اقتوبەدە سپورت مەكتەبىندەگى بالا ولىمىنەن سوڭ ەكى وقۋشى قاماۋعا الىندى

اقتوبە. KAZINFORM - ەسەت باتىر اتىنداعى وليمپيادا رەزەرۆىنىڭ وبلىستىق مامانداندىرىلعان مەكتەپ- ينتەرنات- كوللەدجىندەگى وقۋشى قازاسىنان سوڭ ەكى تاربيەلەنۋشى كۇدىككە ىلىگىپ، قاماۋعا الىندى. ءۇش قىلمىستىق ءىس قوزعالدى.

ەسەت باتىر اتىنداعى وليمپيادا رەزەرۆىنىڭ وبلىستىق مامانداندىرىلعان مەكتەپ-ينتەرنات-كوللەدجىندەگى وقۋشى ءولىمىنىڭ سوڭ قىلمىستىق كودەكستىڭ «بۇزاقىلىق»، «دەنساۋلىققا قاساقانا اۋىر زيان كەلتىرۋ» باپتارى بويىنشا ءىس قوزعالدى.

سونىمەن بىرگە سپورت مەكتەبىنىڭ پەداگوگتەرى مەن باسشىلىعىنىڭ مىندەتتەرىنە ادال قاراماۋ دەرەگى بويىنشا دا تەرگەۋ ءجۇرىپ جاتىر.

- قازىرگى تاڭدا كۇدىكتىلەر رەتىندە وسى مەكتەپتىڭ ەكى تاربيەلەنۋشى تۇتقىندالىپ، ۋاقىتشا ۇستاۋ يزولياتورىنا قاماۋعا الىندى. ءتيىستى ساراپتامالار تاعايىندالدى. سوتقا دەيىنگى تەرگەپ-تەكسەرۋ جۇمىستارى جالعاسىپ جاتىر، - دەدى اقتوبە وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ايتا كەتەيىك، 11-ءساۋىر كۇنى ساعات 21:30-دا سپورت مەكتەبىنىڭ 8-سىنىپ وقۋشىسى كوز جۇمدى.

اۆتور

التىناي ساعىندىقوۆا