اقتوبەدە 90 جاستاعى اجە ءالى كۇنگە دەيىن ءىس تىگىپ، تارى قايناتادى
اقتوبە. KAZINFORM - اقتوبەلىك باتىر انا ءبيبىجان كادىرباي قىزى 36 جاسىندا جەسىر قالىپ، 9 بالانى ءوزى باقتى. بار بولعانى 7 سىنىپ وقىپ، 20 جىل بويى قوي باققان اجە Kazinform تىلشىسىنە ەڭبەك جولى مەن ۇرپاعى تۋرالى ايتىپ بەردى.
بالالارىمدى ەشكىمگە الاقان جايماي ءوسىردىم - 90 جاستاعى اجە
ءبيبىجان كادىرباي قىزى اقتوبە وبلىسى ىرعىز اۋدانىنىڭ تۋماسى. اكەسى كادىرباي جىلقىشى بولدى، اناسى كولحوزدا ەڭبەك ەتتى. ءتورت اعايىندى بولىپ ءوستى. وتكەندى ەسكە العان قاريا اتاسىنىڭ ەڭبەكقور، اجەسىنىڭ شەبەر بولعانىن ايتىپ بەردى.
- شەشەم كولحوزدىڭ بۇكىل جۇمىسشىسىنا اسپاز بولعان ادام. تارى قۋىرىپ، ءتۇيىپ، قورەك قىلدى. ەكى اپام تۇرمىس قۇرىپ، اعام اسكەرگە كەتتى. مەن 7 سىنىپتى عانا وقىدىم. ول كەزدە 18 جاسقا تولىپ، تورعاي قورىدىم. ءسويتىپ ەگىن القابىنداعى قۇستاردى ۇركىتەمىز. سول كەزدە ءبىز كولحوزدىڭ بەلسەندى جۇمىسشىسى ەدىك. اكە-شەشەمىز دە، بالالار دا جۇمىستا بولدى. ءسويتىپ 19 جاسىم تۇرمىسقا شىقتىم. ءوزىم 20 جىل بويى شوپاننىڭ كومەكشىسى بولدىم. ول كەزدە 100 قويدان، 135 قوزى الدىم. 1970 -جىلى «قاجىرلى ەڭبەگى ءۇشىن» مەدالىن بەردى. 1972 -جىلى جولداسىم ومىردەن ءوتتى. مەن 9 بالامەن جالعىز قالدىم، ەشكىمنەن كومەك سۇرامادىم. جارما اۋىلىنا كوشىپ كەلگەندە بالامنىڭ ۇلكەنى 9-سىنىپتا وقىدى، كىشكەنتايى 7 اي بولدى. ۇلكەن ۇلىم ءبىزدى اسىراۋ ءۇشىن تراكتور جۇرگىزۋشىسى ماماندىعىن مەڭگەردى. كىشكەنتاي عوي، تراكتورعا سۋ قۇيۋعا بويى جەتپەيتىن ەدى. سۋ قۇيىپ، شىعارىپ سالىپ، جولىنا قاراپ وتىراتىن بولدىم. ءبىر جىل وتىرىپ، جەرگىلىكتى باسشىلاردان جۇمىس سۇراپ باردىم. ءۇي بەردى، بالام تراكتور ايدادى، ءوزىم مەكتەپكە اسپاز بولىپ ورنالاستىم. قويشىلاردىڭ بالالارىنا ارنالعان مەكتەپ- ينتەرناتتا 20 جىل اسپاز قىزمەتىن اتقاردىم ءارى 8 پەشكە وت جاعىپ، كۇلىن شىعارامىن. تۇنىمەن سۋ تاسيمىن، 31 نان پىسىرەمىن. سوندا بار بولعانى ەكى-اق ساعات دەمالاتىن ەدىم. ەشكىمگە الاقان جايماي بالالارىمدى ءوسىردىم، - دەدى قاريا.
بۇگىندە 5 ۇل مەن 4 قىزدان 20 دان استام نەمەرە، 50 دەن استام شوبەرە ءسۇيىپ وتىر. قاريا تۋعان-تۋىستارى، كورشى- قولاڭ قيىن ساتتە كومەك بەرگەنىن ايتتى. تۇڭعىشى وتان الدىنداعى بورىشىن وتەپ كەلگەن سوڭ تۇرمىس تۇزەلە باستادى. نەمەرەلەرىن بىلىمگە قۇشتار ەتتى، ءتىپتى بۇگىنگى كۇنگە دەيىن ساباقتارىن وقىتادى. ءوزى سەكىلدى بالالارى مەن نەمەرەلەرى دە شەبەر، قولىنان ءىس كەلەدى.
