اقتوبەدە تاعىدا جۇك كولىگىنە جەڭىل كولىك سوقتىعىسىپ، ەكى ادام كوز جۇمدى
اقتوبە. KAZINFORM - اقتوبە وبلىسى مۇعالجار اۋدانى اۋماعىندا جەڭىل جانە جۇك كولىگى سوقتىعىسىپ، ەكى ادام قازا تاپتى. ءبىر ادام ساناۆياتسيا تىكۇشاعىمەن وبلىس ورتالىعىنا جەتكىزىلدى.
اقتوبە وبلىسى مۇعالجار اۋدانىنداعى جول اپاتى كەزىندە دارىگەرلەر بارلىعى 6 ادامدى قاراپ شىقتى. جەڭىل كولىك ىشىندە بولعان 67 جاستاعى ايەل وقيعا ورنىندا كوز جۇمدى.
5 ادام ەمبى اۋداندىق اۋرۋحاناسىنا جەتكىزىلدى. اقتوبە وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ حابارلاۋىنشا، جەڭىل كولىكتىڭ 32 جاستاعى جۇرگىزۋشىسىنىڭ باسى جارىلىپ، ىشكى اعزالارىنا زاقىم كەلگەن. بۇگىن ساعات 14:00 شاماسىندا جۇرەگى توقتاپ قالدى.
- كولىك ىشىندە بولعان 55 جاستاعى ايەل دە باس-مي جاراقاتىن الدى. قازىرگى كەزدە جاعدايى تۇراقتى اۋىر. ال، 60 جاستاعى ايەلدىڭ ءىش قۇرىلىسى زاقىمدانعان. ەمبى قالاسىنا ساناۆياتسيا جىبەرىلىپ، ناۋقاس وبلىس ورتالىعىنا جەتكىزىلدى. سونىمەن بىرگە 25 جاستاعى جىگىتتىڭ ميى شايقالىپ، حيرۋرگيا بولىمىنە جاتقىزىلدى. جۇك كولىگى جۇرگىزۋشىسىنىڭ جاعدايى قالىپتى. اۋرۋحانادان شىعارۋعا دايىندالىپ جاتىر، - دەدى اقتوبە وبلىستىق دەنساۋلىق ساقتاۋ باسقارماسى باسپا ءسوز قىزمەتى.
اقتوبە وبلىستىق پ د باسپا ءسوز قىزمەتى بۇل وقيعا تۋرالى قانداي دا ءبىر اقپارات تاراتپادى.
ايتا كەتەيىك، وتكەن اپتادا اقتوبەدە ەكى جول اپاتى بولدى. وندا دا جۇك جانە جەڭىل كولىك سوقتىعىسىپ، بىرىنشىسىندە 8 ادام قازا تاپتى. كولىك ىشىندە 5 بالا بولدى.
ەكىنشى وقيعا كەزىندە جەڭىل كولىك ىشىندە بولعان ەكى ادام كوز جۇمدى.
اۆتور
التىناي ساعىندىقوۆا
