اقتوبەدە وقۋشىلار مەرت بولعان جول اپاتىنا قاتىستى سوت وتىرىسى باستالدى
اقتوبە. KAZINFORM - اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا وليمپياداعا بارار جولدا جول-كولىك وقيعاسىنا تاپ بولىپ، كوز جۇمعان وقۋشىلارعا قاتىستى ءىستىڭ الدىن الا تىڭدالىمى ءوتتى.
وقيعا «سامارا-شىمكەنت» تاسجولىنىڭ ىرعىز اۋدانى اۋماعىندا تىركەلگەنىمەن، ءىس اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا قارالادى. بۇگىن الدىن الا سوت تىڭدالىمى ءوتتى. وندا پروكۋرور اسلانبەك يبراشيەۆ ايىپتاۋ قورىتىندىسىن وقىدى.
ءىس ماتەريالىنا سۇيەنسەك، تەمىراستاۋ مەكتەبىنىڭ مۇعالىمى، جۇرگىزۋشى 2023-جىلدىڭ 19- جەلتوقسانى كۇنى ساعات 08:30 دا جانىس بيدەن ىرعىز اۋىلىنا قاراي بەت الادى. اۋا رايى مەن مەتەورولوگيالىق جاعدايدى ەسكەرمەي، سامارا-شىمكەنت تاسجولىنىڭ 1140 شاقىرىمىندا جولدىڭ قارسى باعىتىنا ارنالعان جولاققا شىعىپ كەتەدى. سول كەزدە قارسى كەلە جاتقان جۇك كولىگىمەن سوقتىعىسادى.
- جول-كولىك وقيعاسى كەزىندە 2008 جىلى تۋعان وقۋشى اۋرۋحاناعا ءتۇستى. 1998-جىلى تۋعان مۇعالىم، 2008-جىلى تۋعان وقۋشى قىز، 2007-جىلى تۋعان ەر بالا جول-كولىك وقيعاسىنان وقيعا ورنىندا قايتىس بولدى. 1998-جىلى تۋعان مۇعالىم باس جاراقاتىنان قايتىس بولعان. بۇل قاتتى اۋىر سوققىدان بولۋى مۇمكىن. 2007-جىلى تۋعان ەر بالانىڭ باسى جۇلىنىپ كەتكەن. 2008-جىلى تۋعان وقۋشى قىز جاراقات اسەرىنەن تراۆماتيكالىق شوك الىپ، قايتىس بولعان، - دەدى پروكۋرور.
جول-كولىك وقيعاسىنان سوڭ ءۇش كولىككە دە ساراپتاما تاعايىندالدى. سونىمەن بىرگە جۇك جانە تاعى ءبىر جەڭىل كولىك زاقىمداندى. سوت وتىرىسىنا ايىپتالۋشىنىڭ تۋىستارى، جابىرلەنۋشىنىڭ جاقىندارى قاتىستى.
- جانىس ءبي اۋىلىنداعى قاراشاڭىراقتا وتىرعان سايراننىڭ اپاسىمىن. قايتىس بولعان بالالاردىڭ ۇشەۋى - اعايىندى. رۋلدە وتىرعان سايراننىڭ ۇلى. بۇل ءۇش شاڭىراققا دا قيىن سىناق بولدى. جول قاتەلىكتى كەشىرمەيدى. اللا سىناق بەردى، سونى كوتەرىپ جاتىرمىز. رۋلدە وتىرعان ىنىمىزگە جەڭىلدىك بەرسە دەيمىز. قاماۋدا وتىرعاندا، ىرعىزدا ەشكىم ونى كورە المادى. اكەسى عانا قورعاۋشى رەتىندە كىرىپ شىقتى. پسيحولوگ جالداپ، ىنىمىزگە كومەكتەسۋگە تۋرا كەلدى. ول ءومىر سۇرگىسى كەلمەدى، ءوز-وزىنە قول سالماق بولدى. جانىندا وتىرعانى ءوز دوسى، ال كوز جۇمعان تۋعان قارىنداسى. وتە اۋىر بولدى. پسيحولوگكە قارىنداسىن ءبىر رەت، ال دوسىن قايتا-قايتا ايتقان. ەكەۋى قاتار ءجۇردى. وقۋ بىتىرگەن سوڭ «اۋىلدان بىرگە باستايمىز» دەپ باردى. بەس جىل بولدى، ەكەۋى دە سول مەكتەپتىڭ مۇعالىمى. قايتىس بولعان بالا مەكتەپتىڭ جۇلدىزى بولدى، - دەدى گۇلبانۋ شامشادين قىزى.
ەسكە سالساق، سامارا-شىمكەنت تاسجولىنا جول-كولىك وقيعاسى بولىپ، ەكى وقۋشى مەن مۇعالىم كوز جۇمدى.
