اقتوبەدە كيىك ەتى ساتىلىمعا شىعارىلدى
اقتوبە قالاسىنداعى «ايبەك» اۋىل شارۋاشىلىعى وندىرىستىك كووپەراتيۆى مەن شارۋاشىلىق يەسى مالىك سماعۇلوۆ كەلىسىمگە كەلىپ، كيىك ۇشاسىن ساتا باستادى.
باتىس قازاقستان وبلىسىنان تاسىمالدانىپ جاتقان كيىك ەتىنىڭ كەلىسى 1500 تەڭگە دەپ باعالانعان، دەپ حابارلايدى Kazinform.
اقتوبە قالاسىنىڭ 41-رازەزد اۋماعىندا ورنالاسقان «ايبەك» اۋىل شارۋاشىلىعى وندىرىستىك كووپەراتيۆى كيىكتى سويىپ بەرەدى. سونىمەن بىرگە ساتۋعا ارنالعان ورىن ۇسىنىپ وتىر. ال وزگە جۇمىستىڭ ءبارى اڭ شارۋاشىلىعىنىڭ يەسى مالىك سماعۇلوۆتىڭ ەنشىسىندى. ول كيىك اتۋ ءۇشىن اقتوبەدەن باتىس قازاقستان وبلىسىنا ەكى بريگادا اپارعان.
- ءوزىم كاسىبي اڭشىمىن. 40 جىلدىق تاجىريبەم بار. ۇكىمەت كيىك اتۋعا رۇقسات بەرگەن سوڭ «وحوتزووپروم» ر م ق ك حابارلاسىپ، جاعدايدى ءبىلدىم. ولار دا نەگىزگى تالاپتاردى اتادى. سودان ءوز قىزمەتكەرلەرىمنەن 13 ادام، ياعني، ەكى بريگادا اپاردىم. ءبىز باتىس قازاقستان وبلىسى كازتالوۆكا اۋىلىنا باردىق. سول جەردە الدىمەن 825 باس كيىك اتىلدى. ونى اقتوبەگە اكەلگەنىمىزبەن، ساتۋعا رۇقسات بەرىلمەدى. نەگىزى ەت كومبيناتىمەن ارادا كەلىسىم بولعان ەدى،- دەدى مالىك سماعۇلوۆ.
ەسكە سالساق، قاراشا ايىندا اقتوبەگە 800 دەن استام كيىك ۇشاسى اكەلىندى. اقتوبە وبلىسى اكىمىنىڭ باسپا ءسوز قىزمەتى مال سويۋ ورىندارى قابىلداۋعا دايىن ەمەس دەپ، كەرى قايتارعانىن حابارلادى. الايدا ول كيىك ۇشاسى كەيىن قايتارىلماعان، اقتوبە وبلىسى اۋماعىنا كومىلگەن.
- ول كەزدە ەكى كۇن وتكەن سوڭ رەفريجەراتور، ياعني، توڭازىتقىش ىستەن شىقتى. ءسويتىپ 50 باس كيىك بۇزىلىپ كەتىپ، ءبارىن ۋتيليزاتسياعا جىبەرۋگە ءماجبۇر بولدىق. قوقىس پوليگونى قىمبات بولىپ، قوبدا اۋدانىنداعى كارەرگە كومدىك. سودان كەيىن 351 باس اكەلدىم. ول ءبىر كۇندە ءوتىپ كەتتى. بۇگىنگىسى 407 باس. ول دا ءبىر كۇندە وتەدى دەپ جوسپارلاپ وتىرمىز. قۇنى كەلىسىنە 1 500 تەڭگە،- دەدى مالىك سماعۇلوۆ. ونىڭ ايتۋىنشا، ب ق و- دا ساعات 19:00 دەن تاڭعى 6:00 گە دەيىن كيىك اۋلاۋعا رۇقسات بەرىلەدى. اڭشىلاردىڭ جانىندا ينسپەكتورلار ەرە ءجۇرىپ، ءار كيىكتىڭ ءمۇيىزىن كەسىپ الادى.
- كۇندىز اتۋعا رۇقسات جوق. ال تۇندە سوڭىمىزدا تراكتور، گازەل جۇرەدى. اتقان كيىكتەر باۋىزدالادى، ىشەك- قارنى الىنادى. كەيىن ءبىر ءتۇن سالقىن جەردە ۇستاپ، توڭازىتقىشقا سالامىز. ونداعى تەمپەراتۋرا -19-20 گرادۋس. ەكى كۇن ساقتالادى. سەبەبى 400-500 باستى كيىكتى ءبىر كۇندە اۋلاۋ مۇمكىن ەمەس. ءبىر كۇندە ەت كومبيناتىنا اكەلىپ سويدىرامىز. حالىقتان سۇرانىس كوپ. بىزگە 10-جەلتوقسانعا دەيىن اتۋعا رۇقسات بەرىپ تۇر، -دەدى ول.
قازىرگى كەزدە اقتوبەلىكتەر كيىكتى ۇشاسىمەن ساتىپ الىپ جاتىر. ءار ساتىپ الۋشىعا جونەلتپە حات بەرىلىپ، وندا كەلىسى مەن قۇنى جازىلادى.
ايتا كەتەيىك، شارۋاشىلىق كيىكتىڭ كەلىسىنە مەملەكەتكە 315 تەڭگە تولەيدى. العاش اتىپ العان 825 باس كيىكتىڭ شىعىنى 5,5 ميلليون تەڭگەگە جۋىقتاعان.
