اقتوبەلىك جولاۋشى لاس ۆاگون ءۇشىن مورالدىق شىعىن ءوندىرىپ الدى

اقتوبە. KAZINFORM - اتىراۋ-اقتوبە جولاۋشىلار پويىزىنا قىزىمەن مىنگەن اقتوبەلىك تۇرعىن تاسىمالداۋشى كومپانيادان مورالدىق شىعىندى وتەپ الدى.

ءىس اقتوبە وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا قارالدى. اقتوبەلىك تۇرعىن «جۇك تاسىمالى» ا ق- نان جولاۋشىلار پايداسىنا ماتەريالدىق جانە مورالدىق زياندى ءوندىرۋ تۋرالى ازاماتتىق شاعىم ءتۇسىردى.

ءىس ماتەريالىنا سۇيەنسەك، قالا تۇرعىنى كامەلەتكە تولماعان قىزىمەن بىرگە «اتىراۋ-اقتوبە» باعىتىنداعى پويىزعا وتىرادى. سول كەزدە ۆاگون ءىشىنىڭ لاس، شاڭ ەكەنىن ايتىپ، سۋدىڭ دا جارامسىز كۇيگە تۇسكەنىن حابارلاعان.

جولسەرىكتەردەن ورنىن باسقا ۆاگونعا اۋىستىرىپ بەرۋدى سۇرادى. ءبىراق سۇراعانى بولماي، كەيىن سول جەرگە پوليتسيا قىزمەتكەرلەرىن شاقىرادى. ولار ۆاگونداعى جاعدايدى فوتو، ۆيدەوعا ءتۇسىرىپ، تىركەگەن.

- تالاپ قويۋشى ءوزىنىڭ جانە كامەلەتكە تولماعان قىزىنىڭ لاس سۋمەن جۋىنعانىن، لاس ۆاگوندا ۇيىقتاۋىنا تۋرا كەلگەنىن، ولاردىڭ دەنساۋلىعىنا قاۋىپ تونگەنىن ايتىپ، بيلەت قۇنىن قايتارۋدى جانە مورالدىق زالالدى ءوندىرۋدى سۇرادى. سوتتىڭ شەشىمىمەن جاۋاپكەردەن جولاۋشىلاردىڭ پايداسىنا 100000 تەڭگە مورالدىق زيان جانە وكىلدىڭ كومەگىنە جۇمسالعان 200000 تەڭگە ءوندىرىلدى. بيلەت قۇنىن ءوندىرۋ تۋرالى تالاپتى سوت قاناعاتتاندىرۋدان باس تارتۋ قاجەت دەگەن قورىتىندىعا كەلدى. سەبەبى ولار دىتتەگەن ورىنعا جەتتى، ياعني، تاسىمالداۋ شارتىنىڭ تالاپتارى تولىق ورىندالدى، - دەپ حابارلادى اقتوبە وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى.