ قىر-سىرىن مەڭگەرىپ ءجۇر. ول ءتۇرلى زەرتتەۋ جۇرگىزىپ، «NazarAI» قوسىمشاسىن ويلاپ تاپتى. قوسىمشا بەينەكامەرا ماتەريالدارىن جاساندى ينتەللەكت ارقىلى وڭدەيدى، ياعني، ادامدى تانۋ، ادام ارەكەتىن مودەلدەۋ، قاۋىپتى ساتتە شۇعىل حابارلاۋ سەكىلدى جۇمىستاردى ۇيىمداستىرادى.
- بۇل قوسىمشانىڭ بىرنەشە قىزمەتى بار. سونىڭ ءبىرى - مەكتەپكە كەلگەن وقۋشىلاردىڭ بەينە كامەراداعى كەسكىنىن تانۋ جانە ولاردىڭ مەكتەپكە كەلگەن ءساتىن اۆتوماتتى تۇردە اتا-انالارعا حابارلاۋ. حابارلامادا وقۋشىنىڭ سۋرەتى، اتى-ءجونى، كەلگەن ۋاقىتى كورسەتىلەدى. سونىمەن قاتار قوسىمشانىڭ تاعى ءبىر قىزمەتى - قاۋىپتى ءساتتى انىقتاۋ. وقۋشى قاۋىپ-قاتەر تونگەن ساتتە ەكى قولىن كوتەرسە، جاساندى ينتەللەكت بەينەدەگى ادام ارەكەتىنىڭ كومپيۋتەرلىك مودەلىن قۇراستىرادى. وسىلايشا ادام قولى، بۋىندارىنىڭ بۇرىش گرادۋستارى ارقىلى ەسەپتەۋلەر جۇرگىزىپ، قاۋىپ-قاتەردى انىقتايدى. كەيىن ادام بەينەسىنە سكرين جاساپ، ناتيجەسىن ساقتايدى جانە وسى ادامعا قاۋىپ تونگەنى تۋرالى اقپاراتتى «دابىل» تەلەگرام كانالىنا جىبەرەدى. «دابىل» تەلەگرام كانالىنا ىشكى ىستەر ورگاندارىنىڭ ارنايى ءبولىمى تىركەلگەن. بۇل كانالدىڭ ماقساتى - مەكتەپتەگى قاۋىپ-قاتەردى قۇزىرلى ورگاندارعا جىلدام جەتكىزۋ، - دەپ حابارلادى اقتوبە وبلىستىق ءبىلىم باسقارماسىنىڭ باسپا ءسوز قىزمەتى.
ايتا كەتەيىك، جوبا جەتەكشىسى ەربول قۋانىش ۇلى مەن جاس زەرتتەۋشى تۇمار سماعۇل جاڭا قوسىمشانى ءالى دە زەردەلەپ، جاڭا مۇمكىندىكتەرىن قاراستىرۋدى جوسپارلاپ وتىر.
اۆتور
التىناي ساعىندىقوۆا
