اقتوبەدە الەۋمەتتىك ازىق-تۇلىكتىڭ شەكتى باعاسى بەكىتىلەدى
اقتوبە. KAZINFORM - اقتوبە وبلىسىندا الەۋمەتتىك ماڭىزى بار ازىق-تۇلىك باعاسىنىڭ شەكتى ءمانىن بەكىتۋ قاۋلىسى جاريا تالقىلاۋعا شىقتى. وندا كارتوپتىڭ كەلىسى 285، قانتتىڭ كەلىسى 510 تەڭگە دەپ كورسەتىلگەن.
اشىق ن ق ا پورتالىندا اقتوبە وبلىسى بويىنشا 2025-جىلعى 1-توقسانعا ارنالعان الەۋمەتتىك ماڭىزى بار ازىق-تۇلىك تاۋارلارىنىڭ بولشەك ساۋداداعى باعاسىنىڭ شەكتى ماندەرى تالقىعا ءتۇستى. وندا باعانىڭ بىلتىرعىعا قاراعاندا كوتەرىلگەنىن، كەيبىرىنىڭ ارزانداعانىن كورۋگە بولادى.
پورتالداعى مالىمەتكە سۇيەنسەك، 1-سۇرىپتى ءبيداي ۇنىنىڭ كەلىسى 223 تەڭگە دەپ كورسەتىلگەن. ال 2024-جىلدىڭ Ⅱ توقسانىندا كەلىسى 228 تەڭگە دەپ بەكىتىلگەن. سونىمەن بىرگە كۇنباعىس مايىنىڭ ليترى 753 تەڭگەدەن اسپاۋى ءتيىس. بىلتىر كارتوپتىڭ كەلىسى 200 تەڭگە دەپ بەكىتىلسە، بيىل ءبىرىنشى توقساندا 285 تەڭگە كورسەتىلگەن. بيىل الەۋمەتتىك ماڭىزى بار ازىق-تۇلىك تاۋارلارىنا بولشەك ساۋدا باعالارىنىڭ شەكتى ءمانىن بەكىتۋ كەزىندە ءسابىزدىڭ كەلىسى 255، پياز 241، قىرىققابات 222 تەڭگە دەپ الىندى. قانت باعاسى 510 تەڭگە دەپ كورسەتىلگەن.
- ۇن باعاسىن بەكىتكەندە ۇن وندىرەتىن، ساتاتىن كومپانيالاردان باعانى سۇرايمىز. وندا ۇن ءوندىرۋدىڭ بارلىق شىعىنى قوسا ەسەپتەلگەن. ءبارىن قوسىپ، ورتاشا باعا شىعارىلادى. دەمەك وسى توقساندا بازارداعى باعا كەلىسىنە 223 تەڭگەدەن اسپاۋى ءتيىس. قاۋلى كۇشىنە ەنگەندە ءبىز وسىنى تالاپ ەتە الامىز. ال قانتتىڭ قۇنىن بەكىتكەن كەزدە كوتەرمە ساۋداداعى باعانى الامىز. ولار وزدەرى ساتىپ الادى، جەتكىزۋ قۇنىن قوسادى. ءبارىن ەسەپتەگەندە باعا 510 تەڭگەدەن جوعارى بولماۋىس ءتيىس. جالپى باعا نارىقتا بۇدان ارزان بولۋى مۇمكىن، ءبىراق جوعارى بولا المايدى، - دەدى اقتوبە وبلىستىق كاسىپكەرلىك باسقارماسىنىڭ باسشىسى الماس سالىقبايەۆ.
ەسكە سالساق، بيىلدان باستاپ وڭىردە سۋ جانە جىلۋمەن جابدىقتاۋ تاريفى وزگەردى.
