اقتوبەدە بيىل 35 مىڭ ورىندىق ستاديون مەن زاماناۋي تەاتر قۇرىلىسى باستالادى
اقتوبە. KAZINFORM - اقتوبە قالاسىندا ەلىمىز بويىنشا ەڭ ۇلكەن ستاديون قۇرىلىسى باستالادى. سونىمەن بىرگە تەاتر سالىنادى.
اقتوبە وبلىسىندا بيىل ءىرى قۇرىلىس جۇمىستارى باستالادى. مەملەكەت باسشىسى قاسىم-جومارت توقايەۆتىڭ تاپسىرماسى بويىنشا زاماناۋي تەاتر سالىنادى.
- ت. احتانوۆ اتىنداعى دراما تەاتر ەسكى عيماراتتا ورنالاسقان. عيمارات 1944-جىلى سالىنعان. قازىرگى كەزدە وندا قازاق جانە ورىس ترۋپپاسى دايىندىق وتكىزىپ، قويىلىمداردى ساحنالايدى. پرەزيدەنت كەلگەن ۋاقىتتا مادەنيەت جاناشىرلارى ۇسىنىس ايتىپ، قولداۋ تاپتى. وبلىس اكىمىنە تاپسىرما بەردى. قازىرگى كەزدە جوبالاۋ جۇمىسى باستالدى. ول ءۇشىن وبلىستىق بيۋجەتتەن قارجى دا ءبولىندى. بيىل مامىر ايىندا جوبالىق-سمەتالىق قۇجاتى اياقتالسا، مەملەكەتتىك ساراپتاماعا جىبەرىلەدى. جوسپار بويىنشا قۇرىلىس جۇمىسى ءۇشىنشى توقساندا باستالىپ، كەلەر جىلى اياقتالادى. تەاتر اقتوبە قالاسىنىڭ التىن وردا شاعىن اۋدانىندا ورنالاسادى. جوبالاۋ جۇمىستارىنا وبلىستىق بيۋجەتتەن 200 ميلليون تەڭگەدەن استام قارجى ءبولىندى. ول جەرگە وزگە دە الەۋمەتتىك نىساندار سالىنادى، - دەدى اقتوبە وبلىستىق قۇرىلىس، ساۋلەت جانە قالا قۇرىلىسى باسقارماسى باسشىسىنىڭ ورىنباسارى اسلان جاراسبايەۆ.
ونىڭ ايتۋىنشا، تەاتر 700 ورىندىق بولادى. ۇلكەن جانە كىشى زالى قاراستىرىلادى. سونىمەن بىرگە جاڭا تەاتر ماڭىندا ساياباق پەن ستاديون سالىنادى.
- اقتوبەدە 35 مىڭ ورىندىق ستاديون سالىنادى. ۋ ە ف ا ستاندارتىنا ساي بولادى. ءارى ازىرگە ەلىمىزدەگى ەڭ ۇلكەن ستاديون بولادى. قازىرگى كەزدە جوبالاۋ جۇمىسى ءجۇرىپ جاتىر. كەيىن ناقتى قارجى كولەمى بەلگىلى بولادى. سونىمەن بىرگە قالادا 5 مىڭ ورىندىق سپورت كەشەنى سالىنادى. مۇندا سپورتتىڭ بارلىق تۇرىمەن اينالىسۋعا بولادى، - دەدى اسلان جاراسبايەۆ.
ەسكە سالساق، بىلتىر پرەزيدەنت ساپارى كەزىندە جاڭا تەاتر سالۋدى تاپسىردى.