- ومىرگە وكپەلەمەيمىن، ءبارى اياقتاندى، وتباسىلى بولدى. وزگەسى تاعدىردىڭ ءىسى. بالالارىم جاستايىنان ەڭبەكتەنىپ ءوستى. سيىر ساۋدى، سۇتتەن ءتۇرلى تاعام دايىندادى. بالالارىم عانا ەمەس، كەلىندەرىمنىڭ دە قولىنان ءىس كەلەدى. ءوزىم 50 جاسىمدا بالا سانىمەن زەينەتكە شىقتىم. ءبىراق زەينەتكە شىقتىم دەپ قاراپ وتىرمادىم. قالاعا كوشىپ كەلدىم. ءسويتىپ قازىر تۇرىپ جاتقان ءۇيدىڭ يەسى جەرىن ساتاتىنىن ەستىدىم. اقشام بولماعان سوڭ ويىلدىڭ تارىسىنان 12 قاپ الىپ، قۋىرىپ، ساتىپ، زەينەتاقىمدى قوسىپ، 30 مىڭ تەڭگەگە الدىم. بالالار ءۇي سالدى، باقشا دا ەكتىم. قازىر دە كارتوپ، قيار مەن قىزاناق ەگەمىن، ءارامشوبىن جۇلامىن، سۋارامىن. ول جۇمىستارعا بالالار دا كومەكتەسەدى. تارى دا قايناتامىن. ماعان بۇل ەرمەك، - دەدى ءبيبىجان كادىرباي قىزى.
كەيۋانانىڭ ءوز تىگىن ماشيناسى بار. ول اتاسىنىڭ سىيلىعى، مۇراسى. سودان بەرى جانىنان تاستاماي، بار بالاسىن كيىندىردى، ءوز بالالارىمەن قوسا، اۋىل بالالارىنا، ۇلكەندەرگە قالاعانىن تىگىپ بەردى.
- اۋىلداعى دۇكەنگە ەكى تىگىن ماشيناسى ءتۇستى. اتام تۇڭعىش نەمەرەسى ومىرگە كەلگەندە باسشىلاردان سۇراپ، ماعان سىيلىققا بەردى. سول سىيلىقتى بەرگەنىنە 70 جىل تولدى. ءوزىم بارلىق كيىمدى تىگە بەرەمىن، ءالى كۇنگە دەيىن قۇراق قۇرايمىن. قىزدارىمنىڭ جاساۋىن ءوزىم جاسادىم. ءاليا مولداعۇلوۆانىڭ 70 جىلىعىنا ارنالعان كيىز ءۇيدىڭ بار جاساۋى ءبىزدىڭ قولىمىزدان شىقتى. تاربيە — ادامنىڭ باسىندا. باسى ىستەيتىن ادام تاربيەگە قارامايدى. مەن بالالارىما ولاي- بۇلاي دەپ ايتپادىم. بىرەۋى بەتىمە كەلمەي، مالعا قارادى، ءۇي جينادى، سۋ تاسىدى، تاماق ىستەدى. ءبىر- بىرىنە باۋىرمال، بەرەكەلى. بالالارىم جەسىر قالعانىمدى بىلدىرمەدى. ەڭبەك كەرەك. «90 جاسقا كەلۋدىڭ سەبەبى نە؟» دەپ سۇرادى مەنەن. 90 جاسقا جەتۋدىڭ سەبەبى تەڭكيىپ جاتۋ ەمەس، ەڭبەك. كۇنى- ءتۇنى جۇمىس ىستەۋ. 2 ساعات ۇيىقتاعان كۇندەرىم بولدى. سونىڭ ارقاسىندا 90 عا كەلىپ وتىرمىن، -دەدى كەيۋانا.
الەۋمەتتىك جەلىدەن كورىپ، ىزدەپ كەلدىم - بارشاگۇل وماربەكوۆا
«قازاق انالارى - داستۇرگە جول» قوعامدىق بىرلەستىگىنىڭ مۇشەسى بارشاگۇل وماربەكوۆا ءبيبىجان كادىرباي قىزىنىڭ تارى قۋىرىپ وتىرعان ۆيدەوسىن الەۋمەتتىك جەلىدەن كورىپ، ىزدەستىردى. كەيىن تاۋىپ الىپ، ۇيىنە باردى.
- اجەنىڭ ءومىرى ۇرپاققا ۇلگى ەكەنىن ايتىپ، كوپشىلىككە تانىتقىم كەلدى. قولونەر شەبەرى جانە ۇلتتىق تاعام شەبەرى. بىرىمىزگە- ءبىرىمىز ايتىپ، تاڭقالدىق. قازىرگى كەزدە ءبيبىدان اجە - اڭىز اجە. تاياۋدا عانا 90 جاسىن اتاپ ءوتتى، كەزدەسۋ ۇيىمداستىرىلدى. اجەنىڭ بويىنداعى توزىمدىلىگى، شەبەرلىگى - اسىل قاسيەتتەرى. كورگەن- تۇيگەنى بار ادامدار عانا وسى قاسيەتكە يە. بۇل كىسى ەڭبەك ارداگەرى، تىل ارداگەرى. بالا كەزىنەن قيىندىق كورىپ، ءپىسىپ، 9 بالامەن جەسىر قالسا دا كۇرەسىپ، قازىر زەينەتتىڭ راحاتىن كورىپ وتىر. قانشا قيىندىق كورسە دە سىنبادى، - دەدى بارشاگۇل وماربەكوۆا.
قازىرگى كەزدە ءبيبىجان كادىرباي قىزىنىڭ كەۋدەسىندە 5 مەدال جارقىرايدى. ونىڭ ءبىرى كۇمىس القا، ەكىنشىسى التىن القا. ال تاعى ەكەۋى جەڭىستىڭ 65 جانە 70 جىلدىعىنا ارنالعان توسبەلگى. وزگە بايلىعى - قاۋمالاعان بالا- شاعاسى، نەمەرە- شوبەرەسى.
التىناي ساعىندىقوۆا
