اقتوبەدە 22 مەكتەپتىڭ بالالارى قاشىقتان وقىپ ءجۇر
اقتوبە. KAZINFORM - اقتوبەدە 22 مەكتەپتىڭ بالالارى قاشىقتان وقىپ ءجۇر. ال ويىل اۋدانى بەرسيەۆ ورتا مەكتەبىنىڭ ءبىتىرۋشى تۇلەكتەرى قالاداعى ليتسەي-ينتەرناتقا ورنالاستىرىلدى.
اقتوبە وبلىسى بويىنشا 22 مەكتەپتىڭ بالالارى قاشىقتان وقىپ ءجۇر. سەبەبى وڭىردە 20 ءبىلىم ورداسى ەۆاكۋاتسيالىق پۋنكت رەتىندە جۇمىس ىستەپ تۇر. ونىڭ 17 ى مەكتەپ، 2 ى كوللەدج جانە بىرەۋى مەكتەپ جانىنداعى ينتەرنات.
- سۋ تاسقىنىنان زارداپ شەككەن ادامدار ورنالاسقان 17 مەكتەپ، سۋ تاسقىنىنان زارداپ شەككەن ەكى ءبىلىم بەرۋ ۇيىمى قاشىقتان، سۋ تاسقىنى كەزىندە جول قاتىناسى ءىشىنارا ۇزىلگەن ايتەكە بي اۋدانىنداعى ايكە مەكتەبىنىڭ بالالارى ارالاس فورماتتا وقىپ ءجۇر. ال سۋ تاسقىنىنان زارداپ شەككەن ويىل اۋدانى بەرسييەۆ ورتا مەكتەبىنىڭ 17 وقۋشىسى وبلىس ورتالىعىنداعى م. قۇسايىنوۆ اتىنداعى مەكتەپ- ينتەرناتقا ورنالاستىرىلدى. بالالاردىڭ ەمتيحانعا، ۇبت دايىندالۋىنا بار جاعداي جاسالدى، - دەدى اقتوبە وبلىستىق ءبىلىم بەرۋ باسقارماسى باسشىسىنىڭ ورىنباسارى نۇرگۇل بەرتىلەۋوۆا.
بەرسيەۆ ورتا مەكتەبىنىڭ ءبىتىرۋشى تۇلەكتەرى اراسىندا بەس وقۋشى التىن بەلگىدەن ءۇمىتتى. سوندىقتان ولاردىڭ وقىپ، ۇ ب ت دايىندالۋىن م. قۇسايىنوۆ اتىنداعى دارىندى بالالارعا ارنالعان مەكتەپ-ينتەرناتتىڭ ۇجىمى ءوز مىندەتىنە الدى.
- مەكتەپ ليتسەي-ينتەرنات بولعان سوڭ بالالاردىڭ جاتىن ورنى، تاماعى تولىق قاراستىرىلعان. سونىمەن بىرگە وقۋشىلاردىڭ تاڭداۋ پانىنە سايكەس ۇ ب ت-عا دايىندىق كۇشەيدى. سىنىپ كۋراتورى مەن تاربيەشى بەكىتىلدى، - دەدى م. قۇسايىنوۆ اتىنداعى وبلىستىق دارىندى بالالارعا ارنالعان مامانداندىرىلعان ليتسەي-ينتەرناتىنىڭ ديرەكتورى تولەگەن ايمۇقاتوۆ.
اۆتور
التىناي ساعىندىقوۆا
