اقتوبەدە فۋتبولدان جارىسقا بارا جاتقان بالالار جول-كولىك اپاتىنان كوز جۇمدى
اقتوبە. KAZINFORM - اقتوبەدە جەڭىل جانە جۇك كولىگى سوقتىعىسىپ، 6 ادام كوز جۇمدى. ونىڭ ۇشەۋى - وقۋشى. ولاردىڭ فۋتبولدان وتەتىن جارىسقا بارا جاتقانى بەلگىلى بولدى.
اقتوبەدەن ماڭعىستاۋداعى جارىسقا بارا جاتقان بالالار جول- كولىك اپاتىنا ۇشىرادى.
- «سامارا- شىمكەنت» حالىقارالىق ماڭىزى بار تاس جولىنىڭ حرومتاۋ اۋدانىنىڭ اۋماعىندا Toyota Ipsum جانە MAN ماركالى جۇك كولىگى سوقتىعىستى. سالدارىنان Toyota Ipsum اۆتوكولىگىنىڭ جۇرگىزۋشىسى جانە ونىڭ 5 جولاۋشىسى، ونىڭ ىشىندە ءۇش بالا سول جەردە قايتىس بولدى. مالىمەت بويىنشا بالالار مەن اتا-انالار باسقا وبلىسقا فۋتبولدان جارىسقا قاتىسۋعا جولعا شىققان. ولار مەملەكەتتىك ورگاندارعا حابارلانعان جوق. وسى فاكتى بويىنشا سوتقا دەيىنگى تەرگەۋ باستالدى، - دەدى اقتوبە وبلىستىق پ د ج پ ك ب ايدوس قۇلجانوۆ.
ايتا كەتەيىك، ماڭعىستاۋدا ۇيىمداستىرىلعان جارىسقا بالالار ايتەكە بي اۋدانى قاراشاتاۋ اۋىلىنان شىققان.
- قازىر دەمالىس كەزى. ءتۇرلى جەكە قورلار، كاسىپكەرلەردەن سايىس وتكىزۋ تۋرالى اقپارات تۇسەدى. اقتوبە وبلىستىق ءبىلىم باسقارماسى، وبلىستىق دەنە شىنىقتىرۋ جانە سپورت باسقارماسىنىڭ ارنايى رۇقساتىنسىز مۇنداي شاراعا قاتىسۋ ۇلكەن قاۋىپ توندىرەدى. ەگەر ءبىز ۇيىمداستىرساق، ارنايى پوليتسيا الىپ جۇرەدى. بۇل جاعدايدا بالالار جەكە قايىرىمدىلىق قورى ۇيىمداستىرعان فۋتبول تۋرنيرىنە ساپارعا شىققان. ماڭعىستاۋ وبلىسىنا بەت العان. اتا-انالارى دا بالالارمەن بىرگە بولعان، - دەدى اقتوبە وبلىستىق ءبىلىم باسقارماسىنىڭ باسشىسى جايىق سۇلتان.
الدىن الا بەلگىلى بولعان مالىمەتتەرگە سۇيەنسەك، وقيعا ورنىندا قازا بولعاندار اراسىندا 1987 -جىلعى ەر ازامات پەن ونىڭ ەكى بالاسى بار. تاعى ءبىر بالانىڭ كىم ەكەنى انىقتالىپ جاتىر. بالالار 6-7-سىنىپ وقۋشىلارى بولۋى مۇمكىن.
تۋرنير ەرەجەسى بويىنشا 2013 -جىلى تۋعان بالالار شاقىرىلعان. ازىرگە وزگە كولىكپەن تاعى دا بالالاردىڭ جولعا شىعۋى مۇمكىن دەگەن اقپارات تەكسەرىلىپ جاتىر. وسى وقيعادان سوڭ قىلمىستىق كودەكستىڭ 345-بابى بويىنشا ءىس قوزعالىپ، تەرگەۋ ءجۇرىپ جاتىر. جۇك كولىگىنىڭ جۇرگىزۋشىسى ءدىن امان.
