اقتوبەدە مەكتەپ مۇعالىمى ساندىق پەن ءتۇرلى بۇيىم جاسايدى
اقتوبە. KAZINFORM - اقتوبەدە العىشقى اسكەري دايىندىق، دەنە شىنىقتىرۋ پاندەرىنىڭ مۇعالىمى تەمىرحان ساعىندىقوۆ وڭىردەگى قولونەر شەبەرلەرىنىڭ قاتارىنا قوسىلعان. ول ساندىق، ويۋلى شكاف جانە ءتۇرلى بۇيىمداردى قولدان جاساپ، اۋىلداعى ويىن الاڭى، ورتالىقتاعى ساياباقتى دا جابدىقتاۋعا سەپتىگىن تيگىزدى.
اقتوبە وبلىسى ايتەكە بي اۋدانى اباي اتىنداعى ورتا مەكتەپتىڭ مۇعالىمى تەمىرحان ساعىندىقوۆ سەگىز قىرلى، ءبىر سىرلى پەداگوگتەر قاتارىنان.
ول بۇرىنعى قارابۇتاق اۋدانى شىلىكتى اۋىلىندا تۋىپ، ءوسىپ، اسكەري بورىشىن دا وتەدى.
ال 1984 -جىلى اقتوبە پەداگوگيكا ينستيتۋتىنىڭ دايىندىق كۋرسىندا وقىپ، 1985 -جىلى قاراعاندى پەداگوگيكا ينستيتۋتىنىڭ العاشقى اسكەري دايارلىق جانە دەنە شىنىقتىرۋ فاكۋلتەتىندە ءبىلىم الدى.
جولدامامەن اقكول اۋىلىنداعى اباي اتىنداعى ورتا مەكتەپكە كەلىپ، ەڭبەك جولىن باستادى. سودان بەرى العاشقى اسكەري دايارلىق جانە دەنە شىنىقتىرۋ پاندەرىنەن ساباق بەردى.
ۇزاق جىلدار بويى مەكتەپ ديرەكتورى قىزمەتىن دە اتقاردى. ارادا قانشا جىل وتسە دە ول اعاش جونيتىن قۇرالدارىن تاستاعان ەمەس.
بىرنەشە ساندىق، ويۋلى شكاف جاساپ شىعاردى.
- وقۋشى كەزىمدە سۋرەت سالعان ۇنايتىن. كەيىن جۇمىسقا كىرىسكەن كەزدە ۇلتتىق ونەرگە قىزىعىپ، بەسىك، ساندىق جاسادىم. 90-جىلدارداعى جوقشىلىقتا قولدا بار اعاشتى جونىپ، كادەگە جاراتقان ەدىم. كەيىن وسى قابىلەتىمدى دامىتقىم كەلىپ، ارنايى قۇرالدارىن ساتىپ الدىم. سونىمەن بىرگە تەحنولوگياسىن مەڭگەرۋ ءۇشىن كىتاپتار الدىم. قولىمدا 4-5 كىتاپ بار، اعاش وڭدەۋ، ونى جونۋدىڭ قىر-سىرى جازىلعان. كوبىنە قاراعايدى قولداندىم. سەبەبى ويۋ كەزىندە وتە ىڭعايلى. اعاشتان اينانىڭ شكافىن، ورىندىق، مەكتەپكە ارنالعان حان تاعى دا جاسالدى. قازىر ءوزىم جاساعان ساندىق مەيرامحانادا، ساۋدا ورنىندا، كىتاپحانادا تۇر. ەشنارسەنى ساتپادىم، ءبارىن تەگىن ۇسىندىم، - دەدى تەمىرحان ساعىندىقوۆ.
پەداگوگ قىزدارىنا، باۋىرلارىنا ساندىقتى ءوز قولىمەن جاساپ بەردى. قازىر دە كەنجە قىزى مەن جيەنىنە ارناپ ەكى ساندىقتى ويۋمەن كومكەرىپ جاتىر.
