اقتوبەدە ەرەكشە بالانىڭ سۋرەت كورمەسى ءوتىپ جاتىر
اقتوبە. KAZINFORM - تۋا ءبىتتى سال اۋرۋىنا شالدىققان يسكاندەر ساعىنايدىڭ تۋىندىلارى ونەر مۋزەيىندەگى كورمەگە قويىلدى. مۇندا بوزبالانىڭ 30 عا جۋىق جۇمىسى بار.
ونەر مۋزەيىندەگى «ءۇنسىز داۋىس» كورمەسى - 17 جاستاعى يسكاندەر ساعىنايدىڭ العاشقى قادامى. مۇندا ول قازاقتىڭ كەڭ دالاسى مەن قالا ءومىرىن شەبەر بەينەلەگەن تۋىندىلارىن ىرىكتەپ اكەلدى.
الەممەن ءۇنسىز تىلدەسكەن ول 12 جاسىندا 3 اي سۋرەت مەكتەبىنەن ءدارىس السا، كەيىن ۇيىندە وتىرىپ شەبەرلىگىن شىڭدادى. سەبەبى يسكاندەر ساعىنايدىڭ ەستۋ قابىلەتى ناشار. اتا-اناسى دەر كەزىندە باعىتتاپ، ءتىپتى ءۇي ىشىنەن ارنايى بولمەسىن جاساقتاپ بەرگەن.
- بالام وسىدان 5-6 جىل بۇرىن سۋرەت سالا باستادى. ءبىز اكەسى ەكەۋمىز قولداپ، قامقورلىق تانىتىپ وتىرامىز. ءسويتىپ جەكە شىعارماشىلىق كورمەسى ءوتتى. بۇل كۇنگە ۇزاق دايىندالدىق. ءار سۋرەتتىڭ ارتىندا ۇلكەن ەڭبەك، كىرشىكسىز سەزىم، شەكسىز قيالداۋ جاتىر. ءاربىر تۋىندى ونىڭ ىشكى سىرىن بىلدىرەدى. بالام بولاشاقتا كىم بولارىن ءوزى شەشەدى. ءبىراق قازىر ول تىگىنشى ماماندىعىن وقىپ ءجۇر. الداعى ۋاقىتتا جاقسى ديزاينەر بولۋى مۇمكىن، - دەدى اناسى جاننا ءالجانوۆا.
يسكاندەر ساعىنايدىڭ اكەسى نۇربەك ساعىنايدىڭ ايتۋىنشا، العاشىندا بالا سۋرەت سالۋعا ءوزى قىزىققان. كەيىن ونىڭ ىنتاسىن اناسى كورىپ، ارنايى ءدارىس الۋ كەرەك دەپ شەشتى.
- قازىر اۋەسقوي سۋرەتشىدەن كاسىبي سۋرەتشىگە اينالىپ كەلەدى. كەنەپكە كاسىبي ماماندار قولداناتىن بوياۋمەن سۋرەت سالادى. نە سالارىن ءوزى تاڭدايدى. سۋرەتىنە قاراساڭ ىشكى الەمى تەرەڭ. سونىمەن بىرگە ول شاحمات وينايدى. اقتوبە قالاسىندا ءۇشىنشى رازرياد الدى. جۇزە بىلەدى، ءتىپتى ءوز بەتىمەن اعىلشىن ءتىلىن مەڭگەرىپ العان. ونى قالاي ۇيرەنگەنىن بىلمەيمىز. ءبىزدىڭ ويىمىزشا فيلم قاراپ مەڭگەرگەن سياقتى. ول اعىلشىنشا تۇسىنەدى، جازادى، - دەدى نۇربەك ساعىناي.
ەسكە سالساق، س. ايتبايەۆ اتىنداعى قىزىلوردا كوركەمسۋرەت گالەرەياسىنىڭ قورىنداعى كارتينالاردىڭ بىرىنە جاساندى ينتەللەكت جان ءبىتىردى.
اۆتور
التىناي ساعىندىقوۆا
