اقتوبەدە سۋ تاسقىنى كەزىندە باسپاناسىز قالعان ادامداردىڭ العاشقى لەگى ءۇي ساتىپ الدى

اقتوبە. KAZINFORM - اقتوبە وبلىسى ايتەكە ءبي اۋدانىندا 5 وتباسى ءۇيلى بولدى. كوكتەمدەگى سۋ تاسقىنى كەزىندە ولاردىڭ باسپاناسى جارامسىز كۇيگە تۇسكەن بولاتىن. 

بارلىعى 5 ءۇيدىڭ تورتەۋى تەمىربەك جۇرگەنوۆ، ال بىرەۋى ايكە اۋىلىنان ساتىپ الىندى. ءۇي ساتىپ الۋعا قارجى بولات وتەمۇراتوۆ قورىنان ءبولىندى.

- ايتەكە ءبي اۋدانىنىڭ اكىمدىگىندە تۇرعىن ءۇي ساتىپ الۋ تۋرالى كەلىسىمشارتقا قول قويىلدى. قۇجاتقا قوردىڭ وكىلدەرى، ايتەكە ءبي اۋدانىنىڭ اكىمى، سونداي-اق تۇرعىن ءۇي ساتۋشىسى جانە بولاشاق يەسى قول قويدى. زارداپ شەككەن تۇرعىندار باسپانالاردى وزدەرى تاڭدادى. ولاردىڭ تالاپ-تىلەگى ءۇيدىڭ قۇرىلىسىن كۇتپەستەن، دايىن باسپانا ساتىپ الۋ ەدى. 4 وتباسىعا اۋدان ورتالىعىندا، 1 وتباسىعا ايكە اۋىلىندا ءۇي ساتىپ الىندى، - دەپ حابارلادى اقتوبە وبلىسى اكىمىنىڭ باسپا ءسوز قىزمەتى.

ايتا كەتەيىك، بۇل اۋداندا شەرباكوۆ بوگەتى بۇزىلىپ، تۇرعىن ۇيلەرگە قاۋىپ ءتوندىردى. ايتەكە ءبي اۋدانىنىڭ ماتەريالدىق زالالدى باعالاۋ جانە وتەۋ جونىندەگى كوميسسياسىنا 133 ءوتىنىش كەلىپ ءتۇسىپ، 46 تۇرعىننىڭ ءۇيى اپاتتى دەپ تانىلدى. ايتەكە ءبي اۋدانىنىڭ اكىمى داۋلەتيار توعىزبايەۆتىڭ ايتۋىنشا، كەلەسى اپتادا تاعى 15 وتباسىعا ءۇي ساتىپ الىنادى.

«كەشە ۇيىمىزدەن ايىرىلىپ، قالاي بولارىن جانە نە كۇتەتىنىمىزدى بىلمەدىك. مىنە، بىزدە جاڭا ءۇي بار، قالىپتى ومىرىمىزگە ورالىپ جاتىرمىز. ءبىز ءۇيىمىزدى ءوزىمىز تاڭدادىق»، - دەيدى ايتەكە ءبي اۋدانىنىڭ تۇرعىنى ءلاززات جۇباتوۆا.

اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، بولات وتەمۇراتوۆ قورى كوكتەمگى سۋ تاسقىنىنان زارداپ شەككەن اقتوبە وبلىسىنىڭ تۇرعىندارىنا 10 ميلليارد تەڭگە قارجى ءبولدى.

اۆتور
التىناي ساعىندىقوۆا