- شەبەرلىك قايدان، كىمنەن دارىعان دەپ سۇراپ جاتادى. ءوز اتام سوعىستان ورالمادى. «ول اقىن بولعان، ونەرلى بولعان» دەپ ادامدار ءجيى ايتادى. سوعان قاراعاندا مەندەگى ونەر سول كىسىدەن دارىعان شىعار. نەگىزى ءوزىم قىزىعىپ، بار قىرىن كىتاپتان وقىپ، ءبىلدىم. قانشا زات جاساعانىمدى بىلمەيمىن، ارنايى ساناعان ەمەسپىن. بۇل وتە كۇردەلى جۇمىس. ماسەلەن رەترو ستيلدەگى شكافتى 2 جىل جاسادىم. ونى ماعان تاپسىرىس بەرىپ جاساتتى. قازىر ناقتى قايدا ەكەنىن بىلمەيمىن. ال ساندىقتى 1 جىل جاسايمىن. ساندىقتىڭ تومەنگى بولىگىندە تارتپالارى بار. ال بەرىندەگى ويۋدى ارنايى اعاش شەرەگە ويىپ، جونىپ الامىن. كەيىن ونى سىرلاپ، ساندىقتىڭ نەگىزگى بولىگىنە جەلىمدەيمىن. جان-جاعىن قاڭىلتىرمەن قاپتاپ، ونى دا ساندەيمىن. ءبارى شىدامدىلىق پەن تاباندىلىقتى قاجەت ەتەتىن جۇمىس. بوياۋعا ارنالعان قىلقالام كولەمى دە ماڭىزدى. ويۋدى ەرەكشە ەتىپ تۇرۋ ءۇشىن ءتۇستى تاڭداۋ ماڭىزدى. ءوزىم قوشقار مۇيىز، قۇس قاناتىمەن قاتار گەومەتريالىق فيگۋرالاردى قولدانامىن، - دەدى مۇعالىم.
تەمىرحان ساعىندىقوۆ ءوز ءۇيىنىڭ قاجەتتىلىگى دەپ ءتۇرلى بۇيىم جاساعانىمەن، كوپشىلىك قىزىعىپ، تاپسىرىس بەرەدى. ال ونى ورىنداۋعا ۋاقىت تاپشى بولعان سوڭ، كوبىنەن باس تارتادى.
دەگەنمەن شەبەرلەر قاتارىنا قوسىلىپ، ءتۇرلى بايقاۋعا قاتىسىپ ءجۇر. 2004، 2019 -جىلدارى «اۋەسقوي سۋرەتشىلەر مەن قولونەر شەبەرلەرىنىڭ» وبلىستىق بايقاۋلارىندا 3-ورىندى يەلەندى.
- العاشقى اسكەري دايىندىق پانىنە قاجەتتى بۇيىمداردى دا ءبىر كەزدەرى ءوزىم جاسادىم. اۆتوماتتىڭ، مىلتىقتىڭ ۇلگىسىن جاساعان كەزىم بولدى. بىزدە اۆتوماتتىڭ 15 ءتۇرىن ءوزىن ازىرلەدىم. سوعىس كەزىندەگى، قازىرگى كەزدەگى ۇلگىسىن دايىنداپ، بالالارعا تانىستىردىم. بايلانىس تەلەفونى، تانك ماكەتىن دە ساباقتا قولداندىم. ال سوڭعى جىلدارى مەكتەپ تاپسىرىسپەن دايىن قارۋ ماكەتتەرىن الدى. ءوزىم فۋتبول، تەننيس، توعىزقۇمالاق، دويبى دا وينايمىن. بىلتىر حوككەيدەن اۋدان بىرىنشىلىگىنە دە قاتىستىم. دەنە شىنىقتىرۋ پانىنەن ساباق بەرەتىن بولعان سوڭ بۇل دا وتە ماڭىزدى. سونىمەن بىرگە العاشقى اسكەري دايارلىق ءپانىنىڭ شتاتتان تىس وقىتۋشى- ۇيلەستىرۋشىسىمىن. اۋدانداعى جۇمىستاردى ۇيىمداستىرۋ كەزىندە بارلىعى 23 مەكتەپتەگى ارىپتەستەرىمە ادىستەمەلىك كومەك كورسەتەمىن. وبلىستىق العاشقى اسكەري جانە تەحنولوگيالىق دايارلىق اسسوتسياتسياسىنىڭ مۇشەسىمىن. مۇنىڭ ءبارى ۋاقىت پەن كاسىبيلىكتى قاجەت ەتەتىن جۇمىس، - دەدى ت. ساعىندىقوۆ.
ءۇش قىز، ءبىر ۇل تاربيەلەپ وتىرعان اكە ءارتۇرلى جىلدارى ءبىلىم سالاسىنىڭ مينيسترلەرىنەن العىس حات تا الدى.
2018 -جىلى «مەرەيلى وتباسى» ۇلتتىق بايقاۋىنىڭ وبلىستىق كەزەڭىنە قاتىسىپ، ماراپاتقا يە بولدى.
2018 -جىلى ماۋسىم ايىندا «ونەگەلى اكە» رەسپۋبليكالىق فورۋمىنا قاتىستى. ال بىلتىر «ۇزدىك پەداگوگ» اتاعىنا يە بولدى.
اۆتور
التىناي ساعىندىقوۆا
