اقتوبەدە مەكتەپ وقۋشىسى احمەت بايتۇرسىن ۇلىنا ارنالعان موبيلدى قوسىمشانى ىسكە قوستى

اقتوبە. KAZINFORM - اقتوبە قالاسىنداعى 64-ورتا مەكتەپتىڭ وقۋشىسى دانيال قۇرمانعالي احمات بايتۇرسىن ۇلىنىڭ ءومىرى مەن شىعارماشىعىنا ارنالعان موبيلدى قوسىمشانى ىسكە قوستى. قازىر مىڭعا جۋىق ادام قوسىمشانى جۇكتەپ العان.

64-ۇزاقباي قۇلىمبەتوۆ اتىنداعى مەكتەپ مۇعالىمى ەربول مەدەۋوۆ وقۋشىسى دانيال قۇرمانعاليعا موبيلدى قوسىمشا جاساپ شىعۋعا ۇسىنىس بەردى. ۇزدىك وقۋشى ءوزى قىزىعاتىن باعىتتا تاقىرىپ تاڭداپ، احمەت بايتۇرسىن ۇلىنىڭ ءومىرى مەن شىعارماشىلىعىنا توقتالدى.

- مەن قازىر 9-سىنىپتا وقيمىن. جوبانى 7-سىنىپتا قولعا الىپ، اقپارات جيناۋدى باستادىم. ناتيجەسى جاقسى دەپ ويلايمىن. قازىر قوسىمشانى مىڭنان استام ادام جۇكتەپ العان، - دەدى دانيال قۇرمانعالي.

وقۋشى اقتوبە وبلىستىق تاريحي-ولكەتانۋ مۋزەيىنە، ق. جۇبانوۆ اتىنداعى اقتوبە وڭىرلىك ۋنيۆەرسيتەت كىتاپحاناسىنا باردى. كوپ ۋاقىتىن وسى جەرلەردە وتكىزىپ، اقپارات جيناقتادى.

- وقۋشى ماتەماتيكا، ينفورماتيكا پاندەرىمەن قاتار اعىلشىن ءتىلىن جاقسى مەڭگەرگەن. موبيلدى قوسىمشا قۇراستىرۋ كەزىندە ونىڭ ءوز پايداسى ءتيدى. وقۋشى تەحنيكا ءتىلىن تەز ۇيرەندى، ناتيجەلى جۇمىس ىستەدى. ءار ساباق سايىن قىزىعۋشىلىعى ارتىپ، سوڭىندا قوسىمشا بۇكىلالەمدىك ماركەت سەرۆيسىن جۇكتەلدى. قوسىمشا 9 بولىمنەن تۇرادى. ۇلت ۇستازىنىڭ ءومىر جولى، شىعارمالارى، ناقىل سوزدەرى، ولەڭدەرى، ەلەنگەن ەڭبەكتەرىمەن قاتار 3D تۋر دا بار. عالىمنىڭ ءومىرى قيىن بولعانى بەلگىلى. ول اعارتۋشى، ساياسي تۇلعا بولعان. قۋعىن-سۇرگىنگە ۇشىراعان كەزى دە قامتىلدى. ءالى دە اقپاراتتى تولىقتىرامىز، - دەدى مۇعالىم ەربول مەدەۋوۆ.

مەكتەپ وقۋشىسى دانيال قۇرمانعالي الداعى ۋاقىتتا ІТ سالاسىن تەرەڭ مەڭگەرىپ، جاڭا قوسىمشالار قۇراستىرۋدى جوسپارلاپ وتىر.

ەسكە سالساق، بۇعان دەيىن 64-ورتا مەكتەپ وقۋشىسى قاۋىپ تونگەنىن حابارلايتىن قوسىمشا ويلاپ تاپقى.