اقتوبەدە سۋ تاسقىنىنان زارداپ شەككەندەرگە 64 ميلليون تەڭگە الەۋمەتتىك تولەم بەرىلدى

استانا. KAZINFORM - اقتوبەدە سۋ تاسقىنىنان كەلگەن ماتەريالدىق شىعىنداردى ەسەپتەۋ باستالدى. بۇل تۋرالى وبلىس اكىمىنىڭ ورىنباسارى اسىلبەك ەسەنبايەۆ ايتىپ بەردى.

«سۋ تاسقىنى سالدارىنان ومىرلىك قيىن جاعدايعا تاپ بولعان وتباسىلاردان بۇگىنگى كۇنى 206 ادامعا 64 ميلليون تەڭگە كولەمىندە ءبىرجولعى الەۋمەتتىك تولەم جۇرگىزىلدى. بۇل باعىتتاعى جۇمىس جالعاسىن تابۋدا»، - دەدى ا، ەسەنبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا، سۋ تاسقىنى سالدارىنان وبلىستا 1087 تۇرعىن ءۇي، 47 عيمارات پەن قۇرىلىستار، 232 اۋلا جانە 852 ساياجاي ۇيلەرى زاقىمدانعان.

«سۋ تاسقىنىنان كەلگەن ماتەريالدىق شىعىنداردى ەسەپتەۋ ماقساتىندا ءار اۋداننىڭ جەكە كوميسسياسى قۇرىلىپ، 2652 ءوتىنىش قابىلدانىپ، باعالاۋ جۇمىستارى جۇرگىزىلۋدە. مەملەكەت باسشىسىنىڭ تاپسىرماسىنا سايكەس، زارداپ شەككەن بارلىق تۇرعىننىڭ شىعىندارى وتەلەدى»، - دەدى سپيكەر.

سونداي-اق، زارداپ شەككەندەرگە گۋمانيتارلىق كومەك جيناۋعا 2 پۋنكت قۇرىلىپ، بارلىعى 300 تونناعا جۋىق تاۋار جينالدى. ونىڭ 215 تونناسى مۇقتاج تۇرعىندارعا تاراتىلدى. بۇل جۇمىسقا 8524 ۆولونتەر ات سالىسۋدا.

ايتا كەتەيىك، اقتوبەنىڭ سۋ قويمالارىندا سۋ دەڭگەيى ءتۇسىپ كەلەدى. وڭىردەگى سۋ تاسقىنى جاعدايى تۇراقتى دەڭگەيدە.