اقتوبەلىك شارۋالار بيدايدى كەپتىرىپ، وتكىزۋگە كومەك سۇرادى

اقتوبەنىڭ ايتەكە بي اۋدانىندا ەگىن القابىنىڭ 40 پايىزى ءالى جينالعان جوق. ورۋ جۇمىسى جۇرگىزىلگەنىمەن، كەپتىرۋ قۇرىلعىسى از. ديقاندار ساپاسى تومەن بولسا دا وتكىزۋ تەتىگى قاجەت دەپ وتىر، دەپ حابارلايدى Kazinform.

اقتوبە وبلىسى ايتەكە بي اۋدانىندا ديقاندار الدىمەن كيىكتەن، كەيىن جاۋىن- شاشىننان زارداپ شەكتى. قازىرگى كەزدە 138 مىڭ گەكتار جەردىڭ %60 عانا جينالعان. قالعان %40 ءالى سول كۇيى تۇر. كوبى ساباعىنان قايتا كوكتەپ كەتكەن.

- 1995 -جىلدان باستاپ ەگىن شارۋاشىلىعىمەن اينالىسىپ كەلەمىن. بۇگىنگە دەيىن وسىنداي قيىندىقپەن كەزىگىپ كورمەگەن ەدىك. ءالى كۇنگە دەيىن استىق جيناۋ ناۋقانى اياقتالماي تۇر. ءوزىمنىڭ شارۋاشىلىعىمدا ەگىننىڭ %20 ورىلمادى. جاعداي وتە قيىن. ءبىزدىڭ قويمادا ءبۇر جارىپ كەتكەن، ساپاسى تومەن استىق بار. جينالعان ءونىمىمىزدىڭ %70 ءى وسىنداي كۇيدە. ەشكىم المايدى. ءبىزدىڭ شارۋاشىلىقتا كەپتىرۋ اپپاراتى جوق، - دەدى «بۇلاق» شارۋا قوجالىعىنىڭ باسشىسى اقجول دابىلوۆ.

بۇعان دەيىن شارۋا استىقتى اقتوبەلىك كاسىپكەرلەرگە وتكىزىپ كەلگەن. قازىر ولار دىمقىل بيدايدى قابىلدامايدى.

ايتەكە بي اۋدانىنداعى شارۋالاردىڭ كەيبىرى كەپتىرۋ اپپاراتىنا سەنىپ وتىر. قازىر مۇنداي قۇرىلعىسى بار شارۋاشىلىقتا جۇمىس ۇزدىكسىز جۇرگىزىلىپ جاتىر. سول ءۇشىن دە ءۇش اۋىسىمدىق جۇمىسقا كوشكەن.

- بيىل مەنىڭ استىق جيناۋ ناۋقانىنا قاتىسقانىما 54 جىل تولدى. وسى كۇنگە دەيىن مۇنداي جاعداي بولماعان ەكەن. وتە قيىن. قىركۇيەك ايىندا 20 كۇننىڭ 16 سىندا جاڭبىر جاۋىپ تۇردى. دەگەنمەن جۇمىس توقتامايدى. جاڭا تەحنولوگيانىڭ كۇشىمەن ەگىندى جيناپ، ساتۋعا شىعارامىز. كەپتىرۋ قۇرىلعىسى بار، - دەدى «التىنسارين» ج ش س- ءنىڭ باسشىسى بوريس كنيازيەۆ.

ايتەكە بي اۋدانىندا 15 ءىرى، 107 شارۋا قوجالىعى ەگىن ەككەن. ونىڭ ۇشەۋىندە عانا كەپتىرۋ اپپاراتى بار.

- اۋداندا سىيىمدىلىعى 50 مىڭ توننا بولاتىن ەليەۆاتور بار. شارۋاشىلىقتىڭ ءبارى سوندا استىق تاپسىرادى. بيىل 17 مىڭ توننا قابىلدادى. ونىڭ 10 مىڭ تونناسى ىلعال. بارىن كەپتىرىپ العانشا، جاڭاسىن قابىلداي المايدى. ءسويتىپ 10 كۇن ءوتتى. 1988 -جىلى ىلعال كۇيىندە قابىلداپ، وزىنەن ءوزى جارىلىپ، اتىلعان. ەليەۆاتورعا مەملەكەت تاراپىنان ارزان ديزەل وتىنىن الۋعا قارجى ءبولىندى، - دەدى ايتەبي اۋداندىق اۋىل شارۋاشىلىعى جانە جەر قاتىناستارى ءبولىمىنىڭ باسشىسى مەيرامبەك ساتيموۆ.

بيىل 15-قىركۇيەك كۇنى القاپتىڭ 20-30 پايىزىندا بيداي ساباعىنان كوكتەپ كەتكەن. قازاندا بۇل كورسەتكىش 50-60 پايىزعا جەتكەن. قازىرگى پروبلەما كوكتەمدە قيىندىق تۋعىزۋى مۇمكىن. سەبەبى شارۋالار تۇقىم تاپشىلىعىن سەزىنەدى.

- ازىق- تۇلىك كورپوراتسياسى 800 توننا قاتتى بيدايىمىزدى، 500 توننا جۇمساق بيدايىمىزدى قابىلداسا، كەلەر جىلى كەز كەلگەن شارۋاشىلىق كەلىسىمشارت اياسىندا تۇقىم الار ەدى. شارۋالاردىڭ تەحنيكانى نەسيەگە العانى بەلگىلى. وسى كۇنى ولار 3 جىلعا كەيىنگە شەگەرسە دەپ ۇسىنىس ايتىپ وتىر. پايىزىن وسىرمەسە دەپ ءوتىنىش جولدادى، - دەدى مەيرامبەك ساتيموۆ.

ەسكە سالساق، بيىل اقتوبەنىڭ ايتەكە بي اۋدانىندا بيداي قايتا كوكتەپ كەتتى.

شارۋالار ءبىر ايعا جۋىق ۋاقىت ورۋ جۇمىسىن جۇرگىزە المادى.