اقتوبەدە ەلەكتر سىمدارىنا مۇز قاتىپ، بىرنەشە اۋىلدا جارىق ءسونىپ قالدى
اقتوبە. KAZINFORM - اقتوبە وبلىسى مۇعالجار اۋدانىندا ەلەكتر سىمدارىنا مۇز قاتىپ قالدى. سابىندىكول، اقسۋ اۋىلدارىندا باعانا قۇلاپ، جارىق ءسوندىرىلدى.
اقتوبەدە كۇن رايى كۇرت وزگەرىپ، مۇعالجار اۋدانىنداعى اۋىلداردا ەلەكتر سىمدارىنان مۇزدى قاعىپ ءتۇسىرۋ جۇمىسى ءجۇرىپ جاتىر. مۇنداي جۇمىس جۇرىن، قاراكول، سابىندىكول، اشىساي، قۇمساي، اقسۋ اۋىلدارىندا جۇرگىزىلدى.
- مەكەمەدە 30-جەلتوقسان جانە 8-قاڭتار ارالىعىندا كۇشەيتىلگەن رەجيمدە جۇمىس اتقارۋ بەكىتىلدى. اۋا رايىنىڭ كۇرت وزگەرۋىنە بايلانىستى اقتوبە قالاسىندا جانە قالادان تىس ايماقتارىنداعى اۋە جەلىلەرىندە اپاتتى جاعداي بولدى. وبلىس اۋداندارىندا قاتتى بوران مەن جەلدىڭ اسەرىنەن اۋە جەلىلەرىنىڭ بويىنا مۇزدىقتار قاتىپ، جارىقتىڭ بەرىلۋىندە شەكتەۋلەر بولدى. مەكەمە ماماندارى ەش كەدەرگىگە قاراماستان، اپات ورىن العان ايماقتاردا قالپىنا كەلتىرۋ جۇمىستارىمەن اينالىستى. ءوڭىر بويىنشا ديسپەتچەرلىك قىزمەتتەرگە 200 گە جاقىن وتىنىشتەر ءتۇسىپ، ماماندار ەشبىر قوڭىراۋدى نازاردان تىس قالدىرمادى. بۇگىنگى تاڭدا 70 تەن استام جۇمىسشى بريگادا جانە 130 عا تارتا تەحنيكا ەلەكتر ەنەرگياسىن قالپىنا كەلتىرۋ جۇمىستارىمەن اينالىسىپ جاتىر، - دەدى «ەنەرگوسيستەما» ج ش س ورتالىق ديسپەتچەرلىك قىزمەتىنىڭ باسشىسى بيسەن يمانالين.
مۇعالجار اۋدانىنداعى سابىندىكول، اقسۋ اۋىلدارىندا جارىق ەرتەڭ عانا جانۋى مۇمكىن.
- كەي جەرلەردە ديامەترى 15-20 س م بولاتىن مۇز قاتقان. سالدارىنان ەلەكتر سىمدارى ءۇزىلىپ جاتىر. قازىرگى تاڭدا سابىندىكول، اقسۋ اۋىلدارىندا باعانالار قۇلاپ، جارىق ءوشىپ تۇر. قاجەتتى ماتەريالدار اكەلىندى. 6-قاڭتار كۇنى تاڭدا قالپىنا كەلتىرۋ جۇمىسى جالعاسادى. 24 ساعات بويى جۇمىس اتقارىلىپ جاتىر. سونداي-اق ەرتەڭ ورقاش، اشىساي، قۇمساي اۋىلدارىندا ساعات 9:00-18:00 ارالىعىندا جارىق ۋاقىتشا سوندىرىلەدى. جوندەۋ جۇمىستارىن جالعاستىرۋىمىز كەرەك، - دەدى مۇعالجار اۋدانىنىڭ اكىمى دارحان ەرماعامبەتوۆ.
ونىڭ ايتۋىنشا، كەيبىر جەرلەردە لينيا باسىنداعى مۇزدى ءتۇسىرىپ، قايتا اينالىپ قاراسا تاعى قاتىپ قالعانىن كورۋگە بولادى.
ايتا كەتەيىك، اقتوبەدە تۇرعىندار ءۇشىن سۋمەن قامتۋ تاريفى 24,70 تەڭگەگە، ال جىلىمەن قامتۋ 37 تەڭگەگە كوتەرىلدى.
اۆتور
التىناي ساعىندىقوۆا
