اقتوبەلىك مۇعالىمدەر بالالى وتباسىلاردى اۋىلعا كوشىپ كەلۋگە شاقىردى
اقتوبە. KAZINFORM - قوبدا اۋدانى اقساي باستاۋىش مەكتەبىنىڭ ۇجىمى الەۋمەتتىك جەلى ارقىلى حابارلاندىرۋ بەرىپ، بالالى وتباسىلاردى اۋىلعا شاقىردى.
مۇندا جەكە كاسىپكەر الىپ قويعان ءۇي بەرىلەدى. ءتىپتى اۋىل حالقى قىسقا قاجەتتى وتىنى مەن باعاتىن مال ازىرلەپ قويعان.
قوبدا اۋدانى اقساي اۋىلىنداعى ءبىلىم ورداسى بۇعان دەيىن نەگىزگى مەكتەپ بولدى. سوڭعى 2020-2021 وقۋ جىلىنان باستاپ باستاۋىش مەكتەپ بولىپ وزگەردى. اۋىلدا 26 ءۇي بار. بۇعان دەيىن 7 بالا ءبىلىم السا، قازىر 3 بالا عانا قالدى. مەكتەپ ۇجىمى ءبىلىم ورداسى جابىلىپ قالماۋى ءۇشىن جان-جاققا حابارلاندىرۋ بەرىپ، كوشىپ كەلۋشىلەردىڭ بار جاعدايىن جاساماق نيەتتە.
«ءبىز باستاۋىش سىنىپتا وقيتىن بالالارى بار وتباسىنى ىزدەپ جاتىرمىز. بىلتىرعى وقۋ جىلىندا بىزدە 7 بالا بولدى. ونىڭ ەكەۋى 4-سىنىپتى ءبىتىردى، ەكەۋىنىڭ وتباسى كوشىپ كەتتى. قازىر ءۇش بالا عانا قالىپ تۇر. مەكتەپتى ساقتاپ قالۋ ءۇشىن تاعى ەكى وقۋشى كەرەك. حابارلاندىرۋ بەرگەن سوڭ ءبىر وتباسى حابارلاستى. قازىر مەكتەپتىڭ 2 مۇعالىمى سول وتباسىنى اۋىلعا الىپ كەلۋ ءۇشىن جولعا شىقتى. اۋىلدان كەتكەن ادامداردىڭ ءۇيىن ساتىپ العان كاسىپكەر سول باسپانانى بەرەدى. اۋىل ادامدارى مال بەرەدى، قىستا جاعاتىنىن وتىنىن دايىندايدى. كوشىپ كەلۋشىلەرگە ءۇيدى تازارتىپ، ازىرلەپ قويامىز»، - دەدى اقساي باستاۋىش مەكتەبىنىڭ مەڭگەرۋشىسى دينا بەكەيەۆا.
ونىڭ ايتۋىنشا، بىلتىر دا ءدال وسىنداي جولمەن اۋىلعا ەكى بالاسى بار ءبىر وتباسى كوشىپ باردى.
«اۋىلدا سۋعا سۇزگى قوندىرىلعان. جولىمىز جاسالىپ جاتىر. مال ۇستاۋعا وتە ىڭعايلى. 2025-2026 -جىلدارى گاز قۇبىرى تارتىلادى دەپ جاتىر. اۋىلدان كوشكىمىز كەلمەيدى. مەكتەپتە وتىرعان مۇعالىمدەردىڭ ەڭبەك ءوتىلى 25-30 جىل. قازىر 3 مۇعالىم بار. 8 ءى كىشى قىزمەتكەر. بارلىعى 11 جۇمىس ورنى. مەكتەپ عيماراتىندا كلۋب پەن مەدپۋنكت بار. مەكتەپ كومىرمەن جىلىتىلادى. قازاندىق مەكتەپ جانىندا بولەك ورنالاسقان»، - دەدى دينا بەكەيەۆا.
ايتا كەتەيىك، اقساي اۋىلىندا 27 ءۇي بار. قوبدا اۋدانىنان 15 شاقىرىم قاشىقتىقتا ورنالاسقان اۋىلداعى ءۇي باعاسى شامامەن 500 مىڭ تەڭگە.
اۆتور
التىناي ساعىندىقوۆا
