اقتوبەدە ايەلىن بالاعاتتاعان تۇرعىن 40 ساعاتتىق قوعامدىق جۇمىسقا تارتىلدى
استانا. KAZINFORM - اقتوبەدە جۇبايىنىڭ تىنىشتىعىن بۇزىپ، وتباسىندا جانجال شىعارعان 45 جاستاعى ەر ادام 40 ساعات قوعامدىق جۇمىسقا تارتىلدى، دەپ حابارلايدى turkystan.kz.
ايتا كەتەيىك، 2025 -جىلعى 1-قىركۇيەكتەن باستاپ قازاقستاندا اكىمشىلىك جازانىڭ جاڭا ءتۇرى - قوعامدىق جۇمىس ەنگىزىلدى. قازىر بۇل جازا اقتوبە وبلىسىندا دا كەڭىنەن قولدانىلا باستادى. جۋىردا اقتوبە قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىندا جەرگىلىكتى تۇرعىنعا قاتىستى ءىس قارالدى.
سوتتا انىقتالعانداي، ەر ادام بۇعان دەيىن دە وسىنداي قۇقىق بۇزۋشىلىق جاساعانى ءۇشىن اكىمشىلىك جاۋاپكەرشىلىككە تارتىلعان. الايدا ول وزىنە ءتيىستى قورىتىندى شىعارماعان. بۇل جولى دا الكوگولدىك ماساڭ كۇيدە جۇبايىنا بالاعات سوزدەر ايتىپ، وتباسىنىڭ تىنىشتىعىن بۇزعان.
ءىستى قاراعان سوت ەر ادامدى ق ر اكىمشىلىك قۇقىق بۇزۋشىلىق تۋرالى كودەكسىنىڭ 73-بابى 2-بولىگى بويىنشا كىنالى دەپ تانىپ، وعان 40 ساعات قوعامدىق جۇمىس جازاسىن تاعايىندادى.
جاڭا جازا ءتۇرىنىڭ ماقساتى - قۇقىق بۇزۋشىلاردى جاۋاپكەرشىلىككە تارتۋ عانا ەمەس، سونىمەن قاتار ولاردىڭ قوعامدىق ءتارتىپتى ساقتاۋعا جانە اينالاسىنداعىلارعا قۇرمەتپەن قاراۋعا دەگەن جاۋاپكەرشىلىگىن ارتتىرۋ.
جىل باسىنان بەرى اقتوبە وبلىسىندا سوت شەشىمىمەن 215 ادام قوعامدىق جۇمىسقا تارتىلدى. ولاردىڭ 203 ى - ەر ادام، 12 سى - ايەل.
قوعامدىق جۇمىس دەگەنىمىز - بۇل ارنايى بىلىكتىلىكتى قاجەت ەتپەيتىن، قوعامعا پايدالى جۇمىستاردى اقىسىز ورىنداۋ. مۇنداي جۇمىستار اكىمشىلىك جاۋاپكەرشىلىككە تارتىلعان ازاماتتىڭ تۇرعىلىقتى جەرى بويىنشا قوعامدىق ورىنداردا ۇيىمداستىرىلادى.
