اقتوبەدە كەپىلگە الىنعان ۇيدەن ەكى ادام قايتىس بولدى

اقتوبە. KAZINFORM - اقتوبەدە تۇندە كەپىلدە بولعان ءۇش ادامنىڭ ەكەۋى كوز جۇمدى. بىرەۋى اۋرۋحانادا جاتىر.

медпункт
Фото: Артем Викторов / Kazinform

اقتوبەدە وبلىستىق پ د باستىعى سوڭعى اقپاراتتى تاراتتى.

- وقيعا بولعان جەردى زەردەلەۋ بارىسىندا جەرتولەدە پىشاق جاراقاتتارىمەن ەگدە جاستاعى اتا-اناسى تابىلدى. وكىنىشكە قاراي، زارداپ شەككەندەردىڭ ءبىرى تاسىمالداۋ كەزىندە، ال ەكىنشىسى اۋرۋحانادا كوز جۇمدى. ءۇشىنشى جابىرلەنۋشىگە دارىگەرلەر بارلىق قاجەتتى مەديتسينالىق كومەك كورسەتىپ جاتىر. بۇل فاكتى بويىنشا قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى. پوليتسيا دەپارتامەنتى قازا تاپقانداردىڭ تۋىستارى مەن جاقىندارىنا كوڭىل ايتادى. كىنالى ادام زاڭنىڭ بارلىق قاتاڭدىعىمەن جازالاناتىن بولادى، - دەپ حابارلادى وبلىستىق پ د باستىعى اباي ءجۇسىپوۆ.

ايتا كەتەيىك، وقيعا 13- قاڭتار كۇنى ساعات 20:00 شاماسىندا بولدى. حابارلاما جەدەل باسقارۋ ورتالىعىنا ءتۇستى.

- جەدەل تەرگەۋ توبى مەن ارنايى بولىمشەلەر وقيعا ورنىنا دەرەۋ جەتتى. جەدەل قىزمەتتەر كەلگەن بويدا ءبىر ايەلدىڭ كەپىلگە الىنعانى بەلگىلى بولدى. ولار كۇدىكتىمەن تانىس بولعان. بۇل رەتتە كۇدىكتى قانداي دا ءبىر تالاپتار قويعان جوق. ءۇش ساعاتتىق كەلىسسوزدەردەن كەيىن جانە كۇدىكتى كەپىلگە الىنعان ادامدى بوساتۋ تۋرالى تالاپتاردى ورىنداۋدان باس تارتقاننان سوڭ شابۋىل جاساۋ تۋرالى شەشىم قابىلداندى. ارنايى وپەراتسيا ناتيجەسىندە كۇدىكتى ۇستالىپ، كەپىلگە الىنعان ايەل بوساتىلدى، - دەدى اباي ءجۇسىپوۆ.

 

سوڭعى جاڭالىقتار