اقتوبەدە ءبىر اپتادا ەكى ايەل كىسى قولىنان قازا تاپتى
استانا. KAZINFORM - اقتوبەدە 26 جاستاعى ايەلدىڭ ولىمىنە قاتىستى قىلمىستىق ءىس تەرگەلىپ جاتىر. قىلمىس جاسادى دەگەن كۇدىكپەن مارقۇمنىڭ بۇرىنعى كۇيەۋى ۇستالدى.
قايعىلى وقيعا 6-قاراشاعا قاراعان ءتۇنى قالانىڭ تۇرعىن الاپتارىنىڭ بىرىندە بولعان. مارقۇمنىڭ ارتىندا كىشكەنتاي قىزى قالدى. بۇل كەيىنگى بىرنەشە كۇندە قالادا بولعان وسىنداي ەكىنشى جاعداي.
قىلمىس ەسەت باتىر تۇرعىن الابىنداعى كوپقاباتتى ۇيلەردىڭ بىرىندە بولعان.
26 جاستاعى ايەلدى ءولتىردى دەگەن كۇدىكپەن ونىڭ 31 جاستاعى بۇرىنعى كۇيەۋى ۇستالدى. ەرلى-زايىپتىنىڭ ءتورت جاستاعى قىزى بار. اتالعان دەرەك بويىنشا سوتقا دەيىنگى تەرگەۋ باستالدى.
«كۇدىكتى انىقتالىپ، ۇستالدى. قازىر ول ۋاقىتشا ۇستاۋ يزولياتورىنا قامالدى. الدىن الا مالىمەت بويىنشا، قىلمىس بۇرىنعى ەرلى-زايىپتى اراسىنداعى تۇرمىستىق جانجال سالدارىنان جاسالعان. ايتا كەتەيىك، بۇعان دەيىن پوليتسياعا تۇرمىستىق جانجالدارعا قاتىستى ەشقانداي ارىز-شاعىم، ءوتىنىش نەمەسە حابارلاما تۇسپەگەن»، - دەپ حابارلادى اقتوبە وبلىستىق پوليتسيا دەپارتامەنتىنىڭ باسپا ءسوز قىزمەتى.
مارقۇم تۋرالى ونىڭ تۋىسى، جەرگىلىكتى جۋرناليست جانار قوجانوۆا ايتىپ بەردى. ول الەۋمەتتىك جەلىدەگى پاراقشاسىندا ول تۋرالى ەستەلىكتەرىن ءبولىستى.
«سەنى ەندى قۇشاقتاي المايمىز، داۋسىڭدى ەستي المايمىز، بىرگە كۇلە المايمىز. سەنىڭ ورنىڭدى ەشكىم تولتىرا المايدى. ارتىڭدا قالعان جاقىندارىڭنىڭ جۇرەگىندە ماڭگىلىك ساعىنىش قالدى…»، - دەپ جازدى جانار قوجانوۆا الەۋمەتتىك جەلىدە.
ادام ءولتىرۋ قىلمىسى جاسالدى دەلىنگەن پاتەرگە ءمور باسىلعان. مارقۇمنىڭ كورشىلەرى وقيعادان كەيىن ءالى دە ەس جيا الماي وتىر.
«ول وتە جاقسى ادام ەدى. شامامەن ءبىر جىل بۇرىن وسى جەرگە كوشىپ كەلگەن. ءبىز ونى قىزىمەن جانە اناسىمەن بىرگە كورەتىنبىز. ال كۇيەۋىن مۇلدە تانىمايتىنبىز. ءاردايىم اقجارقىن، تاربيەلى بولاتىن. ءبىر-ەكى رەت بالالارىمدى ۋاقىتشا وعان قالدىرىپ، قاراپ بەرۋىن سۇراعانمىن»، - دەدى مارقۇمنىڭ كورشىسى مەيرامگۇل ءجۇسىپوۆا.
ايتا كەتەيىك، بۇل كەيىنگى بىرنەشە كۇندە اقتوبەدە ايەل كىسى قولىنان قازا تاپقان ەكىنشى جاعداي.
اقتوبەدەگى كىسى ولىمىنەن كەيىن نەكە سارايى وكىلدەرى نە دەدى؟
3-قاراشادا اقتوبەدەگى نەكە سارايى 26 جاستاعى ايەل كىسى قولىنان قازا تاپتى. پوليتسيانىڭ الدىن الا مالىمەتىنشە، كۇدىكتى ونىڭ بۇرىنعى ازاماتتىق نەكەدەگى جولداسى. ولاردىڭ اراسىندا اتا-انا قۇقىعىنان باس تارتۋ ماسەلەسىنە بايلانىستى جانجال تۋىنداعان.
