اقتوبەدە جوعالعان ەرەكشە بالانى 500 گە جۋىق ادام ىزدەپ جاتىر

اقتوبە. KAZINFORM - اقتوبە قالاسىندا كەشەدەن بەرى 13 جاستاعى كارىم جەتىرۋ ىزدەستىرىلىپ جاتىر. ەرەكشە كۇتىمدى قاجەت ەتەتىن جاس ءوسپىرىمدى سۋدان دا، ورمان مەن دالالى جەردەن دا ىزدەۋگە 500 گە جۋىق ادام جۇمىلدىرىلدى.

كارىم جەتىرۋ كەشە ساعات 17:00 شاماسىندا اجەسىنىڭ ۇيىنەن كەتكەن. ونىڭ اۋلادان شىعىپ، بەلگىسىز باعىتقا قاراي بەت العانى كورشى ءۇيدىڭ بەينەباقىلاۋ كامەراسىنا ءتۇسىپ قالعان. پوليتسيا مەن ەرىكتىلەر سودان بەرى ىزدەۋ جۇمىسىن توقتاتقان جوق.

كارىم جەتىرۋدى ىزدەستىرۋ جۇمىسى جالعاسىپ جاتىر. بالانى ىزدەۋگە 500 گە جۋىق ادام تارتىلدى. ونىڭ ىشىندە پوليتسيا، توتەنشە جاعدايلار قىزمەتكەرلەرى بار. ەرىكتىلەر مەن قىزمەتتىك يتتەر دە جۇمىلدىرىلدى.

- بارلىعى 40 تەحنيكانى ىزدەۋ جۇمىسىنا قوسىپ وتىرمىز. اتاپ ايتقاندا 3 كۆادروتسيكل، 2 قايىق، 4 اتتى پوليتسيا، دروندار دا بار. پوليتسياعا حابار تۇسكەن ساتتەن باستاپ ءۇي اۋلالارى، شاتىرلار، كارىز شۇڭقىرلارى، ورمان جانە دالالىق تەكسەرىلىپ جاتىر. قوعامدىق تاماقتانۋ ورىندارى مەن دۇكەندەر، ساۋدا ورىندارى تەكسەرىلۋدە، - دەدى اقتوبە قالالىق پوليتسيا باسقارماسىنىڭ باستىعى اسەت قاليەۆ.

فوتو: اقتوبە وبلىستىق پ د باسپا ءسوز قىزمەتى

ونىڭ ايتۋىنشا، بالا تۇراتىن اۋماق كارتادان بەلگىلەنىپ، پوليتسيا ول جەرلەردى تولىق شولىپ شىقتى. ىزدەۋ جۇمىسى ارى قاراي جالعاسا بەرەدى.

اۆتور
التىناي ساعىندىقوۆا