اقتوبەدە وقۋ اقىسىن بىردەن 93 پايىز كوتەرگەن كوللەدجدىڭ ستۋدەنتتەرى مەن اتا-انالارى قارسىلىق ءبىلدىردى
اقتوبە. KAZINFORM - جوعارى كوپسالالى «بولاشاق» كوللەدجىندە وقۋ اقىسى بىردەن 200000 تەڭگەگە كوتەرىلدى. بۇرىن 450000 تەڭگە تولەپ جۇرگەن ستۋدەنتتەر ەندى 650000 تەڭگە تولەۋگە قارسى. بۇگىن اتا-انالار مەن ستۋدەنتتەر كوللەدجگە جينالىپ، شاعىمىن جەتكىزدى.
اقتوبەدەگى جوعارى كوپسالالى «بولاشاق» كوللەدجىندە 1500 ستۋدەنت بار. بيىلعى وقۋ جىلىندا شامامەن 700 ستۋدەنت وقۋعا قابىلدانعان. مۇندا ءمۇعىلىم دە، زاڭگەرلەر مەن ەسەپشىلەر، تۋريمز، ءورت قاۋىپسىزدىگى سالاسىمەن قاتار مەديتسينا قىزمەتكەرلەرى دايىندالادى.
تالاپكەرلەردەن ۇبت قورىتىندىسىن تالاپ ەتپەيتىنىن دە جازعان. شاعىن عانا وقۋ عيماراتىنا بۇگىن اتا-انالار مەن ستۋدەنتتەر جينالىپ، وقۋ ساپاسىمەن قاتار وقۋ اقىسىنا قارسىلىعىن ءبىلدىردى.
- بىلتىر وقۋعا تۇسكەن كەزدە وقۋ اقىسى 300 مىڭ تەڭگە بولدى. بيىل 2-كۋرسقا اۋىستىق، وقۋ اقىسى ءبىز ويلاعانداي 400 مىڭ ەمەس، 575 مىڭ تەڭگەگە جەتتى. دەمەك 93 پايىز كوتەرىپ تۇر. كەلىسىمشارتتا ينفلياتسياعا بايلانىستى كوتەرەدى دەپ جازعان. ۇلتتىق بانكتىڭ مالىمەتى بويىنشا، ينفلياتسيا 9,3 پايىز بولىپ تۇر. بىزگە ەشقانداي قۇجات بەرمەدى، قوسىمشا كەلىسىمشارت تا جوق. بۇل كوللەدجدە الىپ بارا جاتقان ءبىلىم دە جوق. ال اقىسىنا قاراساق ۋنيۆەرسيتەتپەن بىردەي عوي… ءارى وقۋ اقىسىنىڭ ناقتى قانشا تەڭگەگە كوتەرىلگەنىن 6-قازان كۇنى ايتىپ وتىر، - دەدى اكۋشەر ءىسى ماماندىعىنىڭ ستۋدەنتى دينارا قويشىعۇلوۆا.
فارماتسيا ماماندىعىنا تۇسكەن فاريدا ساتتىقوۆانىڭ ايتۋىنشا، وقۋ اقىسى تۋرالى مالىمەتتى جاز بويى سۇراعان. وقۋ ءبولىمى الدىن الا اقپارات بەرمەگەن.
- ساباق قازان ايىندا باستالدى. سول كەزدەن-اق كۇن سايىن سۇراپ جۇردىك. كۋراتور دا، رەكتور دا ايتپادى. توپتاعى ستۋدەنتتەر رەكتورعا بارعان كەزدە 550000 تەڭگە بولعانىن جەتكىزگەن. ءبىز قاي زاڭعا، قاي تالاپقا سۇيەنىپ وسىرگەنىن سۇراعان ەدىك. «شارۋاڭ بولماسىن، ءوزىم بىلەم» دەپ ايتقان. وسىنداي قيىندىققا تاپ بولدىق. بيىل عانا ەمەس، كەلەسى جىلى دا كوتەرەدى ەكەن. باسقا وقۋ ورنىنا اۋىسۋ ءۇشىن وقۋ اقىسىنىڭ تەڭ جارتىسىن تولەۋ كەرەك، قۇجاتتى بەرمەيدى. مەن قارسىمىن، ەشكىم ءبىزدىڭ ءسوزىمىزدى تىڭداعان ەمەس. نەگىزى كەلىسىم بويىنشا كەشكى وقۋعا تۇسكەن ەدىك. جۇمىس ىستەيمىز، كەشكە كەلىپ وقيمىز، - دەدى فاريدا ساتتىقوۆا.
ال كوللەدج اكىمشىلىگى بولسا وقۋ اقىسىن نارىققا رەتتەپ 50-56 پايىز كوتەرگەنىن عانا راستادى.
- نارىق زامانىنا بايلانىستى وقۋ اقىسىنىڭ كوتەرىلىپ جاتقانى راس. ءبىز جەكە كوللەدج بولعاسىن ءوز-ءوزىمىزدى قامتاماسىز ەتەمىز. ءار ماماندىقتا بولەك-بولەك 50-56 پايىز كوتەرىلدى. وقۋ ورنىنا تۇسكەن كەزدە ءبىز كەلىسىمشارت بەرەمىز. كەلىسىمشارت ەكى تىلدە. سول كەلىسىمشارتتا وزگەرۋى مۇمكىن دەگەن جازىلعان. «بىزگە نەگە جازدا ايتپادى» دەيدى نارازىلار. وقۋ جىلى 1-قىركۇيەكتەن باستالدى. جان-جاقتان مالىمەتتەردى قارايمىز. ءسويتىپ جينالىستا وسىنداي ۇيعارىمعا كەلدى. بيىل 600-700 دىڭ ۇستىندە ستۋدەنت قابىلداندى. كوللەدجدە 1500 ستۋدەنت بار، - دەدى جوعارى كوپسالالى «بولاشاق» كوللەدجىنىڭ تاربيە ءىسى جونىندەگى ورىنباسارى گۇلناز وماروۆا.
اتا-انالاردىڭ ءبىر توبى پروكۋراتۋراعا شاعىم تۇسىرگەنىن دە مالىمدەدى.
ەسكە سالساق، بىلتىر اقتوبەدەگى قازاق- ورىس حالىقارالىق ۋنيۆەرسيتەتى ليتسەنزياسىنان ايىرىلىپ، جابىلدى.
