اقتوبەلىك شەبەر جۇننەن تاقيا جاساۋ تۋرالى قۇپياسىمەن ءبولىستى

Фото: Алтынай Сағындықова
Фото: Алтынай Сағындықова

اقتوبە. KAZINFORM - اقتوبە قالاسىندا تۇراتىن شەبەر ءارى ىسمەر گۇلنۇر اسقاروۆا جۇننەن تاقيا، كارتينا جاساپ، جاڭا تەحنولوگيانى وقۋشىلارعا ۇيرەتىپ ءجۇر.

شەبەر ەلىمىزدە ءجۇن وڭدەۋ تەحنولوگياسى دامىماعان سوڭ قولونەر بۇيىمدارىنىڭ باعاسى قىمبات ەكەنىن جاسىرمادى.

بيىل كيىز تاقيالار سانگە شىقتى. اقتوبەلىك شەبەر گۇلنۇر اسقاروۆا وسى ونەردىڭ تەحنولوگياسىن قايتا قاراپ، جانداندىردى.

- الدىمەن كيىز باسۋدى ۇيرەندىم. ساپالى دۇنيە جاساي الاتىنىما كوز جەتكىزگەندە عانا باس كيىم ازىرلەدىم. قازىر ءجۇندى باسىپ، ديزاينىن جاساپ شىعارامىن. ءجۇندى دايىن كۇيىندە دۇكەننەن الامىن. كوبىنە رەسەيلىك ءونىم ساتىلادى. سوڭعى كەزدە جامبىلدان ساتىپ الامىن. ءجۇن دايىن كۇيىندە كەلەدى، ءبىراق قىمبات. 50 گرام ءوزى 800 تەڭگە تۇرادى. 1 كەلى ءجۇن باعاسى - 16 مىڭ تەڭگە. ءبىر تاقيا جاساۋ ءۇشىن 40-45 گرام ءجۇن كەرەك. ال قيىنى ءپىشىنىن شىعارۋ بولدى. سودان تەمىر ۇستاسىنا بارىپ، فورماسىن ازىرلەتىپ الدىم. العاشقىلارىنىڭ كەسكىنى ناشار بولعانىمەن، كەيىن قولىم جاتتىقتى. كيىز تاقيا ءازىر بولعان سوڭ كەستەلەپ، ساندەيمىن، - دەيدى شەبەر.

ونىڭ ايتۋىنشا، كيىز تاقيالارى ءبىر-ءبىرىن قايتالامايدى. ءارى باس كيىمدى تىككەندە ادامنىڭ كوڭىل-كۇيى دە ماڭىزدى ءرول اتقارادى.

- شەبەر باس كيىم تىكپەس بۇرىن مۋزەيگە بارىپ، ۇلتتىق كيىم ۇلگىلەرىمەن تانىسۋى كەرەك. زەرتتەۋ جۇرگىزسە دە ارتىق بولماس دەر ەدىم. سەبەبى باس كيىمگە سالىناتىن ويۋ-ورنەكتىڭ ماڭىزى زور. سونىمەن بىرگە باس كيىم جەڭىل ءارى ىڭعايلى بولۋى ءتيىس. ول ىسمەردىڭ شەبەرلىگى مەن كوڭىل كۇيىنە دە بايلانىستى. ادام قولىنا قاجەتتى زاتتاردى العان ساتتەن-اق بار زەيىنىن سالىپ، ويىن جيناقتاسا، جاقسى دۇنيە شىعادى. ءوزىم جاقسى كوڭىل-كۇيدە بولعاندا عانا تىگىپ، ازىرلەيمىن. كيىز كارتينالاردى دا ءدال سولاي جاسايمىن، - دەدى گۇلنۇر اسقاروۆا.

Фото: Алтынай Сағындықова
Фото: Алтынай Сағындықова

شەبەر الداعى ۋاقىتتا كيىزدەن كيىم باسۋدى ماقسات ەتىپ وتىر. تەك الدىمەن ءجۇن وڭدەۋ ءىسىن ءبىر جۇيەگە قويۋ كەرەك.

- بىزگە مەرينوس ءجۇنى كەرەك. وتە جۇمساق ءجۇن ول. ءبىراق قازاقى قوي جۇنىنەن دە باس كيىم، بايپاق جاساۋعا بولادى. ولار ءتوزىمدى. ودان سومكە، ءتىپتى كولىككە قاجەتتى چەحول تىگە الامىز. ونىڭ بارىنە ارينە شيكىزات، ءجۇن كەرەك. اۋىل شارۋالارىنان ءجۇندى قايدا جىبەرەتىنىن سۇراسام، ورتەيتىنىن ايتتى. بۇل دۇرىس ەمەس. ءبىر ادام قولعا الىپ، دامىتۋى كەرەك. رەسەيلىكتەر كەلىپ، قۇرال-جابدىقتارىن تانىستىردى. ازىرگە وعان ەشكىم قىزىقپادى. مەنىڭ ويىمشا وسى ءىستى شىدامدى كاسىپكەر ءوز قولىنا الىپ، ءجۇندى جيناپ، وڭدەسە وتە تابىستى بيزنەس بولار ەدى. كيىز ءۇي دە سۇرانىستا، كيىز توسەنىشتى دە الادى، - دەدى شەبەر.

گۇلنۇر اسقاروۆا 2020-جىلدان بەرى ناۋرىز مەرەكەسىنە شىعىپ، قولونەر بۇيىمدارىن تانىستىرىپ ءجۇر. سوڭعى جىلدارى سۇرانىس كۇرت ارتقانىن ايتادى. ال جەرگىلىكتى شەبەرلەر لەكتى يگەرە الماي، ادامدار قىرعىزستان، وزبەكستاننىڭ دايىن ۇلتتىق كيىمىن ساتىپ الىپ جاتىر.

- ءبىز وسى باعىتتا دامىپ، كاسىپتى دە دامىتۋىمىز كەرەك. ءقازىر ءوزىم شاعارماشىلىق اكادەمياسىندا قىزداردى قولونەر بۇيىمدارىن توقىپ، تىگۋگە ۇيرەتىپ ءجۇرمىن. كەيىن وسى سالانى دامىتىپ، كاسىپ جۇرگىزگىم كەلەدى، - دەدى ول.

سوڭعى جاڭالىقتار