اقتوبەدە قىزىلشا جۇقتىرعانداردىڭ كوبەيۋىنە بايلانىستى ارنايى كەرەۋەتتەر ءبولىندى
اقتوبە وبلىسىندا قىزىلشا دەرتىن جۇقتىرعان ادامدار سانى كوبەيىپ كەلەدى. قازىر ينفەكتسيالىق اۋرۋحانادا 50 كەرەۋەت ءبولىندى. سونىمەن بىرگە بارلىق اۋداندا ەم قابىلدايتىن كەرەۋەت جاساقتالدى، دەپ حابارلايدى قازاقپارات ءتىلشىسى.

اقتوبە وبلىسىندا قىزىلشا دەرتى بيىل اقپان ايىندا تىركەلىپ، وسە باستادى.
قازىرگى كەزدە 359 ناۋقاس تەكسەرىلىپ، ولاردىڭ 276-ىنا قىزىلشا دياگنوزى قويىلدى. ناۋقاستاردىڭ %85 ى — بالالار.
— بۇگىنگى تاڭدا اقتوبە وبلىستىق جۇقپالى اۋرۋلار اۋرۋحاناسىندا 43 ادام ەم الىپ جاتىر. ونىڭ بەسەۋى ەرەسەك بولسا، وزگەسى بالا. ونىڭ ىشىندە 1 جاسقا دەيىنگى بالالار سانى -10. بالالار قىزىلشاعا قارسى ەكى رەت ەكپە الادى. 1 جاسىندا جانە 6 جاسىندا. ەگەر دە 30 جاسقا دەيىن ۆاكتسينانىڭ ەكىنشى كومپونەنتىن نەمەسە ۆاكتسينانى الماسا، وسى كەزدە جاساتۋى كەرەك. مەديتسينا سالاسىنىڭ قىزمەتكەرلەرىنە كەلەر بولساق، ەپيدەميولوگيالىق جاعدايعا بايلانىستى 55 جاسقا دەيىن الادى، — دەدى اقتوبە وبلىسىنىڭ باس پەدياترى نۇرگۇل سارمانوۆا.
قازىر قالاداعى جۇقپالى اۋرۋلار اۋرۋحاناسىندا 50 كەرەۋەت بولسا، ونىڭ 10 ى ەرەسەكتەرگە، وزگەسى بالالارعا ارنالعان.
سونىمەن بىرگە ءار اۋداندا ەكى كەرەۋەت دايىندالدى. قازىر شالقاردا ءبىر، بايعانين اۋدانىندا 1 ادام ەمدەلىپ جاتىر.
— سوڭعى رەت 2019 -جىلى وسىنداي جاعداي بولدى. سوندان كەيىن 2023 -جىلى تىركەلىپ تۇر. جاعداي كۇردەلى دەپ ايتۋعا بولادى. سەبەبى قىزىلشا جۇقتىرعاندار ءالى تىركەلىپ جاتىر. اسىرەسە ەكپە الماعان بالالاردا كەزدەسىپ جاتىر. قىركۇيەك ايى باستالعاندا وبلىستىق جۇقپالى اۋرۋلار اۋرۋحاناسىنا كەلىپ، كومەك سۇرايتىندار كوبەيدى. قۋانىشتىسى — اسقىنعان جوق، — دەدى نۇرگۇل سارمانوۆا.