اقتوبەلىك مۇعالىم اۋىلداسىن ءولتىرىپ الدى

اقتوبە. KAZINFORM - ىرعىز اۋدانى بايمەن المانوۆ اتىنداعى ورتا مەكتەپتىڭ مۇعالىمى اۋىلداسىن ءولتىرىپ الدى. وقيعا كەشە تۇندە بولدى.

اقتوبە وبلىستىق پ د باسپا ءسوز قىزمەتىنىڭ حابارلاۋىنشا، «Suzuki XL7» ماركالى اۆتوكولىگىنىڭ جۇرگىزۋشىسى ىرعىز اۋدانى قۇرىلىس اۋلىندا 40 جاستاعى جاياۋ جۇرگىنشىنى قاعىپ كەتكەن. جول-كولىك وقيعاسى سالدارىنان جاياۋ جۇرگىنشى وقيعا ورنىندا قايتىس بولدى.

- ساراپتاما اكتىسىنە سايكەس جۇرگىزۋشى ماس كۇيىندە بولعان. ادامنىڭ ولىمىنە اكەپ سوقتىرعان جول قوزعالىسى ەرەجەسىن بۇزۋ فاكتىسى بويىنشا سوتقا دەيىنگى تەرگەپ-تەكسەرۋ باستالدى. جۇرگىزۋشى ۋاقىتشا ۇستاۋ يزولياتورىنا قامالدى، - دەپ حابارلادى اقتوبە وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ايتا كەتەيىك، جابىرلەنۋشى دە، كۇدىكتى دە ءبىر اۋىلدىڭ تۇرعىندارى. كۇدىكتى - قۇرىلىس اۋىلىنداعى بايمەن المانوۆ اتىنداعى ورتا مەكتەپتىڭ العاشقى اسكەري دايىندىق جەتەكشىسى.

- وقيعانى تۇندە ەستىدىم. ول قازىر ەڭبەك دەمالىسىندا جۇرگەن ادام. وتە وكىنىشتى نارسە. كۇدىككە ىلىككەن ەرىك سۋحانبەرلين جاقسى مۇعالىم ەدى. قولىنان كەلسە كومەكتەسەدى، شىعارماشىل ادام. ءان ايتادى، پوەزياعا جاقىن. وتباسى ۇلگىلى. ءوزى مەكتەپتە 14 جىل جۇمىس ىستەدى. بۇل جاعداي قاي-قايسىسىنا دا وڭاي ەمەس، - دەدى بايمەن المانوۆ اتىنداعى ورتا مەكتەپتىڭ ديرەكتورى نۇرگۇل قالماعامبەتوۆا.

ايتا كەتەيىك، كۇدىككە ىلىككەن مەكتەپ مۇعالىمى 36 جاستا، وتباسىلى.

اۆتور
التىناي ساعىندىقوۆا