اقتوبەدە جاپپاي توبەلەستەن سوڭ 6 ادام قاماۋعا الىندى

  اقتوبەدە تۇندە بولعان جاپپاي توبەلەسكە قاتىسقان 6 ادام قاماۋعا الىندى. قىلمىستىق ىستەن سوڭ پروتسەسس پروكۋرورى تاعايىندالدى، دەپ حابارلايدى Kazinform.

اقتوبە قالاسىنىڭ قىزىلجار تۇرعىن الابىنداعى جاپپاي توبەلەستەن سوڭ قىلمىستىق كودەكستىڭ «كىسى ءولتىرۋ» بابى بويىنشا ءىس قوزعالدى. قىلمىستىق ءىستى وبلىس پروكۋرورى باقىلاۋىنا الدى.

- وقيعا قىزىلجار تۇرعىن الابىندا ورنالاسقان «الماز» دۇكەنىنىڭ جانىندا بولدى. وندا پوليتسيا باسقارماسىنىڭ جەدەل-تەرگەۋ توبى مەن وبلىس پروكۋراتۋراسىنىڭ باسشىلىعى باردى. دەرەكتەرگە سۇيەنسەك، Instagram جەلىسىندە ا. جانە ۆ. اراسىندا جانجال تۋىندادى. ناتيجەسىندە كامەلەتكە تولماعان ۆ. كەلەسى كۇنى «الماز» دۇكەنىنىڭ جانىندا كەزدەسۋدى ۇسىنعان. 2-قاڭتار كۇنى ساعات 23:00 شاماسىندا ا. جانە س. پىشاق جاراقاتىن العان. ەكەۋى دە ەسىن جيماستان كوز جۇمدى. قىلمىستىق ءىس بويىنشا پروتسەسس پروكۋرورى تاعايىندالدى. تەرگەۋ بارىسى وبلىس پروكۋرورىنىڭ جەكە باقىلاۋعا الدى،-دەپ حابارلادى اقتوبە وبلىسى پروكۋرورىنىڭ باسپا ءسوز قىزمەتى.

ايتا كەلەيىك، اقتوبە وبلىستىق كوپسالالى اۋرۋحاناعا بارلىعى 4 ادام جەتكىزىلگەن. 2006-جىلعى ەكى جىگىت بىرنەشە جەردەن جارالانىپ، كوز جۇمدى.

- 2004-جىلى تۋعان ەر ادام حيرۋرگيا بولىمىنە جاتقىزىلدى. ونىڭ سول جاق جاۋىرىنىندا تەسىپ- كەسىلگەن جاراقاتى بار. وتا جاسالدى. جاعدايى ورتاشا اۋىل. ال 2004-جىلعى تاعى ءبىر ناۋقاس سول جاق يىعىنان جارالانعان. ول امبۋلاتورلى تۇردە ەم الۋ ءۇشىن ۇيىنە جىبەرىلدى،- دەدى اقتوبە وبلىستىق دەنساۋلىق ساقتاۋ باسقارماسىنىڭ باسشىسى رۇستەم يسايەۆ.

اقتوبە وبلىستىق پ د باسپا ءسوز قىزمەتىنىڭ حابارلاۋىنشا، جاپپاي توبەلەسكە بارلىعى 10 ادام قاتىسقان. ونىڭ التاۋى قاماۋعا الىندى.