اقتوبەدە جۇرگىزۋشىلەر تاسىمالداۋ قىزمەتىن تەگىن اتقارىپ ءجۇر
اقتوبە. KAZINFORM - اقتوبەدە گازەل جۇرگىزۋشىلەرى گۋمانيتارلىق كومەك ورتالىقتارىنداعى جۇكتى تەگىن تاسىمالداپ ءجۇر.
سۋ تاسقىنى باستالعان ساتتەن-اق گۋمانيتارلىق كومەك ورتالىقتارى اشىلىپ، ولارعا الدىمەن وڭىردەگى گازەل جۇرگىزۋشىلەرى قولۇشىن سوزدى.
ەرىكتىلەر مەن گۋمانيتارلىق ورتالىق ماماندارى، جۇك تاسىمالداۋ كولىگىنىڭ يەلەرى ورتاق چاتتا وتىرىپ، بار ۇيىمداستىرۋ جۇمىستارىندا بەلسەندىلىك تانىتتى.
حابارلاما تۇسكەن ساتتە-اق كومەككە كەلەتىن ولار اۋدان، اۋىلدارعا دا باردى.
- ەرىكتىلەر جەتكىزىلگەن جۇكتى قابىلداپ، سۇرىپتاپ، تيەۋگە دايىنداپ قويادى. اكىمدىك كەستەسى بويىنشا اۋداندارعا تىكۇشاقپەن دە، گازەلمەن دە جۇك جىبەردىك. بۇگىنگە دەيىن 40-50 گازەل جۇك تاسىمالداندى. كولىك يەلەرى اقشا سۇرامادى، جانار-جاعارماي قايدا دەمەدى. «ويىل اۋدانىنا 4 گازەل كەرەك» دەپ جازامىز، وزدەرى كەلەدى. فوتوعا تۇسىرەمىز، ولار اپارىپ تاپسىرادى. سونىمەن بىرگە جەڭىل كولىك يەلەرى دە سونداي قىزمەت اتقارىپ ءجۇر، - دەدى اقتوبە وبلىسى اكىمى اپپاراتى باسشىسىنىڭ ورىنباسارى ءلاززات ورازبايەۆا.
ايتا كەتەيىك، بۇگىن اقتوبەگە ءانشى ديماش قۇدايبەرگەن كەلىپ، 40-ورتا مەكتەپتەگى ەۆاكۋاتسيالىق پۋنكتكە باردى. وندا تۇرعىندارمەن كەزدەستى.
سونىمەن بىرگە گۋمانيتارلىق كومەك ورتالىعىنداعى جۇمىسپەن تانىستى. مۇندا ەرىكتىلەر كۇنى-ءتۇنى جۇمىس ىستەپ ءجۇر.
