اقتوبە پروكۋرورلارى «ءدىني پانسيوناتتىڭ» اتىن جامىلعان مەكەمەلەردى جاپتى
استانا. KAZINFORM - اقتوبە قالاسى پروكۋراتۋراسى بالالار پانسيوناتتارى تۇرىندەگى قايىرىمدىلىق مەكەمەلەرىن تەكسەرۋ بارىسىندا قولدانىستاعى زاڭناما تالاپتارىنىڭ بۇزىلعانىن انىقتادى.

«اقتوبە قالاسىنداعى «اقتوبە» جانە «اقجار» پانسيوناتتارىنىڭ تاربيەلەنۋشىلەرىنىڭ جەكە ىستەرىن زەردەلەۋ بارىسىندا، تاربيەلەنۋشىلەردىڭ ءدىني ادەبيەتتەردى پايدالانعانى، سونىمەن قاتار، جەكە ىستەرىندە ءدىني جازبالارى بار داپتەرلەردىڭ بار ەكەنى انىقتالدى»، - دەلىنگەن حابارلامادا.
ءىس جۇزىندە مەكەمەلەردىڭ قىزمەتى ولاردىڭ جارعىلىق ماقساتتارىنا قايشى كەلەتىنى بەلگىلى بولدى.
«قايىرىمدىلىق مەكەمەلەرى قىزمەتىنىڭ ءدىني بەيىمدىلىگى، بالالار مەن تاربيەشىلەردىڭ ساۋالنامالارىمەن دە راستالدى. سونىمەن قاتار، وبەكتىلەردە سانيتارلىق-ەپيدەميولوگيالىق، ءورت، ەڭبەك زاڭناماسىنىڭ تالاپتارى بۇزىلعان»، - دەپ حابارلادى وبلىستىق پروكۋراتۋرا.
اتالعان مەكەمەلەر ءوز قىزمەتىن سانيتارلىق-ەپيدەميولوگيالىق قورىتىندىلارسىز جۇزەگە اسىرعان.
بالالاردىڭ ءتيىستى ءبىلىم الۋعا، تاربيەلەنۋگە جانە دەر كەزىندە مەديتسينالىق كومەك الۋعا قۇقىقتارى مەن بوستاندىقتارى ايتارلىقتاي بۇزىلعان.
قازىرگى ۋاقىتتا سوت اقتوبە قالاسى پروكۋراتۋراسىنىڭ تالاپ-ارىزى بويىنشا «اقتوبە» جانە «اقجار» پانسيوناتتارىن تىركەۋدەن شىعارىپ، تاراتىپ جىبەردى.