اقتوبەدە 8 ادامنىڭ ولىمىنەن سوڭ جۇك كولىگىنىڭ جۇرگىزۋشىسى ەكى ايعا قامالدى
اقتوبە. KAZINFORM - حرومتاۋ اۋداندىق سوتى جۇك كولىگىنىڭ جۇرگىزۋشىسىن ەكى اي قاماۋدا ۇستاۋ تۋرالى قاۋلى شىعاردى. جۇرگىزۋشى بەلارۋس ەلىنىڭ ازاماتى.
بۇگىن حرومتاۋ اۋداندىق سوتىنىڭ تەرگەۋ سۋدياسى جۇك كولىگىنىڭ جۇرگىزۋشىسىنە قاۋلى شىعاردى.
- ق ر قىلمىستىق كودەكستىڭ 345-بابىنىڭ 4-بولىگىندە كوزدەلگەن قىلمىستى جاسادى دەپ كۇدىك كەلتىرىلگەن ازامات س.-عا قاتىستى تەرگەۋ ورگاندارىنىڭ كۇزەتپەن ۇستاۋ تۇرىندەگى بۇلتارتپاۋ شاراسىن سانكسيالاۋ جونىندەگى ءوتىنىشحاتى قاناعاتتاندىرىلدى. سوت تەرگەۋ ۋاقىتىندا ەكى اي مەرزىمىنە، ياعني، 7-قازانعا دەيىن كۇزەتپەن ۇستاۋ تۇرىندەگى بۇلتارتپاۋ شاراسىن سانكسيالادى. قاۋلى زاڭدى كۇشىنە ەنگەن جوق، - دەپ حابارلادى اقتوبە وبلىستىق سوتىنىڭ باسپا ءسوز قىزمەتى.
ايتا كەتەيىك، 7-تامىز كۇنى سامارا-شىمكەنت تاسجولىندا جەڭىل جانە جۇك كولىگى سوقتىعىستى. سالدارىنان 8 ادام كوز جۇمدى. ىشىندە ماڭعىستاۋ وبلىسىنداعى تۋرنيرگە بارا جاتقان بالالار مەن اتا-انا ءارى جاتتىقتىرۋشى بولعان.
وسىدان كەيىن وبلىستىق جۇمىس توبى قۇرىلدى. وعان وبلىس اكىمىنىڭ ورىنباسارى جولداس باتىرحان باسشىلىق ەتەدى.
اۆتور
التىناي ساعىندىقوۆا
