اقتوبە قويمالارىندا سۋ دەڭگەيى ءتۇسىپ كەلەدى

اقتوبە. KAZINFORM - اقتوبە وبلىسى اكىمىنىڭ ورىنباسارى اسىلبەك ەسەنبايەۆ وڭىردەگى سۋ تاسقىنى سالدارى مەن اتقارىلعان جۇمىستار تۋرالى ايتىپ بەردى.

«وبلىستاعى ءۇش ءىرى سۋ قويماسىنىڭ دەڭگەيى قالىپتى. سوڭعى ەكى-ءۇش كۇندە قارعالى سۋ قويماسىندا جاۋىن-شاشىن سالدارىنان سۋ دەڭگەيى كوتەرىلگەن بولاتىن. كەشە ءبىز قارعالى قويماسىن تولىق ارالاپ شىقتىق. سۋ دەڭگەيىنىڭ ءتۇسۋى بايقالادى. قازىرگى ساتتە سەكۋندىنا 100 تەكشە مەتر سۋ ترانزيتتىك رەجيمدە جىبەرىلىپ وتىر. ەكى ساعات سايىن قويماداعى سۋ دەڭگەيى تەكسەرىلۋدە»، - دەدى ا، ەسەنبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سپيكەردىڭ ايتۋىنشا، اقتوبە وبلىسى بويىنشا سۋ تاسقىنى جاعدايى تۇراقتى، ونداعى جەدەل شتاب تاۋلىك بويى جۇمىس اتقارۋدا.

ءوڭىردىڭ 6 اۋدانىندا (قوبدا، مۇعالجار، تەمىر، ايتەكە ءبي، ويىل، ىرعىز) جانە اقتوبە قالاسىندا جەرگىلىكتى اۋقىمداعى تابيعي سيپاتتىق توتەنشە جاعداي جاريالانعان. تۇتاس ايماقتا 720 جەكە قۇرام، 185 تەحنيكا، 11 سۋ قايىعى جانە 8 سۋ سورعىش جۇمىلدىرىلعان.

«وبلىستاعى 27 ەلدى مەكەندە 695 ابونەنت تۇراقتى جارىقسىز قالىپ وتىر. ولاردىڭ 500 ءى توك بەرەتىن گەنەراتورمەن ۋاقىتشا قامتىلدى. جول ۋچاسكەلەرىنىڭ سۋعا تولىپ، شايىلىپ كەتۋىنەن 11 ەلدى مەكەنمەن جول قاتىناسى ۋاقىتشا ۇزىلگەن. قالپىنا كەلتىرۋ جۇمىستارى 24/7 رەجيمىندە جۇرگىزىلۋدە. بۇگىن «العا-قارابۇلاق» باعىتىنداعى اينالما جولى اشىلدى. «العا-بەسقوپا» باعىتىنداعى قاتىناس قالپىنا كەلتىرىلەدى»، - دەدى ول.