اقتوبەدە جۇمىسقا شىققان ءبىر توپ اۋىل تۇرعىنى قار قۇرساۋىندا قالدى
اقتوبە. KAZINFORM -اقتوبەدە مۇعالجار اۋدانى قۇمساي اۋىلىنىڭ تۇرعىندارى تاڭنان بەرى قار قۇرساۋىندا تۇر.
ۆاحتالىق ادىسپەن جۇمىس ىستەيتىن تۇرعىندار جىل سايىن وسى كۇيگە ءتۇسىپ، قيىندىق كورەتىنىن ايتتى.
مۇعالجار اۋدانى قۇمساي اۋىلىنىڭ تۇرعىندارى اۋدان ورتالىعىنا 210 شاقىرىم جول ءجۇرىپ بارۋى ءتيىس. ال تۋرا جول 110 شاقىرىمدى قۇرايدى. قىستا اينالما جولدى پايدالاناتىن ولار قازىر ورتا تۇسىندا قالىپ، كومەك كۇتىپ وتىر.
- قۇمساي اۋىلىنان ەمبى قالاسىنا دەيىن - 90 شاقىرىم. ءبىز قازىر سول قالاعا جەتە الماي، جولدا تۇرمىز. قار ارشۋى ءتيىس مەردىگەر كومپانيانى مۇلدە كورمەدىك، جولدى بىردە ءبىر رەت تازارتپادى. بىرنەشە جىلدان بەرى اۋىل ادامدارى ءوز كۇشىمەن ءجۇر. اۋدان ورتالىعى قاندىاعاش قالاسىنا بارار جولدا دا قاتىناس جوق. ول - 110 شاقىرىم. ورتالىققا ەمبى قالاسى ارقىلى بارساڭ 210 شاقىرىم جول جۇرەسىڭ. قازىر جۇمىسىمىزعا جەتە الماي، كولىك ىشىندە وتىرمىز. اۋىلدان 15 شاقىرىم جەردە تۇرمىز. بارلىعى - ءتورت كولىك. ءبارى دە ۆاحتالىق ادىسپەن جۇمىس ىستەيتىن ادامدار، ستۋدەنتتەر. تاڭعى ساعات 7:30 دا شىقتىق. مەردىگەر قاشان جول تازالايدى دەپ ۇيدە جاتامىز با؟ جۇمىسقا بارۋىمىز كەرەك، سوندىقتان جولعا شىقتىق. جانىمىزعا شارۋا قوجالىعىنىڭ تراكتورى كەلدى. ونىڭ جول تازالاۋعا قاتىسى بولماسا دا، سونىڭ سوڭىنان ەرەمىز دەپ ۇمىتتىنەمىن،- دەدى قۇمساي اۋىلىنىڭ تۇرعىنى ەسەت وسپانوۆ.
مۇعالعار اۋداندىق اكىمدىگى بۇگىنگە دەيىن جولدى قار باسپاعانىن ايتتى. 1-اقپاندا بوراپ، قاتىناس قيىنداعان. اۋا رايىنىڭ وزگەرىستەرى تۋرالى حابارلاما بەرىلگەنىمەن، تۇرعىندار جولعا شىعىپ كەتكەن.
- كولىكتى شىعارىپ جىبەرۋ ءۇشىن تەحنيكا جىبەرىلدى. ءازىر بوران سوعىپ تۇر، جولدى تازارتقانمەن بىردەن باسىپ قالادى. قار تازالايتىن مەردىگەر بۇگىن انىقتالىپ جاتىر،-دەدى مۇعالعار اۋدانىنىڭ اكىمى دارحان ەرماعامبەتوۆ.
