اقتوبەدە العاشقى قار جاۋىپ جاتىر
اقتوبە. KAZINFORM - سينوپتيكتەر كۇن كۇرت سۋىتىپ، جاڭبىر، قار جاۋاتىنىن حابارلادى. ال پوليتسيا جۇرگىزۋشىلەردى ساق بولۋعا ۇندەدى.
«قازگيدرومەت» ر م ك اقتوبە وبلىسى بويىنشا فيليالى بۇگىن تاۋلىك بويى وبلىستىڭ باتىسىندا، سولتۇستىگىندە قاتتى جاۋىن- شاشىن، ونىڭ ىشىندە جاڭبىر، قار جاۋاتىنىن ايتىپ، ەسكەرتتى.
جەل سولتۇستىك- باتىستان، باتىستان سوعادى جانە ەكپىنى 15-20 م/س بولادى. اسىرەسە، وبلىستىڭ سولتۇستىگىندە، سولتۇستىك- شىعىسىندا ورنالاسقان حرومتاۋ، مارتوك اۋداندارىندا قار مول ءتۇسىپ، تۇرعىندار الەۋمەتتىك جەلىدە فوتو-ۆيدەولاردى ءبولىسىپ جاتىر.
- 4-قازاندا وبلىستىڭ وڭتۇستىگىندە، شىعىسىندا جەلدىڭ ەكپىنى 23-28 م/س، 5-قازاندا وبلىستىڭ سولتۇستىگىندە، شىعىسىندا ەكپىنى 23-28 م/س جەتەدى. اۋا تەمپەراتۋراسى 4-قازاندا تۇندە 0-5 گرادۋس جىلى، وبلىستىڭ باتىسىندا، سولتۇستىگىندە 5 گرادۋس اياز، كۇندىز 2-7 گرادۋس جىلى بولادى، - دەپ حابارلادى سينوپتيكتەر.
اقتوبە وبلىستىق پوليتسيا دەپارتامەنتى باسپا ءسوز قىزمەتى جۇرگىزۋشىلەردى ساق بولۋعا ۇندەدى.
- قازىرگى ۋاقىتتا وڭىردە قار ارالاس جاڭبىر جاۋىپ تۇر. جول دۇرىس كورىنبەي قالۋى مۇمكىن. تايعاق بولۋى ىقتيمال. وسىعان بايلانىستى جۇرگىزۋشىلەردەن جىلدامدىقتى قاتاڭ ساقتاۋدى، كولىك قۇرالدارى اراسىنداعى اراقاشىقتىقتى ۇلعايتۋدى، قاۋىپتى مانەۆرلەردەن باس تارتۋدى جانە جول قوزعالىسى ەرەجەلەرىن ساقتاۋدى سۇرايمىز. الىس جولعا شىعار الدىندا اۋا رايى مەن جول جاعدايىن ناقتىلاپ، كولىكتىڭ تەحنيكالىق جاعدايىن تەكسەرىپ العان ءجون، - دەپ حابارلادى پوليتسيانىڭ باسپا ءسوز قىزمەتى.
ەسكە سالساق، «قازگيدرومەت» ر م ك قازاقستاننىڭ 17 وبلىسىندا اۋا رايىنا بايلانىستى ەسكەرتۋ جاسادى. 4-قازاندا جەلدىڭ ەكپىنى 28 م/س-قا دەيىن جەتىپ، جاڭبىر، قار جاۋىپ، نايزاعاي وينايدى جانە تۇمان تۇسەدى.
